Ikipe ya Namibia yari guhura n’Amavubi yahagaritse imyitozo kubera COVID-19

Yanditswe na Eric Tony Ukurikiyimfura
Kuya 2 Mutarama 2021 saa 07:16
Yasuwe :
0 0

Ikipe y’Igihugu ya Namibia ‘Brave Warriors’ yari guhura n’iy’u Rwanda mu mikino ya gicuti igamije kwitegura Shampiyona Nyafurika y’abakinnyi bakina imbere mu bihugu byabo (CHAN 2020) yahagaritse imyitozo kubera ubwandu 11 bwa COVID-19 bwayigaragayemo.

Brave Warriors yatangiye imyitozo tariki ya 8 Ukuboza 2020, ariko yabaye iyihagaritse nyuma y’uko ibipimo bya COVID-19 byafashwe ku wa 29 Ukuboza, byagaragaje ko handuye abakinnyi 10 n’umwe mu bandi bakozi.

Ishyirahamwe ry’Umupira w’Amaguru muri Namibia (NFA) ryahise rifata ingamba zirimo gushyira mu kato bamwe no guhagarika by’agateganyo ibikorwa byo guhurira hamwe kw’abakinnyi.

Ibi bisobanuye ko Namibia itazitabira irushanwa ryari ryateguwe na Minisitiri ya Siporo ku bufatanye na FERWAFA, aho iki gihugu cyari kuzahura n’u Rwanda na Congo Brazzaville mu mikino ya gicuti iteganyijwe hagati ya tariki ya 7 n’iya 11 Mutarama 2021 kuri Stade Amahoro.

Muri CHAN izabera muri Cameroun hagati ya tariki ya 16 Mutarama n’iya 7 Gashyantare 2021, Namibia iri mu itsinda D hamwe na Guinea, Tanzania na Zambia.

Iki gihugu kibaye icya kabiri gihagaritse umwiherero wa CHAN kubera COVID-19 nyuma ya Zimbabwe yagaragayemo abarwayi icyenda.

Namibia yahagaritse imyitozo nyuma y'uko abakinnyi 10 banduye COVID-19
Zimbabwe yabonetsemo ubwandu icyenda bwa COVID-19 na yo yahagaritse imyitozo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .