Igikombe cya Afurika Misiri yatwaye cyaburiwe irengero

Yanditswe na Eric Tony Ukurikiyimfura
Kuya 4 Nzeri 2020 saa 06:08
Yasuwe :
0 0

Igikombe cya Afurika cyahawe Misiri mu 2010 nyuma yo kucyegukana burundu, biravugwa ko cyaburiwe irengero, aho cyari mu biro by’Ishyirahamwe ry’Umupira w’Amaguru muri icyo gihugu (EFA) i Cairo.

Uwahoze ari Visi Perezida wa EFA, Ahmed Shobier, yatangaje ko iki gikombe gifite agaciro kurusha ibindi muri Afurika, cyaburiwe irengero mu buryo butaramenyekana.

Ikipe y’Igihugu ya Misiri ‘Les Pharaohs” yagize ibihe byiza hagati ya 2006 na 2010, itwara Igikombe cya Afurika inshuro eshatu zikurikiranya, byatumye igihabwa burundu.

Gusa, iki gikombe cyatwawe ubwo Misiri yatozwaga na Hassan Shehata mu myaka 10 ishize, cyamaze kuburirwa irengero, aho bikekwa ko cyibwe.

Shobier yabwiye itangazamakuru ryo mu Misiri ko “EFA yatangiye gushaka ibikombe bitandukanye hagamijwe kubishyira mu nzu ndangamateka iri imbere muri EFA.”

“Gusa, EFA yatunguwe no gusanga igikombe cya Afurika cyarabuze ndetse yafashe icyemezo cyo gutangiza iperereza.”

“Bamenyeshejwe n’umwe mu bakora imbere muri federasiyo ko cyari gifitwe na Ahmed Hassan wigeze kuba kapiteni ariko na we yarabihakanye. Kugeza ubu ntawe uzi aho iki gikombe kiri.”

Kuva Misiri itwaye Igikombe cya Afurika burundu mu 2010, ntirongera kucyegukana nubwo yageze ku mukino wa nyuma mu 2017 igatsindwa na Cameroun ibitego 2-1.

Misiri nicyo gihugu kimaze kwegukana Igikombe cya Afurika inshuro nyinshi, aho yagitwaye mu 1957, 1959, 1986, 2006, 2008 na 2010.

Igikombe cya Afurika Misiri yatwaye mu 2010 cyaburiwe irengero

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .