Imikoranire idahamye hagati ya FERWAFA na Minisiteri ya Siporo nk’izingiro ryo kudakina kw’Amavubi y’Abagore

Yanditswe na Eric Tony Ukurikiyimfura
Kuya 22 Nzeri 2020 saa 01:50
Yasuwe :
0 0

Kudahuza mu igenamigambi ry’ibikorwa by’Ikipe y’Igihugu y’Abagore, biri mu bituma imara igihe kirekire idakina amarushanwa mpuzamahanga uko bikwiye, nk’uko impande bireba bibihurizaho.

Amavubi y’Abagore aheruka kwitabira irushanwa mpuzamahanga muri CECAFA yabereye i Kigali muri Nyakanga 2018, mu gihe muri Werurwe 2019 aribwo yakinnye umukino uheruka, wari uwa gicuti wayihuje n’iya Repubulika Iharanira Demokarasi ya Congo, i Rubavu.

Ikibazo cy’imikino n’amarushanwa make ku ikipe y’Igihugu kiri mu byabajijwe Minisiteri ya Siporo mu kiganiro yagiranye n’abanyamakuru ku wa Gatanu, tariki ya 18 Nzeri 2020.

Umunyamabanga Uhoraho muri Minisiteri ya Siporo, Shema Maboko Didier, yasubije ko na bo bibaza impamvu Amavubi y’abagore mu mupira w’amaguru atitabira amarushanwa nk’andi makipe y’Igihugu, ariko bari kubiganiraho na FERWAFA.

Ati “Niba muri Basketball dushobora kubona amakipe y’abakobwa, muri Volleyball tukayabona, ikibazo cyo muri Football y’abagore cyaba ari ikihe? Nkeka ko igisubizo cya mbere kitava muri Minisiteri ya Siporo, ahubwo cyava muri Federasiyo ifite mu nshingano za mbere tekinike, gutegura ikipe y’abagore.”

“Mu byo turi gutegura na FERWAFA harimo kureba uburyo umupira w’amaguru w’abagore watera imbere, turimo turafatanya kugira ngo umupira w’abagore ugaragare cyangwa ikipe y’Amavubi, ariko noneho initabweho muri gahunda z’iterambere.”

“Kuko nk’uko nari mbivuzeho niba mu zindi siporo dufite amakipe yitabira, ni ngombwa ko no mu mupira w’amaguru ikipe y’Igihugu igaragara kuko dufite abakinnyi bafite ubushake kandi bafite n’impano. Turi gufatanya na FERWAFA kugira ngo igisubizo kirambye kiboneke kandi kizabe ari igifasha abo bana b’abakobwa.”

Ku ruhande rwa FERWAFA ishinzwe gutegura ikipe y’Igihugu mu byiciro bitandukanye, mu kiganiro Umuyobozi wayo, Rtd Brig Gen Sekamana Jean Damascène, yagiranye na IGIHE mu kwezi gushize, yavuze ko mu bituma Amavubi y’Abagore adakina harimo kuba imikoranire hagati y’inzego bireba idahamye.

Ati “Nibyo nkubwira, ikipe y’Igihugu bisa n’ibigoranye kuko ifitweho uruhare n’inzego zitandukanye. Igikwiye kubanza kunonosorwa neza ni iyo mikorere n’imikoranire y’inzego ku ikipe y’igihugu. Ishingano z’uyu ni izihe, iz’undi ni izihe. Ni ibintu bihurizwa hamwe, iyo bidahurijwe hamwe niho hava ikibazo cyo kudakina.”

“Hari ingengo y’imari itegura ikipe y’igihugu igomba kubaho, iyo yitwa ikipe y’igihugu uwo ishingiyeho urumva uwo ari we. Ni iya guverinoma nyine nicyo bivuga, ku buryo mu rwego rwa tekinike no kuyireberera, ni federasiyo igomba kubikora.”

Umuyobozi wa FERWAFA yavuze kugira ngo ibibazo by’imikino ku makipe y’Igihugu bikemuke bizasaba ko buri ruhande rurebwa nabyo hagati ya Federasiyo na Minisiteri ya Siporo rukora inshingano zarwo uko bikwiye, ndetse bakabaho no guhuza mu igenamigambi.

Ati “No mu itegeko rigenga siporo baravuga inshingano za Minisiteri ihagarariye guverinoma, baravuga inshingano za Federasiyo ku ikipe z’igihugu zose. Uko guhuza ibikorwa byose iyo bidahura neza ni aho bipfira. Hakagombye kugaragazwa ingengo y’imari, tukavuga ngo duteganyije ibi, ikipe y’Igihugu y’Abagore izakina imikino runaka, ni ibintu bikorwa kare. Niba bigomba kuva muri Minisiteri, bigomba kuba biteganyijwe mu ngengo y’imari, byagera bakavuga ngo ngaya.”

“Twebwe ibyo tugomba gukora ni ukugaragaza igihe imikino izabera, hagateganywa ibyangombwa. Ikibazo kiba iyo bamwe bavuga ko Minisiteri mudakora ibi ugasanga bamwe turareba hirya, abandi bati ko Federasiyo idakora ibi tukareba hirya, ugasanga turitana ba mwana. Biterwa no kudategura ibintu uko bikwiriye kandi buri wese afitemo uruhare rwe.”

Inama ya Komite Nyobozi ya FERWAFA yateranye tariki ya 4 Nzeri 2020, yanzuye ko muri miliyoni 466.955 Frw agenewe umupira w’abagore, yatanzwe na FIFA muri ibi bihe bya COVID-19, miliyoni 100 Frw agenerwa Amavubi y’Abagore, ikipe nkuru igahabwamo miliyoni 50 Frw.

Mu ngengo y’imari y’agateganyo yari yakozwe na FERWAFA muri uyu mwaka wa 2020, IGIHE yabonye, hari hateganyijwe ko ikipe y’Igihugu y’Abagore izakenera miliyoni 250 Frw.

Amavubi y'Abagore aheruka gukina umukino mpuzamahanga muri Werurwe 2019
Umunyamabanga Uhoraho muri Minisiteri ya Siporo; Shema Maboko Didier, avuga ko bari kuganira na FERWAFA ku buryo Amavubi y'Abagore yakina mu buryo buhoraho
Perezida wa FERWAFA, Rtd Brig Gen Sekamana Jean Damascène avuga ko iyo hari ibidateguwe uko bikwiriye aribwo birangira ikipe y'Igihugu ibuze imikino

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .