Imbamutima za Mvuyekure wongeye guhamagarwa mu Mavubi nyuma y’imyaka ine ayaciwemo

Yanditswe na Eric Tony Ukurikiyimfura
Kuya 14 Werurwe 2019 saa 10:10
Yasuwe :
0 0

Umunyezamu w’ikipe ya Tusker FC yo muri Kenya, Mvuyekure Emery, yashimishijwe no kongera guhamagarwa mu Ikipe y’Igihugu ‘Amavubi’ yari amaze imyaka ine adakandagizamo ikirenge.

Mvuyekure yongeye guhamagarwa mu Mavubi ku wa Mbere w’iki cyumweru, ubwo Umutoza Mashami Vincent yatangazaga ikipe y’igihugu izakora umwiherero yitegura umukino wa Côte d’Ivoire uzaba tariki ya 23 Werurwe i Abidjan.

Uyu munyezamu wakiniraga Police FC icyo gihe, yaherukaga guhamagarwa mu ikipe y’igihugu yagombaga gukina umukino wa gicuti na Afurika y’Epfo tariki 28 Nyakanga 2015 ariko uwari umuyobozi wa Ferwafa, Nzamwita Vincent De Gaulle, yemeza ko atazongera guhamagarwa kubera imyitwarire mibi yagaragaje imbere y’abatoza ubwo biteguraga umukino na Mozambique muri Kamena uwo mwaka.

Icyo gihe Mvuyekure ntiyishimiye ko yari amaze kubwirwa ko atajyana na bagenzi be maze akubita agacupa k’amazi hasi, aho Nzamwita Vincent de Gaule yavuze ko bigendanye n’amakosa yakoze agomba kuzandika ibaruwa asaba imbabazi akabona kugaruka mu ikipe y’igihugu.

Uyu munyezamu yavugaga ko atiyumvisha ikosa yakoze ryatuma asaba imbabazi mu gihe muri Mata 2017, Higiro Thomas utoza abanyezamu b’ikipe y’igihugu yavuze ko Mvuyekure wakiniraga APR FC, afite umuziro wo guhamagarwa mu Mavubi.

Nyuma y’umwaka Nzamitwa avuye muri FERWAFA, akongera guhamagarwa mu ikipe yitegura umukino wa Côte d’Ivoire uzaba mu cyumweru gitaha, Mvuyekure yabwiye IGIHE ko byamushimishije cyane ndetse yiteguye gukora cyane akazakina uyu mukino.

Ati “Kuba nongeye kugirirwa icyizere nkaba nahamagawe na none mu ikipe y’igihugu byashimishije cyane, ni ishema kuba uri umukinnyi ukinira ikipe y’igihugu gusa si ku bwanjye ni Nyagasani ubimfashijemo. Intego mfite ni uko umukino wa Côte d’Ivoire nawukina nanjye kandi nkatanga umusaruro mwiza.”

Mvuyekure washavuzwaga no kuba atarakiniraga igihugu cye nyamara ahagaze neza, yavuze ubwo yageraga muri Kenya muri uyu mwaka w’imikino, abenshi babanje kumusuzugura bitewe n’uko angana, ariko ngo gukora cyane byamufashije kubereka ko ari umunyezamu mwiza.

Ati “Muri kenya byabanje kungora cyane kubera umubiri wanjye muto. Barambonaga bakavuga ngo uyu si umuzamu gusa ibyo byanteraga imbaraga zo gukora cyane kugeza aho natangiye gukina ndabatungura ku buryo ubu nafashe umwanya, maze gukina imikino yose 16.”

Mvuyekure ni umwe mu banyezamu beza bari muri shampiyon ya Kenya, aho amaze gukina imikino yose 16 ikipe ya Tusker FC yakinnye muri uyu mwaka w’imikino. Ikipe ye ni iya gatatu mu zinjijwe ibitego bike.

Uyu myunyezamu amaze gutsindwa ibitego ibitego 13 mu gihe imikino itandatu ariyo atigeze yinjizwamo igitego na kimwe. Tusker FC iri ku mwanya wa gatandatu n’amanota 25, ifite umukino w’ikirarane izakina mu mpera z’iki cyumweru.

Mu ikipe y’igihugu yahamagawe, azahanganira umwanya na Kimenyi Yves wa APR FC, wafashe imikino ibiri Amavubi aherukaga gukina ndetse n’umunyezamu wa Mukura Victory Sports, Rwabugiri Ndayisenga Omar.

Mvuyekure Emery yishimiye kuba agiye kongera gukinira ikipe y'igihugu yaherukaga guhamagarwamo muri Kamena 2015
Mvuyekure Emery afite umwanya uhoraho muri Tusker FC
Mvuyekure Emery uri kwitwara neza muri Kenya yari amaze imyaka ine adahamagarwa mu Mavubi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza