Imbamutima za Omborenga Fitina wabaye umukinnyi w’umukino muri CHAN 2020

Yanditswe na Eric Tony Ukurikiyimfura
Kuya 19 Mutarama 2021 saa 05:24
Yasuwe :
0 0

Myugariro w’iburyo w’Ikipe y’Igihugu ‘Amavubi’, Omborenga Fitina, yavuze ko afite intego yo kwitwara neza muri buri mukino nyuma yo gutorwa nk’uwahize abandi bakinnyi mu mukino wo mu itsinda C wahuje u Rwanda na Uganda ku wa Mbere muri CHAN 2020.

U Rwanda rwanganyije na Uganda ubusa ku busa, ruzasubira mu kibuga ku wa Gatanu, ruhura na Maroc ifite irushanwa riheruka ryabaye mu 2018, ubwo yari yaryakiriye.

Myugariro w’u Rwanda, Omborenga Fitina, watowe nk’umukinnyi w’uyu mukino, yavuze ko afite intego zo kwitwara neza mu irushanwa ryose.

Ati “Mu by’ukuri ni umukino wari ukomeye, wasabaga kwitanga ku mpande zombi. Ntabwo wari woroshye kandi nishimiye kuba umukinnyi w’umukino. Ubusanzwe naje hari intego mfite muri njye, yo kujya nitwara neza muri buri mukino.”

Agaruka ku mvune yagize mbere y’uko iri rushanwa ritangira mu cyumweru gishize, Omborenga Fitina yavuze ko kuri ubu ameze neza kuko yari yasabwe kuruhuka.

Ati “Akabazo ko nari nakagize, ariko ntabwo byari bikomeye cyane. Ni ikibazo cyari cyoroshye, nasabwaga kumara umunsi cyangwa ibiri ubundi nkakomeza imyitozo.”

Omborenga Fitina yakinnye bwa mbere Shampiyona Nyafurika ihuza abakinnyi bakina imbere mu bihugu byabo (CHAN) mu 2016, ubwo yakiniraga Kiyovu Sports.

Nyuma y’aho yashimwe na Topvar Topoľčany yo muri Slovakia, ayikinira umukino umwe mbere yo kujya muri APR FC akinira guhera mu mwaka w’imikino wa 2017/18. Ni ku nshuro ya gatatu ari gukina irushanwa rya CHAN.

Omborenga Fitina yatowe nk'umukinnyi w'umukino wahuje u Rwanda na Uganda ku wa Mbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .