00:00:00 IGIHE NETWORK KN KINYARWANDA EN ENGLISH FR FRANCAIS

Ikibazo cy’ibibuga abana bakiniramo gikomeje kuba agatereranzamba

Yanditswe na Byiringiro Osée Elvis
Kuya 13 September 2022 saa 09:37
Yasuwe :

Abize mu myaka yo hambere baribuka uburyohe bw’umupira wa karere mu kibuga cy’ibitaka imbere y’amashuri cyangwa inyuma yayo, haba mu gitondo mbere y’amasomo, mu karuhuko ka saa yine cyangwa ku mugoroba.

Abakinnyi bakomeye b’abanyafurika, abenshi usanga bitsa ku gukinira ku ishuri. Mu Rwanda, hari benshi bakina no mu ikipe y’igihugu Amavubi, bemeza ko imikino yo ku mashuri yatumye basobanukirwa impano bifitemo.

Uretse gufasha umwana gusabana n’abandi, gukina ku ishuri bituma umwana yiga neza, akishimira kuba ku ishuri kandi impano ye ikagaragara abatoza bakamufasha kuyikuza akavamo umukinnyi ukomeye uhagararira n’igihugu.

Uyu munsi, uburyohe bw’imikino y’abana mu mashuri bwarayoyotse bitewe n’uko aho bakiniraga hatakibaho naho ibibuga bisigaye ni hake cyane kuko ahatarubatswe amashuri, hatewemo ubusitani.

Si ku mashuri gusa kuko n’ibibuga abana bakiniragaho aho batuye cyangwa hafi yaho, nabyo ibyinshi bisigaye byigishirizwamo imodoka. Urugero ni kuri Tapis Rouge i Nyamirambo, ikibuga cyazamukiyeho abakinnyi benshi ariko uyu munsi kikaba kirirwamo abigisha ibinyabiziga.

Muri Mata uyu mwaka, Inteko Ishinga Amategeko, Umutwe w’Abadepite, basabye ko Minisiteri y’Uburezi yakemura ikibazo cy’ibibuga by’imikino byatewemo indabo hirya no hino ku bigo by’amashuri bikaba bituma abanyeshuri batabona aho bakinira.

Depite Rwaka Pierre Claver yagize ati “Hashize imyaka irenze 10 bahinduye ibibuga by’imikino bateramo indabo. Bavugaga ko [Minisiteri y’Uburezi] bagiye kunoza porogaramu y’ukuntu amasomo atangwa mu byiciro by’amashuri y’incuke, abanza n’ayisumbuye kandi ko icyo kibazo kizakemuka.”

Yakomeje ati “Ikibazo ni uko siporo atari mu magambo gusa, gushyira mu ngiro ibyo abo bana bize mu magambo bazabikorera he kandi ibibuga byuzuye indabo? Ni ikintu gikwiye kubanza gukemurwa abana bakabona aho bakinira.”

Abaturage nabo bakunda kugaragaza ko ari ikibazo giteye inkeke. Uwamahoro Madina utuye mu Kagari ka Nyakabanda I, avuga ko bahangayikishijwe no kuba abana babo nta hantu bakigira bakinira bitewe n’uko ikibuga cya Tapis Rouge cyahinduwe icyo kwigiramo imodoka.

Ati “Muzadukorere ubuvugizi naho ubundi abana bacu nta hantu bakigira ho gukinira umupira. Mbere iyo babaga bari mu biruhuko bajyaga kuri tapis bagakina ariko ubu nta hantu bakibona ho gukinira kuko hariya hamaze kuba aho kwigira imodoka.”

Kanamugire Samuel avuga ko mbere Nyamirambo yavagamo abana bafite impano yo gukina ndetse ubu byahindutse nyuma y’uko tapis rouge ihinduriwe iyo kwigishirizamo imodoka.

Ati “Kera abana bose bafite impano zo gukina umupira bavaga i Nyamirambo ariko ubu siko bikimeze kuko nta bibuga bikihaba.”

Si i Nyamirambo gusa kuko no ku bindi bibuga bitandukanye birimo iby’i Remera usanga byigishirizwamo imodoka.

Uretse aba babyeyi n’abanyeshuri bo mu bigo by’amashuri yisumbuye bavuga ko babangamiwe n’uko abana babo batakigira aho gukinira bitewe n’uko ibibuga byose byubatswemo ibyumba by’amashuri n’ubusitani.

Nkusi Edmond, ushinzwe iterambere ry’umupira w’amaguru mu Ishyirahamwe ry’Umupira w’Amaguru mu Rwanda (Ferwafa), mu kiganiro n’itangazamakuru na Minisiteri ya siporo, mu kwezi gushize yagaragaje ko iki kibazo kibangamiye iterambere rya siporo.

Minisiteri ya siporo ivuga ko ubuvugizi bukenewe kandi ko ikibazo kizwi bari kugikoraho, aho hagiye kubakwa ibikorwaremezo muri buri mudugudu ndetse ko ibiganiro n’abo bireba bose byatangiye.

Kuwa 18 Nzeri 2020, Minisitiri wa Siporo, Munyangaju Aurore Mimosa, yavuze ko bari kuganira na Minisiteri y’Ubutegetsi bw’Igihugu (MINALOC) n’Umujyi wa Kigali kugira ngo muri buri mudugudu habe ibikorwaremezo bya siporo bizafasha abahatuye batagombye kujya kure.

Yagize ati “Turimo kuganira na MINALOC n’Umujyi wa Kigali, kurebera hamwe mu gishushyanyo mbonera uko twabona uburyo twateza imbere cyangwa se twagaragaza ibikorwaremezo bya Siporo, aho bizajya muri buri mudugudu.”

“Ibyo ni ibikorwa turimo kuganira na bo kandi bigeze kure. Turifuza ko noneho muri buri mudugudu, abana batuye mu mudugudu, abantu bakuru batuye muri buri mudugudu, bitazajya bibasaba kujya kure bajya gukora siporo, ahubwo tukabegereza ibikorwaremezo hafi yabo.”

Minisitiri Munyangaju yavuze ko baganiriye kandi na Minisiteri y’Uburezi kugira ngo ku mashuri yubakwa ubu, hajye hazirikanwa ahagenewe ibibuga by’imikino itandukanye kugira ngo abanyeshuri babone aho gukinira, impano zabo zigaragare.

Perezida wa Komisiyo y’Uburezi, Ikoranabuhanga, Umuco n’Urubyiruko, Uwamariya Veneranda, aherutse kuvuga ko iki kibazo Minisiteri y’Uburezi ikizi ikaba yarabwiye komisiyo ko yagifatiye ingamba.

Ati “Icya mbere babanje kutugarargariza ko ikosa ryigeze gukorwa ariko ubu ahagiye kubakwa ibikorwaremezo habanza kwitabwa ku kureba ahazakorerwa ibikorwa bya siporo.”

Yavuze ko mu mirongo Minisiteri y’Uburezi yatanze ari uko amahuri adafite ibibuga bya Siporo ariko akaba yegeranye n’andi abifite agomba kubisaranganya.

Gukoresha ubutaka bwari bugenewe ibibuga by’imikono ku mashuri byatangiye nyuma ya gahunda y’uburezi bw’ibanze bw’imyaka icyenda yaje kwaguka ikaba 12. Guverinoma yatangiye kubaka ibyumba by’amashuri bishya kugira ngo abo bana babone aho bigira. Hamwe harubatswe ubutaka burashira amahitamo asigara ari ukubaka mu bibuga.

Abakuriye i Nyamirambo no mu bice bihakikije baribuka imikino yaberaga kuri Tapis Rouge
Ahahoze ikibuga cyo ku Intwari harimo amashuri

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .