Aya mategeko azwi nka "Financial Fair Play Regulations" cyangwa "FFP" yashyizweho n’Impuzamashyirahamwe y’Umupira w’Amaguru i Burayi (UEFA) cyangwa za shampiyona mu bihugu bitandukanye, mu rwego rwo kugira ngo amakipe adakoresha amafaranga menshi aruta yo yinjiza, mu gushaka intsinzi, bityo akaba yagwa mu gihombo.

Abahanga bagaragaza ko ibyo bitabayeho, wasanga nk’ikipe imwe ishobora kwigwizaho abakinnyi bose bakomeye kuko yabonye uyishoramo imari, ikaba yajya ihora iri hejuru y’izindi zose.

Muri Shampiyona y’u Bwongereza ni byo bita "Premier League’s Profit and Sustainability Rules (PSR)".

Muri Gashyantare 2023, Premier League yatangaje ko Ikipe ya Manchester City ikurikiranyweho kurenga kuri aya mategeko agena ikoreshwa ry’umutungo inshuro zirenga 100.

Hari nyuma y’uko iperereza ryakozwe na komisiyo yigenga mu gihe cy’imyaka ine, ryagaragaje amakosa yakozwe na Manchester City yarenze ku mategeko hagati 2009 na 2018.

Iyi komisiyo yashinje kandi Manchester City ko itigeze iyorohereza mu mikoranire kuva iperereza ritangiye mu Ukuboza 2018.

Nyuma y’igihe hibazwa uko bizagenda, kera kabaye urubanza rw’impande zombi ruratangira kuri uyu wa Mbere kugira ngo Manchester City igaragaze ibimenyetso byerekana ko yera kuri ibi birego ishinjwa.

Ni urubanza rubera mu ibanga kuko rutari mu nkiko zisanzwe ndetse abarufitemo uruhare bashobora no kuruburana bari ahantu hatandukanye, ahubwo hakifashishwa amashusho.

Manchester City yatwaye igikombe cya munani cya Premier League muri Gicurasi kuva mu 2008 iguzwe na Sosiyete ya Abu Dhabi United Group ya Sheikh Mansour bin Zayed bin Sultan Al Nahyan, izaba yunganirwa na Lord Pannick KC.

Uyu mugabo ni we wayifashije kwigaranzura ibihano byo kutitabira amarushanwa y’u Burayi imyaka ibiri, yari yafatiwe na UEFA mu 2020 ndetse yabaye umujyanama wa Boris Johnson wigeze kuba Minisitiri w’u Bwongereza.

Bivugwa ko muri uru rubanza, Lord Pannick KC yaciye Manchester City 5000£ (hafi miliyoni 9 Frw) kuri buri saha azayiburanira.

Ku rundi ruhande, hari amakuru avuga ko Adam Lewis KC ari we ushobora kuyobora abo ku ruhande rwa komisiyo yigenga ya Premier League. Gusa mu kirego giheruka ku ikipe ya Everton, Premier League yari yahaye akazi kompanyi ya Linklaters ikorera i Londres.

Amakuru avuga ko muri uru rubanza rushobora kumara ibyumweru 10, City yiteguye guhakana ibirego byose ishinjwa birimo gutanga amafaranga arenga ayo yari yemerewe mu kugura abakinnyi bayifashije kwigarurira Premier League.

Ikirego cya Premier League kiri gukurikiranwa na komisiyo yayo yigenga, cyitezweho gushingira ku mafaranga Sosiyete ya Abu Dhabi yashoye mu ikipe, amwe akitwa ayinjiye binyuze mu bufatanye cyangwa gutera inkunga, hagamijwe kuzamura umutungo wayo no kuyifasha gushora menshi ku buryo itagongwa n’amategeko.

Mu birego bitari munsi ya 54 mu 115 iyi kipe ishinjwa, City ntiyigeze igaragaza amakuru ya nyayo ku mafaranga yinjije. Ibimenyetso bimwe bikaba bishobora kuboneka bivuye kuri ‘email’ zabonywe n’urubuga rwa “Football Leaks” rw’Umunya-Portugal Rui Pinto, nk’uko byashyizwe hanze n’ikinyamakuru cyo mu Budage, Der Spiegel mu 2018.

Amakuru avuga ko uyu Munya-Portugal w’umuhanga mu gukoresha mudasobwa, asigaye aba mu nzu y’ibanga ku bw’umutekano we kuko benshi barimo Ikipe ya Manchester City bamubonamo ikibazo. Ibyo yashyize hanze ni byo byatumye iyi kipe ikurikiranwa na UEFA yayihagaritse mu marushanwa y’u Burayi mu gihe cy’imyaka ibiri.

Gusa icyo gihano cyakuweho mu 2020 n’Urukiko Nkemurampaka rwa Siporo ku Isi (CAS) rwanzuye ko bimwe mu byaha byabaye kera ugereranyije n’imyaka itanu UEFA ikunze kugenderaho.

Kuri iyi nshuro, igihe ntacyo cyafasha iyi kipe kuko nta gihe ntarengwa kiri ku bimenyetso bizagaragazwa na Premier League. Gusa bizeye ko bashobora gutsinda, bakikura mu gicucu bamazemo imyaka ibiri kuva bitangajwe ko hari ibyo bashinjwa.

Umunya-Portugal Rui Pinto yashyize hanze amabanga ya Manchester City yari kuri email mu 2018, bituma ifatirwa ibihano na UEFA nubwo byakuweho na CAS mu 2020

Muri Gashyantare 2023, abafana ba Manchester City bamanitse icyapa kigaragaza ko Pannick yiteguye kongera kubaburanira

Mu birego bya Premier League harimo umunani bijyanye n’amafaranga yakoreshejwe ku batoza kuva mu mwaka w’imikino wa 2009/10 kugeza mu wa 2012/13 ubwo iyi kipe yatozwaga na Roberto Manchini.

Zimwe mu mpapuro zagiye hanze zagaragajwe na Der Spiegel zerekanye ko City yahembaga Mancini umushahara wa miliyoni 1.4£ hakuweho umusoro, ariko na kompanyi y’uyu mutoza mu Butaliyani ikerekana ko yishyurwaga miliyoni 1.75£ buri mwaka kubera gukora nk’umukozi udahoraho mu Ikipe ya Al Jazira yo muri Abu Dhabi, akabikora iminsi ine mu mwaka.

Izo mpapuro zivuga ko Mancini yagombaga kugira ibanga amasezerano ya Al Jazira. Ibi bisa n’aho bigaragaza ko City yishyuraga Mancini inshuro ebyiri, ariko bikanyuzwa ahandi kugira ngo igabanye igihombo inakwepa amategeko agena ikoreshwa ry’umutungo.

Ku bijyanye n’abakinnyi, Football Leaks yagaragaje ko Yaya Touré yahembwe miliyoni 3.3£ inshuro ebyiri ku mpera z’umwaka w’imikino wa 2009/10 na 2010/11, akamugeraho avuye muri Abu Dhabi. Kuva iyi kipe ishinjwa iki cyaha kugeza mu 2016, bivuze ko bishobora kuba byarabaye kenshi.

Muri make, mu byaha 115 Manchester City ishinjwa harimo 54 byo kutagaragaza amakuru y’ukuri ku ikoreshwa ry’umutungo wayo mu gihe cy’imyaka icyenda na 14 byo kunanirwa kugaragaza uburyo yishyuyemo abakinnyi kuva mu 2009/10 kugeza mu 2017/18.

Hari kandi bitanu byo kutubahiriza amategeko ya UEFA arimo ajyanye n’ikoreshwa ry’umutungo (FFP) hagati ya 2013/14 na 2017/18, birindwi byo kurenga ku mabwiriza ya Premier League ajyanye n’ikoreshwa ry’umutungo kuva mu 2015/16 kugeza mu 2017/18 na 35 byo kutorohereza abakoze iperereza mu Ukuboza 2018 na Gashyantare 2023.

Ku rundi ruhande, Manchester City yatangaje ko yiteguye kugaragaza ukuri ku byo ishinjwa, gusa icyibazwa ni ibimenyetso ifite byanyomoza ibirimo ibyagaragajwe na Football Leaks.

Mu gihe iyi kipe yahamwa n’ibyaha ishinjwa, ishobora gukurwaho amanota cyangwa ikirukanwa muri Premier League, ikamanurwa mu bindi byiciro. Kuri bamwe bo mu mupira w’amaguru, basanga mu gihe umwanzuro waba utangajwe, gushyirwa mu bikorwa bishobora gufata imyaka kuko hazabaho no kujurira.

Nta gihe cyizwi umwanzuro ugomba kuba watangajwe, ariko hari abagereranya mu ntangiriro za 2025.

Manchester City iraburana na Premier League mu rubanza rushobora kuzasiga ikuweho amanota cyangwa ikamanurwa mu byiciro byo hasi

Pinto washinze urubuga rwa Football Leaks, yagaragaje ko hari amafaranga Mancini yahabwaga binyuze mu Ikipe ya Al Jazira na yo ya Abu Dhabi United Group

Yaya Touré na we agarukwaho mu bahembwaga mu byiciro bitandukanye kugira ngo bitagaragara ko ikipe isohora amafaranga menshi kurusha uko byakabaye bikorwa