00:00:00 IGIHE NETWORK KN KINYARWANDA EN ENGLISH FR FRANCAIS

Ibyihariye kuri Todd Boehly waguze Chelsea

Yanditswe na Muyisenge Jean Felix
Kuya 10 May 2022 saa 08:15
Yasuwe :

Tariki ya 7 Gicurasi 2022 nibwo byatangajwe ko Chelsea yemeye kugurishwa asaga miliyari 4,25 z’amapawund yatanzwe na Todd Boehly wihuje na nyiri ikipe ya Los Angeles Dodgers, Mark Walter, umuherwe wo mu Busuwisi, Hansjorg Wyss na sosiyete y’ishoramari yo muri Leta Zunze Ubumwe za Amerika, Clearlake Capital.

Igurishwa rya Chelsea ryakozwe na banki yo muri Amerika yitwa Raine Group yari yahawe inshingano zo gukurikirana cyamunara ya Chelsea nyuma y’uko Roman Abrahimovic ayishyize ku isoko kubera ibihano yafatiwe bitewe n’i ntambara y’u Burusiya na Ukraine.

Nubwo Clearlake Capital ariyo ifite imigabane myinshi igera kuri 60%, Todd Boehly ni we uzajya akurikirana imibereho y’ikipe ya buri munsi, bivuze ko abafana ba Chelsea ari we bazaba bateze amaso.

Todd Boehly ni umucuruzi w’umunyamerika w’imyaka 46, akagira umutungo ufite agaciro ka miliyari $4.5.

Yavukiye Bethesda, umujyi uherereye muri Leta ya Maryland, akaba yarakuye ubutunzi bwe mu gushora imari mu bikorwa bitandukanye by’ubucuruzi. Ubu akuriye Eldridge Industries, sosiyete y’ishoramari mu bikorwa bitandukanye.

Boehly afite imigabane mu makipe y’imikino itandukanye yo muri Amerika nka LA Dodgers ikina Baseball. Iyi kipe ayibereye umuyobozi akanagiramo imigabane ihwanye na 20%.

Afite kandi imigabane iwanye na 27% mu ikipe ya LA Lakers ikina shampiyona ya Basketball NBA. Iyi migabane ayifatanyije na Mark Walters.

Amakipe yose Boehly ayobora azwiho gushora akayabo mu kugura abakinyi b’ibyamamare. Muri shampiyona ya Baseball, LA Dodgers niyo ihemba abakinnyi umushara uri hejuru cyane.

Ku bafana ba Chelsea bafite impungenge y’uko iyi kipe itazongera guhangana n’ibigugu ku isoko ry’igura n’igurisha, bakwiriye gutuza kuko hari ingingo zirengera ikipe zashyizwe mu masezerano yo kugura.

Zimwe muri izo harimo ko abayiguze batemerewe kugurisha imigabane yabo mu myaka 10, nta kugabana inyungu kandi mbere ya 2032. Mu masezerano kandi harimo n’urugero rw’umwenda batagomba kurenza.

Mu mafaranga iguzwe, miliyari £2.5 zizajya kuri konti ya banki ya Abrahimovic iherereye mu Bwongereza yafatiriwe, mu gihe ategerejwe kwifashishwa mu bikorwa by’ubugiraneza cyane gufasha abagizweho ingaruka n’intambara y’ u Burusiya na Ukraine.

Andi miliyari £1.75 azashorwa mu bikorwa by’ikipe harimo kugura abakinnyi, kuvugurura stade, guteza imbere ikipe y’abagore n’amakipe y’abato.

Chelsea byitezwe ko izagurishwa byeruye mu mpera za Gicurasi nyuma y’uko Leta y’u Bwongereza n’Ishyirahamwe ry’umupira w’amaguru batanze uburenganzira ko igurishwa ku mugaragaro.

Todd Boehly ni we uzajya akurikirana ubuzima bwa buri munsi bwa Chelsea
Todd Boehly ni umuherwe usanzwe afite ibikorwa bitandukanye
Nubwo Todd Boehly azajya akurikirana ikipe ya Chelsea, hari ibyemezo bimwe na bimwe atemerewe gufata byashyizwe mu masezerano

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .