Imbamutima za Nizeyimana Mirafa wahembwe nk’umukinnyi w’ukwezi wa Rayon Sports (Amafoto)

Yanditswe na Eric Tony Ukurikiyimfura
Kuya 16 Ugushyingo 2019 saa 07:25
Yasuwe :
0 0

Uruganda rwenga ibinyobwa ‘Skol Brewery Ltd Rwanda’ rufatanyije n’itsinda ry’abafana ba Rayon Sports rya ‘March’ Generation’ bahembye Nizeyimana Mirafa ukina hagati nk’umukinnyi witwaye neza kurusha abandi mu Ukwakira 2019.

Iki gikorwa cyo guhemba abakinnyi ba Rayon Sports buri kwezi cyatangijwe n’itsinda ry’abafana rya ‘March Generation’ giterwa inkunga n’Uruganda rwa Skol.

Kuri uyu wa Gatandatu nibwo hahembwe umukinnyi witwaye neza mu kwezi gushize k’Ukwakira, igikorwa cyabereye kuri La Palisse Hotel i Nyandungu.

Igihembo, ibahasha y’ibihumbi 100 Frw, igikapu na écouteurs za Skol ni byo byahawe uyu mukinnyi ukina hagati, imbere ya ba myugariro, Nizeyimana Mirafa, wahigitse bagenzi be barimo Umunyezamu Kimenyi Yves na Mugisha Gilbert ukina hagati asatira izamu.

Nyuma yo gushyikirizwa igihembo, Nizeyimana Mirafa, yagaragaje ko abyishimiye, avuga ko ari ubwa mbere abigezeho.

Ati ”Mbere na mbere ndashimira abatanga iki gihembo, SKOL na March’ Generation, ndashimira kandi ubuyobozi, abatoza n’abakinnyi bagenzi banjye twafatanyije. Ndishimye cyane kuko ni ubwa mbere ibi bimbayeho kuva ntangiye gukina umupira, nzakomeza kwitwara neza.”

Perezida wa Rayon Sports, Munyakazi Sadate, wamushyikirije iki gihembo, yamushimiye uko amaze iminsi yitwara ndetse n’abashyizeho igihembo cy’umukinnyi w’ukwezi.

Iki gihembo ni icya mbere gitanzwe muri uyu mwaka w’imikino wa 2019/20, aho igiheruka cyatanzwe muri Nyakanga, cyahawe Iradukunda Eric ‘Radu’ ubwo Michael Sarpong yatorwaga nk’umukinnyi w’umwaka wa Rayon Sports muri Kanama.

Iki gikorwa kiba buri kwezi mu rwego rwo gutera ingabo mu bitugu abakinnyi ba Rayon Sports bitwaye neza, hashishikarizwa n’abandi gukomeza kwitwara neza kuko aribyo bikomeza guha amahirwe ikipe kwitwara neza mu mikino ikina yose.

Nizeyimana Mirafa yashyikirijwe igihembo na Perezida wa Rayon Sports Munyakazi Sadate na Tuyishime Karim ushinzwe Imenyekanishabikorwa muri SKOL
Igihembo cyahawe Nizeyimana Mirafa
Perezida wa Rayon Sports Munyakazi Sadate yashimiye Mirafa uko ari kwitwara nyuma yo kugera muri iyi kipe
Umutoza wa Rayon Sports, Javier Martinez Espinoza na we yari yitabiriye uyu muhango
Nizeyimana Mirafa yicaranye na myugariro Rugwiro Hervé
Niyomwungeri Mike ukina mu kibuga hagati
Abafana ba Rayon Sports bifotozanyije n'abakinnyi bitabiriye uyu muhango
Abafana ba Rayon Sports baryohewe n'ibinyobwa bya SKOL
Super Manager na we yashimiwe n'Umuyobozi wa Rayon Sports uburyo bakomeje gukorana

Amafoto: Umurerwa Delphin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza