00:00:00 IGIHE NETWORK KN KINYARWANDA EN ENGLISH FR FRANCAIS

Ibyo kugurisha imikino muri Kiyovu, amaherezo ye muri Yanga SC: Bigirimana Abeddy twaganiriye (Video)

Yanditswe na Byiringiro Osée Elvis
Kuya 17 Mutarama 2023 saa 07:04
Yasuwe :

Imyaka igera kuri 30 irashize abakunzi ba Kiyovu Sports batarabona ikipe yabo yegukana igikombe cya shampiyona. Nubwo bimeze bityo ariko mu myaka ibiri yagaragaje imbaraga nyinshi n’ishyaka byerekana ko yahinduye imitekerereze

Mu myaka ibiri ishize, Kiyovu Sports yatangiye guca andi marenga. Yariyubatse kugeza n’aho muri Shampiyona y’umwaka ushize yakukuje igera ku munota wa nyuma igihataniye igikombe na APR FC ariko kiyica mu myanya y’intoki.

Ni urugendo rutari rworoshye ariko rwashobotse bigizwemo uruhare n’abakinnyi bayo biganjemo abanyamahanga.

Mu kuvuga urwego rw’imikinire rwa Kiyovu Sports, ntiwarenza ingobe uruhare rwa Bigirimana Abeddy, umukinnyi uri mu bo iyi kipe igenderaho mu kibuga hagati.

Mu kiganiro yagiranye na IGIHE, Bigirimana yagarutse kuri byinshi byamuvuzweho ku giti cye birimo kujya mu Ikipe ya Young Africans SC yo muri Tanzania, ibivugwa ko Kiyovu Sports igurisha imikino ndetse n’ubuzima bwo hanze y’ikibuga.

Uyu mukinnyi ukomoka mu Burundi yavuze ko Yanga SC yamwifuje ndetse banagirana ibiganiro ariko hari ibitaragenze neza byatumye itamusinyisha.

Yagize ati “Ni byo hari gahunda yo gusinyira Yanga ariko urabizi iyo umuntu afite amasezerano y’ikipe, ni yo yemerera umuntu kuyisohokamo. Umukinnyi ntashobora kwifatira umwanzuro wo kuva mu ikipe ngo agende.”

“Baraje baganira n’abayobozi ba Kiyovu Sports, sinzi ibyo baganiriye, icyo gihe banaganiriye n’umujyanama wanjye [manager], ambwira ko byananiranye. Yarambwiye ati “Dutegereze umwaka utaha, ibintu bishobora gukunda.”

Bigirimana ari mu mwaka wa nyuma nk’umukinnyi wa Kiyovu Sports. Avuga ko ibyo kongera amasezerano bizaterwa n’ubwumvikane azagirana n’abayobozi be.

Ati “Uyu ni umwaka wanjye wa nyuma muri Kiyovu Sports, byose birashoboka kuvugurura amasezerano cyangwa nkabona ahandi njya mu Rwanda no hanze yarwo. Bizaterwa n’ibyo tuzemeranyaho hagati yanjye n’amakipe azanshaka.’’

Kiyovu Sports nubwo iri mu makipe akomeye kuri ubu ariko inavugwamo ibyo kugurisha imikino nubwo nta gihamya, ababikomozaho berekana.

Kuri iyi ngingo, Bigirimana yavuze ko “Mu Rwanda bavuga ibyo bo bashaka kandi ntushobora kubabuza kuvuga, ariko twe tuzi ukuri.”

Yakomeje ati “Kuva ku buyobozi, abatoza, natwe abakinnyi nta kibazo cy’imikino yagurishijwe. Ni bya bindi iyo abantu bamenyereye gutsinda, bagatsindwa, hari ibyo bavuga.’’

Aya magambo yavuzwe cyane ku mukino Kiyovu Sports yatsinzwemo na Gasogi United ibitego 3-1.

Bigirimana yavuze ko kuba bari bamaze gutsinda Rayon Sports no kunganya na APR FC, gutsinda na Gasogi United hari abatarabyakiriye.

Ati “Gutsindwa bibaho kandi natwe twemeye ko twatsinzwe ariko ibyo kugurisha umukino si byo, ni ibinyoma.’’

Bigirimana Abeddy hanze y’ikibuga ni umuntu uvuga ko akunda gusenga cyane no kubana n’abandi amahoro.

Abivuga muri aya magambo ati “Nkunda gutemberera cyane mu rusengero, ndi umukirisitu wo muri Kiliziya Gatolika.’’

Uyu mukinnyi mu bijyanye n’ibiribwa akunda cyane kurya ubugari n’ifi no kunywa fanta.

Kiyovu Sports uyu Murundi akinira yasoje imikino ibanza iri ku mwanya wa kabiri muri Shampiyona aho inganya amanota 30 na AS Kigali ya mbere, batandukanywa n’ibitego bazigamye.

Bigirimana Abeddy ni umwe mu bakinnyi ngenderwaho muri Kiyovu Sports
Umurundi Bigirimana Abeddy ari mu mwaka we wa nyuma muri Kiyovu Sports, aho asigaje kuyikinira amezi atandatu

Graphics: Ntare Julius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .