00:00:00 IGIHE NETWORK KN KINYARWANDA EN ENGLISH FR FRANCAIS

Imikino y’Igikombe cya Afurika cy’umupira w’amaguru yigijwe inyuma

Yanditswe na IGIHE
Kuya 3 July 2022 saa 06:30
Yasuwe :

Komite nyobozi y’impuzamashyirahamwe y’Umupira w’Amaguru muri Afurika (CAF), yemeje ko igikombe cya Afurika cy’abagabo cyagombaga kubera muri Côte d’Ivoire muri Kamena na Nyakanga 2023, cyimuriwe muri Mutarama 2024.

Ni icyemezo cyafashwe kuri iki Cyumweru, nyuma y’inama ya Komite Nyobozi ya CAF yateraniye mu mujyi wa Rabat, muri Maroc.

Perezida wa CAF, Patrice Motsepe, yabwiye abanyamakuru kuri iki cyumweru ati "Igikombe cya Afurika cyitiriwe TotalEnergies kizabera muri Côte d’Ivoire kizaba muri Mutarama- Gashyantare 2024, kandi nshimishijwe n’ibikorwa remezo n’inkunga byatanzwe na Perezida Alassane Ouattara, Minisitiri w’Intebe, abagize Guverinoma n’abandi bose muri Côte d’Ivoire, ku buryo mpamya ko irushanwa rizaba ridasanzwe."

Impamvu yatanzwe kuri uku kwimurwa i uko mu mezi ya Kamena na Nyakanga muri Côte d’Ivoire hagwa imvura nyinshi, ishobora kubangamira irushwanwa.

Motsepe yavuze ko hari abantu bagiye bababwira ko imvura ishobora kutaba ikibazo, bityo ko badakwiye gutinya.

Gusa yagize ati "Ariko ntabwo twapfa kubitwara gutyo."

Hari impungenge ko icyemezo nk’iki gishobora gufatwa no ku irushanwa ry’Igikombe cya Afurika rizaba mu 2025, muri Guinea.

Ni ku nshuro ya kabiri CAF ihinduye amatariki y’igikombe cya Afurika.

Igikombe cya Afurika cyagombaga kuba mu 2021 cyaje kwimurirwa muri Mutarama 2022, kubera ko Cameroon nayo itashoboraga kwakira iyi mikino mu mezi ya Kamena - Nyakanga kubera imvura n’icyorezo cya COVID-19.

African Super League

Perezida Motsepe yanatangaje ko hagiye gutangizwa African Super League/ African Football League, izamurikwa ku mugaragaro muri Kanama uyu mwaka, muri Tanzania.

Ni urushanwa ngo rifite abafatanyabikorwa benshi n’abaterankunga, bifuza gushyiramo amafaranga menshi.

Ati "Turimo guteganya ko miliyoni $100 zizatangwa mu bihembo, uzatwara African Super League akazatwara hagati ya miliyoni $11-$12 mu bihembo, hakazaba hari ibihembo byinshi bizatangwa muri za miliyoni $100.”

Muri iryo rushanwa kandi biteganywa ko buri shyirahamwe rigize iyi mpuzamashyirahamwe nyafurika mu bihugu 54 bya Afurika, rizahabwa nibura miliyoni $1 buri mwaka.

Motsepe ati "Izatangwa nk’inkunga mu iterambere ry’umupira w’amaguru, imikino y’abato n’umupira w’amaguru muri rusange, kandi undi musanzu uzajya muri CAF ubwayo, kugira ngo izamure ibihembo bitangwa mu gikombe cya Afurika. Nutwara igikombe cya Afurika, amafaranga twayongereye ubushize, ariko tuzayagira menshi kurushaho."

Kuri uyu wa Gatandatu nibwo byatangajwe ko amafaranga atangwa mu bihembo mu gikombe cya Afurika cy’Abagore yazamutseho 150%, ava ku $975 000 agera kuri $2400 000 – bingana n’izamuka rya miliyoni $1.5.

Motsepe yanavuze ko n’ikipe izatwara CAF Champions League, amafaranga nayo azazamuka ku buryo bugaragara.

Perezida wa CAF, Patrice Motsepe, yijeje ko irushanwa ryo mu 2024 rizaba ridasanzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .