00:00:00 IGIHE NETWORK KN KINYARWANDA EN ENGLISH FR FRANCAIS

I Burayi ibikombe byabonye bene byo, Zlatan atumurira itabi imbere y’abafana: Ibyaranze impera za Shampiyona zikomeye

Yanditswe na Mihigo Saddam
Kuya 23 May 2022 saa 03:11
Yasuwe :

Kuri iki Cyumweru nibwo hirya no hino ku mugabane w’u Burayi byari inkuru ikomeye. Shampiyona y’Abongereza yasozwaga bikiri impaka hagati ya Manchester City na Liverpool.

Manchester City yatwaye igikombe cya gatandatu cya shampiyona kuva yakwitwa Premier League.

Ku rundi ruhande, mu makipe atandukanye, abakinnyi basoje amasezerano basezeye. Barimo Angel Di Maria wakiniraga Paris Saint Germain, Paulo Dybala (Juventus), Oleksandr Zinchenko n’abandi.

Divock Origi yasezewe na Liverpool

Divock Origi wakiniraga Liverpool yasezeweho nyuma yo gusoza urugendo rwe muri iyi kipe yabuze igikombe ku munota wa nyuma.

Origi yari amaze imyaka ine muri Liverpool, ikipe atabonyemo umanya uhagije wo gukina bityo akaba yahisemo kujya gushaka amahirwe ahandi.

Divock Origi yasezeye muri Liverpool

Zlatan Ibrahimović yisanzuye atumura itabi imbere y’abafana

Mu Butaliyani, AC Milan yatwaye igikombe cya 19 cya shampiyona itsinze Sassuolo ibitego 3-0 ku munsi wa nyuma.

AC Milan yaherukaga igikombe mu mwaka w’imikino 2010-2011, yagitwaye mu rugendo yafashijwemo n’abakinnyi barimo Zlatan Ibrahimović.

Mu kwishimira ibyagezweho, Zlatan yatumuye cigar ari hagati mu kibuga.

Zlatan w’imyaka 40 amaze imyaka ibiri muri AC Milan, ikipe yavuze yagombaga kuyifasha gutwara igikombe.

Zlatan Ibrahimović icyo yari yarahize yakigezeho

Ibibazo bya Ukraine n’u Burusiya byarijije Oleksandr Zinchenko

Ubwo Manchester City yari imaze kwegukana igikombe cya shampiyona, myugariro wayo, Oleksandr Zinchenko yasutse amarira ababazwa n’ibibazo bene wabo bo muri Ukraine barimo.

Oleksandr Zinchenko yasutse amarira ariko anambika igikombe ibendera rya Ukraine

Angel Di Maria yasezeye i Paris

Kuwa Gatandatu ubwo Paris Saint Germain (PSG) yari imaze gusoza shampiyona inyagira Metz ibitego 5-0, Angel Di Maria yasezeye ku bakunzi b’iyi kipe.

Nyuma y’imyaka irindwi yari amaze muri PSG, Di Maria yafashe umwanzuro wo gusezera muri iyi kipe akaba ashobora kujya muri Juventus yo mu Butaliyani.

Angel Di Maria ashobora kujya muri Juventus

Olivier Giroud mu byishimo

Nyuma yo gutandukana na Chelsea mu 2021, Olivier Giroud yafashije AC Milan gutwara igikombe cya Shampiyona y’u Butaliyani.

Mu kwishimira intsinzi, Giroud yakikiye icupa rinini rya Champagne mu gihe abakinnyi bagenzi be bari birukankanye igikombe.

Olivier Giroud yavuye muri Chelsea shishi itabona none yatwaye shampiyona

Mohamed Salah na Heung-Min Son basangiye igihembo

N’ubwo Liverpool yabuze igikombe ku mukino wa nyuma, Mohamed Salah yahawe igihembo cy’umukinnyi watsinze ibitego byinshi (23) anganya na Heung-Min Sun wa Tottenham.

Uretse gutsinda ibitego byinshi muri shampiyona, Salah yatanze imipira 13 yabyaye ibitego.

Mohamed Salah yarushije imibare abakinnyi ba Liverpool atsinda ibitego 23 n'imipira 13 yabyaye ibitego
Umunya-Koreya y'Epfo, Son Heung-min, ntabwo yatengushye Tottenham uyu mwaka

Alisson Becker na Ederson Moraes banganyije imibare

Umunyezamu wa Liverpool, Alisson Becker na Ederson Moraes wa Manchester City basangiye igihembo cy’umunyezamu wamaze imikino myinshi atinjizwa igitego (Golden Gloves) [20].

Manchester City yatwaye igikombe, Liverpool isoza ku mwanya wa kabiri.

Umunyezamu wa Manchester City, Ederson Santana de Moraes yakoze akazi kahaye ikipe igikombe nawe acyura ikindi
Umunyezamu wa Liverpool, Alisson Ramses Becker nawe yarakotanye muri uyu mwaka w'imikino

Erling Haaland ashobora kuzambikwa nimero 15

Mu minsi ishize nibwo ikipe ya Manchester City yemeje ko yamaze kugura rutahizamu, Erling Braut Haaland wari umaze imyaka ibiri muri Borussia Dortmund.

Borussia Dortmund yarabyemeye inamusezera nyuma y’uko hari hasojwe Shampiyona y’u Budage.

Kuri iki Cyumweru ubwo Manchester City yari imaze gutwara igikombe, hagaragaye umuntu wari ufite umwenda wanditseho umubare 15 handitseho amazina y’uyu rutahizamu.

Ibi byaketswe ko Haaland azarangwa n’umubare 15 ku myenda ye. Bihuzwa no kuba nta mukinnyi wambara iyi nimero muri Manchester City.

Gusa kandi amakuru atangwa n’ibinyamakuru bitandukanye avuga ko mu gihe Gabriel Jesus yava muri Manchester City, nimero 9 yambara yahabwa Halaand.

Abakinnyi ba RB Leipzig basutse inzoga ku mutoza wabo

Kuwa Gatandatu tariki 21 Gicurasi, ikipe ya RB Leipzig yatwaye igikombe cy’igihugu cy’u Budage nyuma yo gutsinda SC Freiburg penaliti 4-2.

RB Leipzig yatwaye igikombe kuri penaliti nyuma y’uko umukino wari warangiye amakipe yombi anganya igitego 1-1.

Ubwo Umutoza wa Leipzig, Christian Streich, yari asoje kuganira n’abanyamakuru, abakinnyi be bamusanze aho byaberaga, bamusukaho inzoga z’ibyishimo.

RB Leipzig izahura na Bayern Munichen tariki 28 Gicurasi 2022 mu mukino w’igikombe kiruta ibindi mu Budage. Bayern Munchen niyo yatwaye igikombe cya shampiyona.

Umukino w’igikombe kiruta ibindi mu gihugu runaka, uhuza ikipe yatwaye igikombe cya shampiyona n’iyatwaye igikombe cy’igihugu.

Abakinnyi ba RB Leipzig babonye inzoga zo kunywa n'izo kumena ku mutoza
Kylian Mbappé Lottin wavugwagaho kujya muri Real Madrid, yongereye amasezerano y'imyaka itatu muri Paris Saint Germain
Umubiligi Kevin De Bryne yakambakambye imbere y'umwana we muri Stade ya Etihad
AC Milan yatwaye shampiyona nyuma y'imyaka 11
Gabriel Jesus yikoreye igikombe mu gihe bivugwa ko ashobora kujya muri Arsenal
SC Lyon yatwaye igikombe cya UEFA Champions League mu cyiciro cy'abagore itsinze FC Barcelona ibitego 3-1 mu mpera z'iki Cyumweru dusoje

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .