Impamvu zatumye Seninga Innocent asezera akazi muri Bugesera FC

Yanditswe na Eric Tony Ukurikiyimfura, Ntare Julius
Kuya 20 Werurwe 2019 saa 11:42
Yasuwe :
0 0

Uwari umutoza w’ikipe ya Bugesera FC, Seninga Innocent, yasezeye ku mirimo yo gutoza iyi kipe ku wa Mbere, aho zimwe mu mpamvu yatanze zatumye asaba gusesa amasezerano harimo ko ibyo yumvikanye n’ubuyobozi bitubahirijwe birimo umushahara w’amezi abiri n’amafaranga y’u Rwanda ibihumbi 500 Frw yasigaye ku yo yahawe mbere yo gutangira akazi i Nyamata.

IGIHE yamenye ko uretse impamvu uyu mutoza yavuze mu ibaruwa yandikiye ubuyobozi hari n’ibindi batumvikanyeho mu mezi arindwi yari amaze ayitoza, byatumye atandukana na yo.

Amakuru avuga ko ubwo FERWAFA yimuriraga umukino Bugesera FC yari kwakiramo Rayon Sports kuri Stade Mumena ku munsi wa 20 wa shampiyona, Seninga Innocent atishimiye kuba ubuyobozi bwarasabye ko utabera ku Mumena ukajyanwa kuri Stade ya Kigali.

Mu ibaruwa FERWAFA yandikiye Bugesera FC tariki ya 1 Werurwe, iyibwira ko ikibuga cyayo gihagaritswe, yemeje ko ariyo izajya igena aho iyi kipe yakirira imikino yayo muri Kigali.

Tariki ya 5 Werurwe 2019, FERWAFA yongeye kwandikira Bugesera FC iyimenyesha ko umukino izakiramo Rayon Sports ku munsi wa 20 wa shampiyona uzabera kuri Stade Mumena.

Seninga Innocent yatandukanye na Bugesera FC kubera kutumvikana ibintu bitandukanye

Bukeye Ubuyobozi bwa Bugesera FC ngo bwahise bwandikira FERWAFA, busaba guhindura ikibuga bugakinira kuri Stade ya Kigali butabyumvikanyeho cyangwa ngo bunamenyeshe umutoza Seninga wumvaga ko yaba afite amahirwe menshi mu mukino aramutse akiniye ku Mumena yabayeho cyane atoza Kiyovu Sports dore ko kuri Stade ya Kigali na Rayon Sports ihafata nko mu rugo.

Muri iyi baruwa Bugesera FC yandikiye FERWAFA, yabibukije ko ikipe yakiriye ariyo igena ikibuga yakiriraho, isaba ko mu gihe bagiye guhitamo ikibuga bazajya bakiniraho kuko icyo bari bafite cyari kimaze guhagarikwa, na bo bajya bahabwa uburenganzira bwo guhitamo.

FERWAFA ntiyazuyaje kuko uwo mugoroba, yasubije ibemera ikibuga cya Stade ya Kigali, umukino ushyirwa saa 19:30 kuko hari kubera gahunda zijyane n’Umunsi Mpuzamahanga w’Abagore.

Ubwo bateguraga uyu mukino, Seninga ngo yifuje gukinisha Irokan Samson Ikechukwu wari umaze iminsi adakora imyitozo kuko yari amwizeyeho kugira icyo amufasha cyane mu gice cya mbere, bituma Mugenzi Bienvenue amubwira ko abanza ku ntebe y’abasimbura, ndetse ngo anabibwira abakinnyi bose.

Mugenzi ntabwo yabyumvise, ngo ahubwo yarikubise, arasohoka, ava mu ikipe, umutoza mukuru aza kumusabira ibihano byo guhagarikwa imikino itatu n’ubuyobozi kandi akandika asaba imbabazi.

IGIHE yumvise ko Mugenzi yahanwe ndetse agasaba imbabazi, ariko ngo aho byabereye ikibazo ni uburyo uyu mukinnyi yagaruwe mu bifashishijwe ku mukino bakurikijeho ubwo banganyaga na Gicumbi FC ku wa Gatandatu.

Ngo Ubuyobozi bwa Bugesera FC bwanze kumvira umutoza Seninga bukinisha Mugenzi yari yasabye ko ahagarikwa ndetse ntibwigeze bumumenyesha impamvu bwafashe iki cyemezo kuko atari ahari, ari mu ikipe y’igihugu Amavubi iri kwitegura umukino wa Côte d’Ivoire.

Muri uyu mukino, Bugesera FC yakuye inota i Gicumbi, aho yatsindiwe na Mugenzi Bienvenue mu gice cya mbere, igitego cyishyuwe na Nshimiyimana Aboubakar mu minota ya nyuma.

Ku mukino bari guhuramo na Rayon Sports kandi, ikibazo cy’abana batoragura imipira nacyo cyateje ukutumvikana ku mpande zombi kuko Seninga ngo yaba yarasabye ko Higiro Thomas basanzwe bakorana mu ikipe y’igihugu, yabaha abana batoragura imipira mu gihe ubuyobozi bwa Bugesera FC bwari bwatanze uyu mukino (ku bandi ngo bawishyuze), byarangiye hakoreshejwe aba-Rayon Sports nyamara atari yo yakiriye.

Seninga yatandukanye n'ikipe ya Bugesera FC nyuma y'amezi arindwi gusa

Ubundi bwumvikane buke hagati y’impande zombi IGIHE yamenye ni abakinnyi bashya iyi kipe yaguze ntibahabwe amafaranga yo kubagura.

Aba barimo Nkusi Prince na Divin Kayiranga wari waratashye nyuma akaza kugaruka, ngo umutoza ntiyabyishimiye kuko akenshi byamugoraga gukoresha abakinnyi basa n’abadashyize umutima hamwe.

Byiyongeraho kuba baratsinzwe umukino wa Mukura Victory Sports, banyagiriwe mu rugo ibitego 3-0, aho mu bisabonuro ngo yahaye ubuyobozi harimo ko kuba abakinnyi bari bamaze amezi atatu badahembwa byagabanyije ubwitange bwabo mu kibuga.

Ibi ngo nibyo byabaye imbarutso yo guhita yandikira ubuyobozi bw’ikipe mu gitondo cyo ku wa Mbere, asesa amasezerano y’umwaka bari baragiranye tariki ya 26 Kanama umwaka ushize nyuma y’amezi arindwi gusa ari mu kazi.

Mu kiganiro yagiranye na IGIHE, Umunyamabanga Mukuru wa Bugesera FC, Sam Karenzi, yagize icyo avuga kuri ibi byatumye batandukana n’umutoza Seninga Innocent.

Ati “Ku bijyanye n’ikibuga, umutoza ntabwo ari we uhitamo ikibuga agomba gukiniraho kuko ashinzwe ikipe kandi hari n’ubuyobozi nabwo butekerereza ikipe. Yatubwiye ko ashaka ku Mumena ko ariho yatsindira tumubwira ko n’i Nyamirambo yatsinda kandi yahakuye inota rimwe mu mukino yari gutsinda, habura amahirwe.”

“Ni icyemezo twafashe nk’ubuyobozi bw’ikipe ndetse twabanje kwicarana n’Umuyobozi w’Akarere tubiganiraho. Twari dukeneye amafaranga. Kubera ko umukino wabaye nijoro kandi twe hariya tudasanzwe tuhakinira, byabaye ngombwa ko dushaka umuntu ushyiramo amafaranga ye, akaba ari we wishyuza.”

Umunyamabanga Mukuru wa Bugesera FC, Karenzi Sam

Karenzi yakomeje avuga ko ku mukino wa Rayon Sports inshingano bari bafite ari ukureba ku byangombwa bikenerwa ku kibuga byashoboraga gutuma ikipe itakaza umukino kandi ariyo yawakiriye.

Ati “Twe twagumanye inshingano zo kumenya ko Imbangukiragutabara ihari, hari abashinzwe umutekano, ikibaho bakoresha basimbuza n’ibindi byashobora gutuma ikipe ibura amanota y’umukino. Iby’abana batoragura imipira ntabwo ari twe twabikoze, byakozwe n’uwishyuje umukino.”

Ku bijyanye no kuba harafashwe icyemezo cyo kugarura umukinnyi mu kibuga kandi ari mu bihano, ntibimenyeshwe umutoza mukuru, Karenzi yabwiye IGIHE ko byatewe n’umubare muto w’abakinnyi bari bafite mu busatirizi bagarura Mugenzi kuko yari yamaze gusaba imbabazi.

Uyu muyobozi yemereye IGIHE ko hari amafaranga ikipe irimo umutoza n’abakinnyi, gusa avuga ko atari byo abona nk’impamvu nyamukuru yateye umutoza gusezera kuko n’abandi bafitiye menshi bazayabaha.

Sam Karenzi yakomeje avuga ko ikipe iraba ikomezanyije n’umutoza wungirije Manirakiza Gervais mu mikino iri imbere irimo n’uwo bazasuramo Kiyovu Sports ku Cyumweru.

Nk’umutoza wa Bugesera FC, Seninga yatoje imikino 20, atsinda itanu, anganya umunani mu gihe yatsinzwe irindwi. Atandukanye na Bugesera FC, ayisize ku mwanya wa 10 n’amanota 24.

Seninga yari yagizwe umutoza wa Bugesera FC nyuma yo gutoza Musanze FC mu mezi abiri asoza shampiyona y’umwaka ushize, iyi yagiyemo amaze gutandukana na Police FC. Yatoje kandi Isonga FC, Kiyovu Sport na Etincelles FC.

FERWAFA yahagaritse ikibuga cya Bugesera FC mu ntangiriro z'uku kwezi
FERWAFA yari yemeje ko Bugesera FC izakirira Rayon Sports ku Mumena
Ibaruwa Bugesera FC yandikiye FERWAFA isaba ko umukino ujyanwa i Nyamirambo
Ibaruwa FERWAFA yandikiye Bugesera FC iyemerera gukinira i Nyamirambo
Ibaruwa Seninga Innocent yandikiye Bugesera FC asesa amasezerano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza