Imikino ya Shampiyona y’u Bwongereza izajya ibera mu muhezo

Yanditswe na Eric Tony Ukurikiyimfura
Kuya 12 Werurwe 2020 saa 06:55
Yasuwe :
0 0

Imikino yose ya Shamiyona y’Icyiciro cya Mbere mu Bwongereza, Premier League, byitezwe ko izajya ibera mu muhezo, nta bafana bari ku kibuga, mu rwego rwo kwirinda ikwirakwizwa ry’icyorezo cya Coronavirus.

U Bwongereza ni kimwe mu bihugu byamaze kugaragaramo iyi ndwara ikomeje kuvugwa ku Isi yose, aho abasaga 500 bamaze kuyandura.

Ikinyamakuru The Times, cyatangaje ko shampiyona y’uyu mwaka w’imikino mu Bwongereza izakomeza nk’uko ipanzwe, ariko imikino ikazajya ibera mu muhezo, nta bafana bari ku kibuga.

Abafana baguze amatike yo kureba imikino, bazashyirirwaho uburyo bubafasha kuyirebera kuri Internet bari mu ngo zabo mu gihe habujijwe kwerekanira impira ahantu hahurirwa n’abantu benshi.

Iki cyemezo gishobora gutangazwa kuri uyu wa Kane nyuma y’inama ihuza abayobozi bakuru muri guverinoma y’iki gihugu.

Abayobozi ba Premier League n’ibindi byiciro by’umupira w’amaguru mu Bwongereza bakomeje ibiganiro na guverinoma yaho kugira ngo hafatwe ibyemezo byatuma hirindwa ikwirakwira rya coronavirus.

Umukino wa Shampiyona wagombaga guhuza Arsenal na Manchester City ejo hashize, ku wa Gatatu, wasubitswe nyuma y’uko biketswe ko abakinnyi ba Arsenal baba baregereye uwanduye Coronavirus.

Abantu umunani bo muri Arsenal bashyizwe mu kato nyuma yo kuba barahuye n’Umuyobozi wa Olympiacos, Evangelos Marinakis, byagaragaye ko yanduye iki cyorezo, akaba yaritabiriye umukino wa Europa League wabaye mu kwezi gushize.

Abakinnyi ba Arsenal na West Ham ziheruka guhurira mu mukino wa Shampiyona ku wa Gatandatu, basabwe kuba bagumye mu rugo kugira ngo hirindwe icyo cyorezo.

Kugeza ubu umukinnyi ukomeye umaze kugaragarwaho na Coronavirus, ni myugariro wa Juventus, Daniele Rugani.

Abakinnyi batatu ba Leicester City bashyizwe mu kato mu gihe Chelsea yasubitse imyitozo kubera iki cyorezo.

Ibikorwa by’imikino mu Butaliyani byamaze guhagarikwa kugeza tariki ya 3 Mata mu gihe na Shampiyona ya Espagne, La Liga, na yo yabaye ihagaritswe.

Imikino imwe ya Europa League yamaze gusubikwa mu gihe indi ibera mu muhezo kuri uyu mugoroba.

Impuzamashyirahamwe y’Umupira w’Amaguru i Burayi, UEFA, yatangaje ko ku wa Kabiri utaha, tariki ya 17 Werurwe, hazaba inama yo kwiga uburyo amarushanwa yayo yakomeza kubamo cyangwa agahagarikwa. Ikazakorwa hifashishijwe amashusho (video conference).

Imikino itatu muri ine ya 1/8 yo kwishyura izakinwa mu Cyumweru gitaha muri UEFA Champions League, izakinwa mu muhezo.

Imikino ya Shampiyona y’u Bwongereza, Premier League, izajya ibera mu muhezo kugira ngo hirindwe Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza