00:00:00 IGIHE NETWORK KN KINYARWANDA EN ENGLISH FR FRANCAIS

Imikino y’abakanyujijeho igeze aharyoshye; amakipe yatangiye gusezererwa

Yanditswe na Ntabareshya Jean de Dieu
Kuya 4 July 2022 saa 05:26
Yasuwe :

Imikino y’abakanyujijeho mu mupira w’amaguru mu Rwanda yateguwe mu rwego rwo kwishimira ibyo u Rwanda rwagezeho mu myaka 28 ishize u Rwanda rwibohoye igeze ahakomeye, aho amakipe yatangiye gukuranamo.

Iyi mikino yateguwe mu Irushanwa ryiswe “Rwanda Re-birth Celebrations’’ ryateguwe na Sosiyete ya East Gold.

Ni imikino yitabiriwe n’amakipe atandukanye yiganjemo bamwe mu bakinnyi bakanyujijeho muri ruhago y’u Rwanda haba mu cyiciro cya mbere n’icya kabiri barimo Ngabo Albert ukinira Green Team, Peter Otema wa Muyange FC, Gakara Abdoul na Mwiseneza Djamal wa Gikundiro Forever FC.

Irushanwa ritangira, amakipe yashyizwe mu matsinda ane, ahura mu mikino igamije kumenya abiri ashobora kuzamuka muri buri tsinda agahurira muri ¼ cy’irangiza.

Kugeza ubu imikino yo mu matsinda yarangiye ku makipe amwe n’amwe kuko buri kipe yakinnye imikino yayo itatu yari iteganyijwe.

Amakipe yasezerewe kugeza ubu uhereye ku miterere y’amatsinda arimo ayo mu rya kabiri nk’iy’Abafana ba Arsenal n’iy’Abafana ba Liverpool mu Rwanda; ayakomeje ni Akadege FC na ASG.

Mu itsinda rya gatatu hakomeje Ikipe ya Domino Fc yaranzwe no gutsinda ibitego byinshi muri iri rushanwa kimwe na Nunga FC yaranzwe no kwihagararaho mu gihe Black Jaquar na Amis Sportifs zasezerewe.

Mu itsinda rya kane kandi amakipe yakomeje arangajwe imbere na ASV na Muyange FC yo mu Karere ka Bugesera ikinamo Peter Otema wakanyujijeho mu mupira w’amaguru mu Rwanda ikayoborwa na Salongo n’aho Chelsea Fan na Etoile de Gisasa ntizahiriwe n’urugendo.

Ahasigaye amatsiko menshi yo kumenya ikipe ebyiri zizamuka ni mu itsinda rya mbere ryanafatwaga nk’iry’urupfu muri iyi mikino ahategerejwe kumenya amakipe abiri azazamuka hagati ya AS Bakunda, Technicien FC, Gikundiro Forever na Green Team ikinamo Ngabo Albert.

Ikipe igomba kuzamuka izamenyekana mu cyumweru gitaha mu gihe As Bakunda na Green Team baba zamaze gusubiramo umukino wa mbere wari wazihuje Bakunda igatsindwa ibitego 13 ariko bikaza kugaragara ko Green Team yakinishije umuzamu utaruzuza imyaka amaze ahagaritse gukina nk’uko biteganywa n’amategeko agenga irushanwa.

Iri rushanwa ryatangiye ku wa Gatandatu, tariki ya 11 Kamena 2022 riteganyijwe gusozwa ku wa 2 Nyakanga ariko riza kwigizwa inyuma kuko rizasozwa mu ntangiriro za Kanama 2022.

Umuyobozi wa East Gold, Rwigema Gideon, aherutse kubwira iGIHE ko ari irushanwa rizajya ritegurwa buri mwaka mu rwego rwo gusabana no kongera kurushaho kubaka umubano hagati mu Banyarwanda binyuze mu mikino.

Ati “Dutekereza iri rushanwa, byahereye kuko Abanyarwanda babagaho mbere ya Jenoside yakorewe Abatutsi. Dusanga ubumwe n’umubano ntiwari mwiza nk’uko ubu turi ari na yo mpamvu twaryise ukongera kuvuka k’u Rwanda.”

Nshimiyimana Emmanuel uzwi nka Matic uri mu bakunzi ba ruhago mu Rwanda akaba n’umwe mu bayobozi ba East Gold, yavuze ko kugira amarushanwa nk’aya bizafasha mu gukomeza umujyo wo kugumana siporo ku bantu batabigize umwuga ndetse n’abakanyujijeho cyane ko u Rwanda rufite gahunda yo kwakira imikino y’Igikombe cy’Isi cy’abahoze bakina mu 2024 bishobora kuzafasha bamwe mu bakinnyi bakanyujijeho kongera kwigaragaza bakifashishwa.

Nyuma yo gusoza imikino, amakipe ane ya mbere agomba guhembwa azashyikirizwa ibihembo byayo mu gitaramo kizaba ku wa 8 Kanama 2022 aho abacyitabiriye bazasusurutswa n’umuhanzi The Ben.

Ni irushanwa riteganyijwemo ibihembo bitandukanye aho ikipe ya mbere izahabwa igikombe n’ibihumbi 500 Frw, iya kabiri ihabwe ibihumbi 300 Frw, iya gatatu izahabwa ibihumbi 200 Frw mu gihe ikipe ya kane izahabwa ibihumbi 100 Frw.

Rwanda Rebirth Celebrations yateguye kandi amarushanwa atandukanye arimo imikino ya Basketball y’abakanyujijeho, Volleyball n’umukino wo gusiganwa ku magare.

Iyi mikino ihuza abakinnyi bakanyujijeho mu myaka yo hambere
Ni imikino ihuza abakanyujijeho
Abazamu bariteguye muri iri rushanwa
Imikino y’abakanyujijeho igeze aharyoshye ndetse amakipe yatangiye gusezererwa
Ikipe ya Technicien FC iri mu itsinda rya mbere
Ikipe ya Black Jaquar yasezerewe muri aya marushanwa
Green Team itegereje umukino wa nyuma uzayihuza na AS Bakunda
Gikundiro Forever FC itegereje ibizava mu mukino wa nyuma uzahuza AS Bakunda na Green Team
Domino FC iri mu makipe yatsinze ibitego byinshi
AS Bakunda y'i Gikondo na yo iracyafite amahirwe yo kuzamuka muri iyi mikino

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .