00:00:00 IGIHE NETWORK KN KINYARWANDA EN ENGLISH FR FRANCAIS

Igiterane cyongeye kwimura umukino wa Rayon Sports na Musanze FC

Yanditswe na Byiringiro Osée Elvis
Kuya 18 Mutarama 2023 saa 05:29
Yasuwe :

Umukino w’Umunsi wa 16 wa Shampiyona wagombaga guhuza Rayon Sports na Musanze FC ku Cyumweru, wongeye kwimurwa, kubera igiterane cy’Itorero ry’Abadivantiste giteganyijwe mu mpera z’iki Cyumweru, i Muhanga.

Ku ngengabihe y’isubukurwa rya Shampiyona y’Icyiro cya Mbere, uyu mukino wari uteganyijwe ku wa Gatandatu, tariki 21 Mutarama, mu Karere ka Muhanga. Waje kwimurirwa tariki ya 22 Mutarama kubera ibikorwa biteganyijwe kubera muri iyi stade muri ayo matariki.

Kuri uyu wa Gatatu, Akarere ka Muhanga kongeye kwandikira Rayon Sports kayimenyesha ko no ku Cyumweru iyi stade itazaboneka.

Amakuru agera kuri IGIHE ni uko Stade ya Muhanga itazaboneka kubera igiterane cy’Itorero ry’Abadivantiste b’umunsi wa Karindwi giteganyijwe tariki 21-22 Mutarama 2023.

Kugeza ubu ntiharatangazwa ikindi gihe uyu mukino uzabera.

Rayon Sports ikomeje kwitegura imikino yo kwishyura ya Shampiyona, ari na ko ivugwa ku isoko ryo gushaka rutahizamu wo kubafasha dore ko abo yaguze nka Paul Were, Boubacar Traoré na Moussa Camara badatanga umusaruro bari bitezweho.

Musanze FC zizahura, yo usibye umutoza Frank Ouna utaragaruka mu kazi kugeza ubu, imeze neza ndetse iheruka kongeramo abakinnyi batatu bashya ari bo Bakaki Shafik, Nicholas Ashade Ayomide na Tuyisenge Yasser.

Rayon Sports yasoje imikino ibanza iri ku mwanya wa gatanu n’amanota 28 mu gihe Musanze FC yasoreje ku mwanya wa cyenda n’amanota 22.

Umukino wa Rayon Sports na Musanze FC wari uteganyijwe ku Cyumweru, ugiye kongera kwimurwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .