Impinduka zikomeye muri CAF Champions League, Confederation Cup n’Igikombe cya Afurika cy’Abagore

Yanditswe na Eric Tony Ukurikiyimfura
Kuya 17 Nyakanga 2019 saa 09:04
Yasuwe :
0 0

Impuzamashyirahamwe y’Umupira w’Amaguru muri Afurika, CAF, yemeje impinduka zikomeye mu buryo imikino ya nyuma ya CAF Champions League na CAF Confederation Cup yakinwagamo, aho hatazongera kubaho imikino ibiri ya nyuma guhera mu mwaka utaha w’imikino.

Nk’uko byatangajwe na Perezida wa CAF, Ahmad Ahmad yavuze ko Komite nyobozi y’iyi Mpuzamashyirahamwe yateranye kuri uyu wa Gatatu i Cairo mu Misiri, igafata ibyemezo bitandukanye ku marushanwa akomeye kuri uyu mugabane.

CAF yemeje ko guhera mu mwaka utaha w’imikino, irushanwa rihuza amakipe yabaye aya mbere iwayo muri Afurika, CAF Champions League n’irihuza ayatwaye ibikombe by’igihugu, CAF Confederation Cup, yombi azajya asozwa n’umukino wa nyuma umwe uzajya ubera ku kibuga kihariye.

Aya marushwa yari asanzwe asozwa n’imikino ibiri ya nyuma, aho buri kipe yagiraga umukino umwe yakira (ubanza n’uwo kwishyura).

Guhera mu mwaka utaha w’imikino wa 2019/20, imijyi itandukanye izajya isaba kwakira umukino wa nyuma wa rimwe muri aya marushanwa ya CAF.

Iki cyemeje kije gikurikira imvururu ziherutse kuba ku mukino wa nyuma wa CAF Champions League wahuje Espérance de Tunis na Wydad Casablanca.

Iyi kipe yo muri Maroc yahisemo kuva mu kibuga umukino wo kwishyura utarangiye kuko yangiwe igitego yatsinze ku munota wa 60.

CAF yasabye Espérance de Tunis gusubiza igikombe, hazasubirwamo uyu mukino wa nyuma mu gihe aya makipe yagaragaje ko adashaka kongera gukina, buri imwe ivuga ko ari yo ikwiye guhabwa igikombe.

Biteganyijwe ko tariki ya 31 z’uku kwezi aribwo urukiko rwa Siporo (TAS) rukorera i Lausanne mu Busuwisi, ari bwo ruzafata umwanzuro wa nyuma ku kibazo cy’aya makipe yombi.

Undi mwanzuro wafashwe na Komite Nyobozi ya CAF ni ukongera umubare w’amakipe yitabiraga Igikombe cya Afurika cy’abagore, ukava ku munani, akaba amakipe 12.

Esperance de Tunis yasabwe gusubiza igikombe cya CAF Champions League kugira ngo umukino yahuyemo na Wydad Casablanca usubirwemo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza