Ifoto y’Umunsi: Nshuti Innocent yishimiye igitego ashimira Kirisitu

Yanditswe na Eric Tony Ukurikiyimfura
Kuya 20 Mutarama 2020 saa 09:45
Yasuwe :
0 0

Rutahizamu wa APR FC, Nshuti Innocent, yishimiye igitego yatsinze Etincelles FC mu mukino w’umunsi wa 18 wa Shampiyona, ashimira Kirisitu avuga ko ari we umushoboza byose.

Uyu mukino wabereye i Rubavu, warangiye APR FC inganyije na Etincelles FC y’abakinnyi 10 igitego 1-1.

Nshuti Innocent yafunguye amazamu ku munota wa 21 ku mupira yahawe na Usengimana Danny ari mu rubuga rw’amahina, ahita awutera mu izamu ryari ririnzwe na Nsengimana Dominique.

Uyu musore w’imyaka 21, yishimiye igitego azamura umupira yari yambaye, agaragaza ubutumwa bwari ku wundi w’imbere, bwagiraga buti ‘’byose mbishobozwa na Kirisitu.’’

Nshuti Innocent watangiye gukinira ikipe y’ingabo mu myaka ine ishize, ubwo yari afite imyaka 17, amaze iminsi agorwa no kubona izamu mu minota abona yo gukina, aho akenshi ajya mu kibuga asimbuye.

Uyu mukinnyi wabanje mu kibuga mu mikino ibiri iheruka, yaherukaga kubona izamu ku mukino w’umunsi wa 10 wa Shampiyona ubwo APR FC yatsindiraga Sunrise FC i Nyagatare ibitego 4-2.

Nshuti Innocent yagarutse muri APR FC mu ntangiriro z’umwaka ushize nyuma y’amezi atandatu yamaze muri Stade Tunisien.

Nshuti yatangiye guhamagarwa mu ikipe nkuru y’igihugu ‘Amavubi’ mu 2017 ndetse ni we wari muto mu bakinnyi b’u Rwanda bakinnye CHAN 2018 yabereye muri Maroc.

Kwishimira igitego abakinnyi bakagaragaza ubutumwa bwanditse ku myambaro y’imbere bimaze kuba umuco muri APR FC, ni nyuma y’uko na Byiringiro Lague yiyambuye umupira nyuma yo gutsinda igitego Rayon Sports ku munsi wa 15 wa Shampiyona.

Kuri uyu mukino kandi, Manzi Thierry na Manishimwe Djabel, bombi bari baje bambaye imipira iriho ubutumwa bwo kwifuriza isabukuru nziza y’amavuko Umuyobozi w’icyubahiro wa APR FC, Gen. James Kabarebe.

Nshuti Innocent yashimiye Kirisitu nyuma yo gutsinda igitego cya kabiri muri Shampiyona
Imanishimwe Emmanuel 'Mangwende' ahobera Nshuti Innocent mu gihe Manishimwe Djabel yashimiraga abafana
Bukuru Christophe na Nshuti Innocent bafata ifoto nyuma yo guhesha APR FC kuyobora umukino i Rubavu

Amafoto: Uwihanganye Hardi


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .