Icyumweru kidasanzwe: StarTimes izerekana imikino ya Europa League n’indi ikomeye ya Shampiyona z’i Burayi

Yanditswe na Eric Tony Ukurikiyimfura
Kuya 23 Ukwakira 2019 saa 02:00
Yasuwe :
0 0

Abakunzi b’Umupira w’amaguru muri Afurika bazirikanwe muri iki cyumweru, aho abafite ifatabuguzi rya StarTimes bazabasha kwirebera imikino y’amakipe akomeye muri Europa League no muri Shampiyona eshatu zikomeye i Burayi.

Iki cyumweru kidasanzwe kiratangira kuri uyu wa Kane, aho amakipe y’ibigugu muri Premier League, Arsenal na Manchester United, yombi azakina muri Europa League.

Manchester United iheruka kuba ikipe ya mbere yashyize akadomo ku mikino 17 Liverpool yari imaze itsinda ubwo zangayaga igitego 1-1 ku Cyumweru, iragaruka mu kibuga kuri uyu wa Kane yakirwa na Partizan Belgrade yo muri Serbia, mu irushanwa rya Europa League.

Iyi kipe muri Serbia kuri ubu ni yo iyoboye itsinda L nubwo inganya amanota na Manchester United.

Parni valjak nk’uko abafana bayo bayita, ifite abakinnyi babiri bakomoka muri Afurika, aho uretse kuba babona umwanya uhoraho wo gukina, bari mu bamaze kuyitsindira ibitego byinshi.

Rutahizamu w’Umunya-Nigeria, Umar Sadiq, wageze muri iyi kipe avuye muri AS Roma nk’intizanyo, amaze gutsinda ibitego bitanu muri uyu mwaka w’imikino ndetse ni umwe mu bo umutoza Savo Milošević agenderaho. Uyu mukinnyi w’imyaka 22, yatsinze ibitego byombi byahesheje Partizan Belgrade intsinzi ya 2-1 ku mukino wa Astana.

Undi ni Umunya-Guinée Seydouba Soumah umaze gutsinda ibitego birenzeho kimwe ku bya Sadiq, ndetse na we akaba akoreshwa cyane n’umutoza Milošević.

Milošević wakiniye Aston Villa muri Premier League yagize ati” Tuzakora ibishoboka byose abashyitsi bacu bumve batuje kandi batekereza umukino gusa.”

“Abafana bacu nzababwira ko ikipe nkuru, ikipe ikomye yaje kudusura. Tugomba kwishimira gukina na Manchester United ku nshuro ya mbere kuva mu 1966. Tugomba guterwa ishema no kwakira abakinnyi, abatoza n’abayobozi b’ikipe nkuru nka yo.”

Kuri uyu wa Kane kandi, Arsenal ikinamo Pierre-Emerick Aubameyang watoranyijwe mu bahatanira Ballon d’Or 2019, izaba ishaka gukomeza kuyobora itsinda F ubwo izaba yakiriye Vitória de Guimarães yo muri Portugal.

Ikipe y’Abarashi, yatsinze imikino yombi iheruka gukina muri iri tsinda, igiye gukina uyu mukino nyuma y’iminsi itatu ikinnye na Sheffield United muri Shampiyona.

Iki cyumweru kidasanzwe muri ruhago, kizakomereza muri Bundesliga y’u Budage, aho ku wa Gatandatu hateganyijwe umukino ukomeye ‘Ruhr derby’ uzabera kuri Veltins-Arena muri Gelsenkirchen hagati ya Schalke 04 na Borussia Dortmund.

Uyu mukino ugereranywa nk’uhuza Al Ahly na Zamalek mu Misiri, AC Milan na Inter mu Butaliyani cyangwa FC Barcelone na Real Madrid muri Espagne.

Ku nshuro ya mbere uhereye mu 2010, Schalke yabuze amahirwe yo kuba mu makipe ane ya mbere ubwo yatsindwaga na Hoffenheim ibitego 2-0 ku Cyumweru, aho iyo itsinda yari kuyobora urutonde harimo inota ry’ikinyuranyo.

Ku ruhande rwa Borussia Dortmund, izajya muri uyu mukino ifite icyizere dore ko iheruka gutsinda Borussia Mönchengladbach kuri ubu iyoboye, igitego 1-0 mu mukino wabaye ku wa Gatandatu.

Umutoza wa Schalke, David Wagner yavuze ko yababajwe n’umusaruro ikipe ye yabonye imbere ya Hoffenheim, yemeza ko hari ibyinshi bungutse.

Ati” Twatengushywe n’amahirwe twabonye ntitwayabyaza umusaruro. Tugiye kwisuganya, dutekereza ku mukino utaha. Hari ibyiza twabonye tuzakoresha mu mukino wa Dortmund kuko turashaka kuwitwaramo neza.”

Rutahizamu w’Umudage, Marco Reus, watsinze igitego cy’intsinzi ubwo Dortmund yatsindaga Mönchengladbach, yavuze ko bamaze igihe bakina imikino ikomeye.

Ati” Bizatwereka icyerekezo turi kuganamo muri uyu mwaka w’imikino. Birumvikana, turashaka kujya ku mwanya wa mbere nituramuka dutsinze mu mpera z’icyumweru kandi ni intambwe y’ingenzi igana imbere. Tuzajya muri uyu mukino wa Schalke dufite icyizere cyinshi.”

Abakunzi ba ruhago muri Afurika, bazaryoherwa kandi n’imikino ya Shampiyona ‘Ligue 1’ y’u Bufaransa, ahateganyijwe umukino uzahuza Paris Saint-Germain na Olympique de Marseille kuri Parc des Princes, uyu usanzwe uzwi nka ‘Le Classique’.

Olympique Marseille yigeze kuba ikipe y’ubukombe mu Bufaransa, kuri ubu yasimbuwe na Paris Saint-Germain yashoye menshi ndetse ubwo OM iheruka gutsinda PSG ni mu 2011.

André Villas-Boas utoza Olympique Marseille iheruka gutsinda Strasbourg ku Cyumweru, yavuze ko ikipe ye izakora ibishoboka byose ishaka intsinzi.

Ati” Tuzagerageza gukora igishoboka cyose, dufite inzozi zo gutsinda, ariko ni (PSG) ikipe isa n’iva mu yindi Shampiyona nkurikije uko mbyumva. Nimureba uko amakipe ahagaze nyuma y’imikino itandatu, murabyumva. Paris ishyize umutima wayo kuri Champions League.”

Valentin Rongier ukina mu kibuga hagati, yavuze ko “we atiyumvisha ko PSG yaba ari ikipe idatsindwa kuko yatakaje imikino yahuyemo na Reims na Rennes.”

Myugariro Boubar Camara wari ufite imyaka 12 ubwo ikipe ye iheruka gutsinda PSG, na we yagize ati “Cavani, Neymar cyangwa Mbappé, bose turabazi.”

Abakunzi b’Umupira w’amaguru muri Afurika, bazaba aba mbere mu kumenya niba Olympique Marseille itsinda uyu mukino wa Le Classique kuko imikino yose ikomeye muri iki cyumweru izerekanwa mashene ya StarTimes.

StarTimes izerekena imikino ya Europa League n'iya Shampiyona zikomeye i Burayi muri iki cyumweru kidasanzwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza