Ikipe ya Rwatubyaye ntiyifuza ko yitabira ubutumire bw’Amavubi azakina na Côte d’Ivoire

Yanditswe na Eric Tony Ukurikiyimfura
Kuya 13 Werurwe 2019 saa 11:52
Yasuwe :
0 0

Sporting Kansas City yo muri Shampiyona ya Major League Soccer ya Amerika, yasabye Ishyirahamwe ry’umupira w’Amaguru mu Rwanda, FERWAFA, ko ryakwihanganira umukinnyi Rwatubyaye Abdul ntiyitabire ubutumire bw’ikipe y’igihugu yitegura guhura na Côte d’Ivoire mu cyumweru gitaha.

Nk’uko Rutayisire Jackson ushinzwe Ikipe y’Igihugu yabitangarije IGIHE, Sporting Kansas City yabandikiye ibasaba kureka Rwatubyaye akabanza akamenyerana na bagenzi be kuko aribwo akigera muri Amerika, ariko nabo babagaragariza ko bamukeneye.

Rutayisire yagize ati “Nibyo ikipe yaratwandikiye ibidusaba, bavuga ko umukinnyi ataramenyera ku buryo guhita agaruka aribwo akigerayo bigoye, gusa natwe twababwiye ko ari umukinnyi dukeneye, dutegereje icyo badusubiza uyu munsi.”

Mu ntangiriro z’ukwezi gushize nibwo Sporting Kansas City yatangaje ko yamaze kugura uyu myugariro wakiniraga Rayon Sports.

Rwatubyaye wahawe nimero eshatu, yari amaze igihe gito ageze muri Leta Zunze Ubumwe za Amerika nyuma yo gutinzwa no kubona ibyangombwa. yagaragaye ku mukino iyi kipe ye nshya yatsinzemo Philadelphia ibitego 2-0 ku Cyumweru.

Ku wa Mbere w’iki Cyumweru, yahamagawe muri 27 bagomba kwitabira umwiherero w’ikipe y’igihugu ‘Amavubi’ izakina na Côte d’Ivoire tariki ya 23 Werurwe i Abidjan mu gushaka itike ya CAN 2019 izabera mu Misiri n’ubwo u Rwanda rwamaze gusezererwa.

Ubuyobozi bwa FERWAFA buvuga ko mu gihe Rwatubyaye yaba atabashije kuza n’ubwo amategeko ya FIFA asaba amakipe kurekura abakinnyi mu gihe nk’iki baba bakenewemo n’ibihugu byabo, bazashaka uburyo bifashisha abandi bakinnyi.

Kuri uyu wa Kane, Sporting Kansas City izakira Independiente mu mukino wo kwishyura wa ¼ cya Scotiabank CONCACAF Champions League uzabera kuri Children’s Mercy Park. Umukino ubanza batsinzwe ibitego 2-1.

Rwatubyaye mu mwambaro w'ikipe ya Sporting Kansas City
Rwatubyaye agerageza guhagarika Naby Keita wa Guinea na Liverpool
Uyu myugariro yahamagawe mu Ikipe y'Igihugu yitegura gukina na Côte d’Ivoire

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza