00:00:00 IGIHE NETWORK KN KINYARWANDA EN ENGLISH FR FRANCAIS

Haringingo yatezwe imikino itatu: Amakosa akomeye ashinjwa muri Rayon Sports

Yanditswe na IGIHE
Kuya 5 Mutarama 2023 saa 07:41
Yasuwe :

Umutoza Haringingo Francis Christian yicariye ishyiga rishyushye muri Rayon Sports nyuma y’umusaruro utari mwiza watumye ashinjwa n’abayobozi be kugira uruhare mu kwitwara nabi kw’iyi kipe mu mikino itandukanye.

Haringingo yakoresheje imyitozo ku wa Gatatu, tariki ya Mutarama 2023, ubwo Rayon Sports yasubukuraga imyiteguro y’imikino yo kwishyura ya Shampiyona.

Uyu mutoza w’Umurundi azi neza ko agomba gukora ibishoboka byose Rayon Sports ikagaruka mu nzira zo gutsinda no gusubirana umwanya wa mbere, bitaba ibyo akaba atageza muri Gashyantare akiri mu kazi.

Amakuru agera kuri IGIHE, ni uko Rayon Sports yagerageje kugira ibanga ko Haringingo yatezwe imikino itatu ibanza mu gice cya kabiri cya Shampiyona, yananirwa kuyitsinda akazirukanwa. Iyo irimo uwa Musanze FC, Mukura Victory Sports n’uwa Kiyovu Sports.

Rayon Sports yasoje igice kibanza cya Shampiyona iri ku mwanya wa gatanu n’amanota 28, irushwa abiri na AS Kigali ndetse na Kiyovu Sports za mbere zinganya 30.

Nubwo uwo musaruro atari mubi, ubuyobozi bwa Rayon Sports n’abakunzi bayo ntibishimiye uburyo ikipe yabo yabonye amanota 10 gusa mu mikino icyenda iheruka nyamara yari yarabonye amanota 18 mu mikino itandatu ibanza aho yari inayoboye Shampiyona.

Rayon Sports ntiyigeze ibona inota na rimwe mu mikino itatu iheruka kuko yatsinzwe na Etincelles FC ibitego 3-2, na APR FC igitego 1-0 ndetse na Gasogi United yayibonyemo igitego 1-0.

Ubwo yaganiraga n’itangazamakuru ku wa 4 Mutarama 2023, Haringingo yagaragaraje ko igitutu cyahozeho ndetse isaha n’isaha kwirukanwa biba bishoboka.

Ati “Havuzwe ibintu byinshi kandi igitutu nta na rimwe kibura. Ushobora no gutwara igikombe, ugakina imikino ibiri ikurikira shampiyona bakakwirukana. Mu mupira n’akazi dukora bibaho.”

Yakomeje agira ati “Ibyo byaravuzwe [byo gutegwa imikino] ariko ntabyo bambwiye cyangwa ntabyo batangaje. Ibyo ntabihari kuko ntabyo twavuganye.”

Nubwo iyi kipe yazonzwe n’imvune zitari nkeya, Haringingo ashinjwa kutagira abakinnyi 11 bahoraho akoresha mu ikipe, ahubwo akunda guhora ahinduranya, rimwe akifashisha bamwe bavuga ko bigoye kwitegaho umusaruro.

Bamwe mu bayobozi ba Rayon Sports ntibishimiye uburyo bw’imikinire y’uyu mutoza ndetse n’imisimburize, aho bavuga ko ari imwe mu ntandaro zo gutsindwa kuko idahinduka.

Ibi bijyana n’impinduka akora mu izamu no kuba hari aho ashyira abanyezamu babiri b’abasimbura ku rupapuro kandi hari undi mukinnyi w’imbere wagashyizwe ku rutonde rw’abakina umukino, bituma amahitamo yo gusimbuza agabanuka.

Kwishyiramo ko Nishimwe Blaise n’Umunyezamu Hakizimana Adolphe bifuzwa na APR FC akumvikanisha ko batatanga umusaruro ukenewe byatumye mu ikipe uwo ari we wese yiyumvamo ko ikosa ryose bakora baba batanze ikipe ku bushake, na byo byatumye imikino abaha igabanuka.

Ibi kandi biri mu byatumye haba imirwano mu rwambariro rwa Rayon Sports nyuma y’umukino APR FC yatsinzemo Rayon Sports igitego 1-0, aho Nishimwe yashinjwaga na bamwe muri bagenzi be kubererekera ikipe y’Ingabo.

Haringingo ashinjwa imyitwarire mibi imugaragaraho we n’abakinnyi bitwa ko bakomeye mu ikipe cyane cyane iyo batsinzwe aho bagaragara mu tubari kandi basangira na we ndetse n’abandi batoza.

Amakuru IGIHE yamenye ni uko ubuyobozi bwa Rayon Sports butishimiye ibyabaye nyuma yo gutsindwa na Etincelles FC tariki ya 11 Ukuboza 2022. Uyu mutoza yagaragaye muri kamwe mu tubari two mu Mujyi wa Rubavu, we n’abo bari kumwe bagataha bukeye basinze.

Ikindi gituma uyu mutoza yijundikwa ni ugutsimbarara ku bakinnyi yagizemo uruhare mu kugurira Rayon Sports kandi batanga umusaruro muke kugira ngo yereke ubuyobozi ko bashoboye. Abo barimo Boubacar Traoré, Ramadhan Kabwiri, Moussa Camara, Ngendahimana Eric, Nkurunziza Félicien n’abandi batabanzamo.

Gushyirwa ku ibere kwa bamwe muri aba bituma hari abandi bashoboye nka rutahizamu Musa Esenu uri mu batsinze ibitego byinshi umwaka ushize na Kanamugire Roger badahabwa umwanya uhagije.

Rayon Sports isanga kuba Ngendahimana Eric urengeje imyaka 30 yarahawe miliyoni 14 Frw, yarahenzwe kandi bigizwemo uruhare n’uyu mutoza.

Kuba muri Rayon Sports habamo ikibazo cyo kutamenya uwinjizamo umukinnyi kuko nta Kanama gashinzwe igura n’igurisha ku buryo uwifuje kuzana umukinnyi wese amutura aho na byo byatangiye kwegekwa ku ntugu za Haringingo dore ko Muhirwa Prosper wagize uruhare ngo aze muri iyi kipe nk’umutoza, yanagize uruhare mu igurwa ry’abakinnyi barimo Tuyisenge Arsène, [Moussa Camara, Rwatubyaye Abdul na Rafael Osalue bose baguzwe bafite imvune] ariko ku bufatanye na komite y’ikipe.

Haringingo anugwanugwaho ikoreshwa ry’amarozi no gutanga imikino [kwitsindisha] nubwo iki cya nyuma cyaburiwe ibimenyetso bifatika. Ibijyanye n’amarozi, biherwa ku witwa Mapuwa uba uri kumwe n’umutoza ku myitozo, mu mwiherero ndetse no kuri stade aho yinjirana n’umutoza akazamuka mu bafana gusa nta na hamwe agaragara mu bakozi b’ikipe ku buryo ubuyobozi buvuga ko butamuzi.

Bamwe mu bayobozi ba Rayon Sports bifuza umwuka mwiza mu ikipe barimo Perezida wayo, Uwayezu Jean Fidèle, barifuza ko umutoza ahaguma bakaba bamwihanganiye ndetse ni yo mpamvu yahawe imikino itatu ya mbere mu yo kwishyura ya Shampiyona.

Mu batakimushaka harimo Umunyamabanga Mukuru, Namenye Patrick, kuko abona ntaho aganisha ikipe, akifuza ko bamusezerera hakiri kare batarahura n’amakipe bashobora gutakarizaho Igikombe cya Shampiyona.

Mu byatumye Rayon Sports iba yifashe ku cyemezo cyo kwirukana Haringingo harimo ko amasezerano ye ashobora kuyisiga iheruheru. Abatoza bose bakorana ni we wabizaniye ku buryo aramutse yirukanywe yajyana na bo, bose bakishyurwa kandi hakabura usigarana ikipe ku buryo byasaba kongera gushaka undi mutoza wabahenda bakongeraho na ‘staff tekinike’ nshya.

Rayon Sports yabaye yifashe ku cyemezo cyo kwirukana Haringingo kubera ko byari kwangiza byinshi, habaho kubanza kumugoragoza

Rayon Sports yabaye ishyize imbere gushaka ibisubizo bya hafi birimo kongera imbaraga mu ikipe, hakagurwa abakinnyi bashya bashobora kunganira abari basanzwe.

Mu mafaranga yakusanyijwe n’Akanama Ngishwanama karimo Munyakazi Sadate wahoze ayobora Rayon Sports watanze miliyoni 10 Frw, harimo ayo gutegura imikino yo kwishyura ya Shampiyona, ayo guha Héritier Luvumbu Nzinga wongeye gusinyira iyi kipe n’ayo kuzafata neza Youssef Rharb wari utegerejwe, ni nyuma y’uko ubwo aheruka mu Rwanda yavugaga ko imibereho ye itari iya kinyamwuga.

Uyu mukinnyi wari intizanyo ya Raja Casablanca yo muri Maroc yavuye mu Rwanda avuga ko ameze nk’uwari muri gereza.

Nubwo Rayon Sports ishaka kwiyubaka ariko iracyafite birantega ku mubare w’abakinnyi yemerewe kongera mu ikipe. Tariki 30 Ukuboza 2022, iyi kipe yandikiye Ishyirahamwe ry’Umupira w’Amaguru mu Rwanda, FERWAFA, isaba ko abakinnyi bongerwa bakagera kuri 33 aho kuba 30.

Nyuma yo gusinyisha Luvumbu amezi atandatu, Rayon Sports yashakaga kwinjiza abandi bakinnyi babiri barimo Youssef n’undi rutahizamu, bose bagafatanya n’abahasanzwe barimo Umunya-Cameroun Léandre Willy Onana umaze gutsinda ibitego birindwi.

Kuba kugeza uyu munsi Rayon Sports isigaranye umwanya umwe wo kongeramo umukinnyi [mu gihe FERWAFA itaremera ubusabe bwayo], birasa n’aho itakigaruye Youssef Rharb ahubwo hagiye gushakwa rutahizamu utsinda ibitego, haherewe ku Munye-Congo Mindeke Fukiani watangiye igeragezwa ku wa Gatatu mu Nzove.

Héritier Luvumbu Nzinga yatangiye imyitozo muri Rayon Sports nyuma yo kuyigarukamo agasinya amezi atandatu
Rutahizamu w'Umunye-Congo Mindeke Fukiani na we yatangiye igeragezwa muri Rayon Sports

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .