00:00:00 IGIHE NETWORK KN KINYARWANDA EN ENGLISH FR FRANCAIS

Icyerekezo gishya ku bikombe, umucyo kuri ’Kiyovu Sports Ltd’: Ikiganiro na Ndorimana ‘General’ (Video)

Yanditswe na Eric Tony Ukurikiyimfura
Kuya 11 Mutarama 2023 saa 08:32
Yasuwe :

Umwaka wa 2023 watangiranye impinduka n’ingamba nshya muri Kiyovu Sports yateye intambwe yo gushyiraho ikigo cy’ubucuruzi kiyishamikiyeho akaba ari na cyo kizajya gicunga ikipe yayo hifuzwa ko yongera guha abakunzi bayo ibyishimo binyuze mu gutwara ibikombe.

Ku wa 8 Mutarama ni bwo Ndorimana Jean François Régis "Général" yagizwe Perezida w’Agateganyo w’Umuryango Kiyovu Sports asimbuye Mvukiyehe Juvénal weguye, we wahawe kuyobora ikigo kizajya gicunga Ikipe ya Kiyovu Sports.

Izi mpinduka muri Kiyovu Sports zabaye nyuma y’inama zitandukanye zari zimaze iminsi muri uyu muryango. Havuzwe byinshi mu bakunzi b’Urucaca, bamwe bagaragaza ko badashyigikiye igitekerezo cya Mvukiyehe Juvénal ko hashyirwaho iki kigo gishamikiye kuri Kiyovu Sports [Company cyangwa Kiyovu Sports Ltd] kuko bumvaga ari ugushaka kuyigarurira we ubwe.

Byarangiye ubuyobozi bw’Umuryango Kiyovu Sports bwemeye gushyira mu bikorwa icyemezo cy’Inteko Rusange yayo yabaye ku wa 6 Ukwakira 2021, cyo gushyiraho ikigo gishamikiye kuri uyu muryango, kigakora ibikorwa by’ubucuruzi bugamije guteza imbere ikipe yawo.

Mbere y’uko kwemeza iki kigo, hemejwe ko agaciro shingiro ka Kiyovu Sports yashinzwe mu 1964, kangana na miliyari 3 Frw mu gihe cy’imyaka itatu. Hanzuwe ko Umuryango wa Kiyovu Sports ugiramo umugabane shingiro wa miliyari 2 Frw, undi ungana na miliyari 1 Frw ukaba uwa Kiyovu Sports Ltd izajya icunga ikipe.

Kugira ngo umunyamuryango wa Kiyovu Sports atangire kugura umugabane muri Kiyovu Sports Ltd, ni uko azajya abanza kugira imigabane ine y’ibihumbi 50 Frw (yose hamwe angana n’ibihumbi 200 Frw) muri “Association Kiyovu Sports”.

Perezida na Visi Perezida b’Umuryango Kiyovu Sports ni bo bahagarariye ubuyobozi bwawo mu Nama y’Ubutegetsi ya Kiyovu Sports Ltd.

IGIHE yagiranye ikiganiro cyihariye na Perezida w’Agateganyo w’Umuryango Kiyovu Sports, Ndorimana Jean François Régis "Général", adusobanirira byimbitse kuri iyi mibereho mishya ya Kiyovu Sports n’uburyo bizakorwamo.

Wakiriye gute kugirwa Perezida w’Umuryango wa Kiyovu Sports?

Ni ibintu nakiriye neza ku ruhande rwanjye. Iyo abanyamuryango bakugiriye icyizere, bagahitamo ko ubabera umuyobozi, biguha icyizere. Nanjye byampaye icyizere ku giti cyanjye, nabyakiriye neza.

Abakunzi ba Kiyovu Sports bitege iki nyuma yo guhabwa izi nshingano nshya?

Abayovu, ikintu nababwira kwitega ni impinduka kandi nziza kuko habayeho kuzuzanya ku mpande zombi. Dufite ibyo twumvikanye dukeka ko byateza ikipe imbere. Ndumva rero icyo bakwitegura ari impinduka kandi nziza.

Association Kiyovu Sports izakorana gute n’Ikigo kiyishamikiyeho (Kiyovu Sports Ltd)?

Ni ibintu bifite imikoranire myiza, nkeka ko ari yo tumaze iminsi tuganiraho kugira ngo tuyishyire ku murongo, ariko Kiyovu Sports Company imaze imyaka ibiri ikora.

Ni icyemezo cy’Inteko Rusange yabaye tariki ya 6 Ukwakira 2021, yemeza ko Kiyovu Sports Company itangira gukora. Nta muntu rero ufite ubushobozi buhindura icyemezo cyayo.

Ni ko byemejwe, ahubwo byari bitarashyirwa mu bikorwa. Ubu rero kuko Juvénal yari amaze amezi agera kuri abiri yeguye ku buyobozi bw’Umuryango Kiyovu Sports, byabaye ngombwa ko tubanza kuzuza inzego.

Ni yo mpamvu habayeho kumusimbura, yasimbuwe, abanyamuryango bangirira icyizere bampa inshingano zo kumusimbura muri uwo mwanya yari arimo kugira ngo tugire imikoranire dusinya, ngo dushyire mu bikorwa ibyemezo by’Inteko Rusange yo mu 2021, noneho ikigo gitangire gikore ariko kimaze imyaka ibiri.

Mu bitarumvikanwagaho harimo ibijyanye n’uburyo bwo kugira imigabane muri Kiyovu Sports, ubu bihagaze gute?

Icyo kibazo cyakemutse, ikibazo cy’imigabane cyakemutse. Uretse ko habayeho imyumvire abantu batumvaga kimwe, ariko njyewe mvugana na Perezida Juvénal, twaganiriye, yoroshya ibintu, natwe turabyoroshya. Twese turi muri Kiyovu Sports kandi ni yo ifite agaciro.

Twahaye Kiyovu Sports agaciro ka miliyari 3 Frw nk’umugabane fatizo, twemeranya ko Kiyovu Sports Association ifite miliyari 2 Frw, Kiyovu Sports Company igasigarana miliyari 1 Frw. Bivuze ko Kiyovu Sports ni yo iri hejuru.

Ni ibintu [abantu] batumvaga kimwe ariko byaganiriweho birasobanurwa, bijya no mu nyandiko. Ibyo mbabwira ni ko byanditse.

Iyo umuntu yumvise miliyari 3 Frw, yakwibaza niba zihari cyangwa ari agaciro k’ikipe. Wabisobanura gute?

Association Kiyovu Sports ni ikintu kinini cyane, kuba twayihaye ako gaciro ka miliyari 3 Frw, igasigarana miliyari 2 Frw. Twihaye imyaka itatu, ibyo twasinye bifite agaciro mu myaka itatu.

Twumvikanye na Juvénal, Chairman w’ikigo, ko yemerewe gucuruza imigabane ya miliyari 1 Frw ku ruhande rwe, Kiyovu Sports ikaba yemerewe gucuruza imigabane ya miliyari 2 Frw.

Kugira ngo ikigo gikore, umugabane fatizo shingiro ugomba kuba uriho, umunyamigabane mukuru ni Association Kiyovu Sports ufite miliyari 2 Frw.

Association Kiyovu Sports izaba ifite uruhe ruhare mu mibereho ya buri munsi y’ikipe?

Ni yo mpamvu nakubwiye ko ari ibintu byaganiriweho kugira ngo ikigo gitangire, byavugiwe mu Nteko Rusange. Ntabwo abantu barumva neza uburyo imikoranire ihagaze, ariko ihagaze neza.

Kiyovu Sports Association yeguriye Kiyovu Sports Ltd imicungire y’ikipe irimo kumenya ibibazo byayo umunsi ku wundi, bagakora bisanzuye 100%.

Ariko imikoranire hagati ya Kiyovu Sports Ltd na Kiyovu Sports Association irakomeza.

Inkunga Umuryango Kiyovu Sports wakira uzazitanga mu kigo.

Mufite icyizere cy’uko uyu mushinga uzakunda?

Juvénal twagiranye ibiganiro byiza. Nasanze ibintu byose biba bikeneye umwanya ndetse no kuba uruhande rumwe cyangwa abantu bose ko boroherana kugira ngo bumvikane ku bintu, ariko nta kintu kigoranye cyarimo ahubwo ni uko bitumvwaga kimwe.

Nabicishijemo amaso ndabisoma, ndabisesengura, mbaza abanyamategeko, tubiganiraho na Juvénal, nabizeza ko noneho ntaho azajya.

Aje kuyobora Kiyovu Sports Ltd nk’uko yabyifuje, hari abari bafite impungenge ngo aje gutwara ikipe ariko ntabwo ari uko bimeze. Ikigo kigomba kwigenga, agacunga ikipe ku buzima bwayo bwa buri munsi, ariko biri mu nzira nziza.

Njye nkurikije ibiganiro twagiranye na Juvénal, yewe n’abo bari kumwe mu Nama y’Ubutegetsi ya Kiyovu Sports Ltd, ni byiza kuko bigamije guteza imbere Kiyovu Sports.

Namubwiye ko kugira ngo ibintu bya Kiyovu Sports Ltd bigire agaciro, Kiyovu Sports ni ikipe y’abafana benshi, gutwara igikombe bifite icyo bivuze mu kugira ngo n’iyo migabane igurwe ari myinshi.

Namubwiye ko iki gikombe gishoboka kugitwara kandi Juvénal yagaragaje ko hari ibintu ashoboye, abantu bamushyigikiye tukamuba hafi, n’ibi bitekerezo bye by’ubucuruzi akabizana muri Kiyovu Sports Ltd, Association iramushyigikiye.

Ndahumuriza abafana n’abakunzi ba Kiyovu Sports ko nta kibazo ku ikipe yabo, kumva ngo umuntu yayitwara, ibyo ntabiriho. Ibyo akora byose ni inyungu ziganisha ku gutwara igikombe kandi 80% cyangwa 90% by’Abayovu icyo banyotewe ni igikombe.

Kiyovu Sports yasoje igice kibanza cya Shampiyona ari iya kabiri, intego zayo mu mikino yo kwishyura ni izihe?

Hari hamaze iminsi havugwa ibintu byinshi muri Kiyovu Sports, ariko ubu ndacyeka byose byagiye ku murongo.

Abayovu icyo bakwitega ni uko izi mpande zombi tugomba gushyira hamwe no gutahiriza umugozi umwe, tukiruka ku Gikombe cya Shampiyona.

Ni cyo Abayovu banyotewe, nanjye ndi muri abo. Natwe turakora ibishoboka byose.

Twasoje imikino ibanza tunganya amanota n’ikipe ya mbere, iturusha ibitego, ni nyuma yo gukuramo amanota menshi twari twasizwe n’amakipe duhanganye. Urumva turi mu rugamba rw’igikombe, birashoboka ko twagitwara.

Hagarutse umwuka mwiza muri Kiyovu Sports, icyo nashishikariza abafana ni ukuba hafi y’ikipe yabo, tugiye kujya twakirira imikino yacu i Muhanga, ndabasaba ko baba hafi y’ikipe bakajya bitabira imikino yayo, bagashyikira ikipe yabo kuko turi mu rugamba rwo gushaka igikombe kandi birashoboka.

Kiyovu Sports yaba iri ku isoko ry’abakinnyi?

Navuganye na Chairman Juvénal, ambwira ko bishoboka ko twakongeramo abakinnyi batatu ariko ari ubusabe ari bwandike asaba ko babwitwemerera. Babitwemereye mwabona impinduka kuko twakongeramo abakinnyi batatu.

Bavuga ko imyanya yacu yuzuye [30], ariko Federasiyo [FERWAFA] hari ubusabe bukurikije amategeko, ishobora kutwemerera tukaba twakongeramo abakinnyi batatu.

Kiyovu Sports yatinze gusubukura imyitozo kandi Shampiyona iragaruka mu minsi 10 iri imbere! Harabura iki?

Ejo [ku Cyumweru] dusoza inama no gufata ibyemezo bishyashya, twagize icyo duhurizaho twese n’icyo duhuriyeho twese, iyo Kiyovu Sports Association, iyo Kiyovu Sports Ltd byose bihuriza ku ikipe no gushyira hamwe kugira ngo itere imbere. Ni wo mugambi wabyo.

Twamaze kumvikana, tumaze gusinya ayo masezerano y’imikoranire, umwuka wabaye mwiza na none hagati y’impande zombi.

Twese ikituraje ishinga ni ukugarura ikipe, Perezida wa Kiyovu Sports Ltd, Juvénal, yavuze ko ikipe igomba guhita igaruka vuba mu myitozo, ntarirarenga.

Dufite ikipe nziza, dufite ikipe ikomeye. Ni iy’abakinnyi bakuru, bazi iby’akazi kabo. Ibintu bimeze neza kugaruka ni ako kanya kuko bazi ibyo bakora.

Ndorimana Jean François Régis "Général" uyobora Umuryango Kiyovu Sports

Amezi abaye abiri ikipe idahembwa, ibyo birakemuka gute?

Ziriya nyandiko twasinye, twarangije kubisinya bavuga ko bigiye kujya ku murongo byose, byaba iby’imishahara, iby’ibirarane, uduhimbazamusyi,…Ibintu byose birajya ku murongo mu gihe gito gishoboka kuko hari imikoranire myiza hagati ya Kiyovu Sports Association na Kiyovu Sports Ltd.

Bite by’umutoza Alain-André Landeut wahinduriwe inshingano akagirwa Manager Sportif nyuma yo kwamburwa ikipe?

Perezida Juvénal ni we wazanye umutoza, afite n’ibyo bavuganye kandi umutoza arahembwa. Yahinduriwe inshingano kandi biremewe kuko mu masezerano birimo, ikipe iracyamumenya kuko ntarasezererwa.

Ikibazo cyabaho ni nk’uko gutinda kuba yahembwa ariko guhindurirwa inshingano ndumva ari uburenganzira bw’umukoresha. Ntabwo binyuranye n’amategeko kuba yahindurirwa inshingano, birasanzwe.

Juvénal yamuhinduriye inshingano kuko yabonaga umwuka atari mwiza mu ikipe, ariko n’ubu ni umukozi wa Kiyovu Sports.

Mutekereza ko uruhare rw’abakunzi ba Kiyovu Sports ari uruhe muri iyi mibereho mishya?

Ikintu cya mbere nasaba Abayovu ni ukuba hafi y’ikipe yabo, nkabashishikariza kugura imigabane muri Kiyovu Sports company, bazagera aho bunguke ariko kuyigira ni no gufasha ikipe kuko amafaranga agurwamo imigabane nubwo abarwa k’uwayiguze ariko afasha ikipe gutera imbere.

Juvénal yarabinsobanuriye numva ni byiza, bizafasha Kiyovu Sports gutera imbere, ubundi tukaba hamwe tukareba ko twatwara Igikombe cya Shampiyona.

Ndorimana Jean François Régis "Général" yavuze ko ikibaraje ishinga muri Kiyovu Sports ari ukwegukana Igikombe cya Shampiyona

Amafoto & Graphique: Ntare Julius

Video: Iraguha Jotham


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .