Imikino yose ya UEFA Champions League na Europa League yasubitswe kugeza igihe kitazwi

Yanditswe na Eric Tony Ukurikiyimfura
Kuya 1 Mata 2020 saa 08:42
Yasuwe :
0 0

Imikino yose ya UEFA Champions League na Europa League yasubitwe kugeza igihe Impuzamashyirahamwe y’Umupira w’Amaguru i Burayi (UEFA) izafatira ikindi cyemezo kubera icyorezo cya Coronavirus.

Aya marushanwa yombi yari ageze muri 1/8 ubwo yasubikwaga mu kwezi gushize mbere y’uko hakinwa imwe mu mikino yo kwishyura.

Inama yahuje abanyamuryango ba UEFA kuri uyu wa Gatatu tariki ya 1 Mata 2020, hifashishijwe ikoranabuhanga ry’amashusho, yanzuye ko n’imikino y’ibihugu yagombaga kuba muri Kamena, na yo yasubitswe nyuma y’uko Igikombe cy’u Burayi (Euro 2020) kizaba mu 2021.

Umukino wa nyuma wa Champions League n’uwa Europa League, yari iteganyijwe mu kwezi gutaha kwa Gicurasi, tariki ya 30 n’iya 27, yombi yamaze kwimurwa.

Umuyobozi mukuru wa UEFA, Aleksander Čeferin, aherutse gutangariza Le Repubblica yo mu Butaliyani ko gahunda ziri kurebwa ari ukuba imikino yasubukurwa muri Gicurasi hagati, muri Kamena cyangwa mu mpera za Kamena.

Yavuze ko kandi no kuba imikino isigaye yakinirwa mu muhezo, ari ubundi buryo bushobora gutekerezwaho.

RB Leipzig, Atalanta, Atlético Madrid na Paris Saint-Germain ni yo makipe yamaze kubona itike ya ¼ cya UEFA Champions League mu gihe hasigaye kuba imikino yo kwishyura ya 1/8 hagati ya Manchester City na Real Madrid, Juventus na Lyon, FC Barcelona na Napoli ndetse na Bayern Munich na Chelsea.

Muri Europa League, hakinwe imikino itandatu ibanza ya 1/8 mu gihe indi ibiri yasubitswe kubera Coronavirus.

Liverpool yegukanye UEFA Champions League ya 2019 itsinze Tottenham ku mukino wa nyuma
Chelsea iri gukina Champions League uyu mwaka, yatwaye Europa League ya 2019 itsinze Arsenal ku mukino wa nyuma wabereye i Baku muri Azerbaijan

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .