00:00:00 IGIHE NETWORK KN KINYARWANDA EN ENGLISH FR FRANCAIS

Haravugwa amanyanga mu gushaka ikipe izamuka hagati ya Rwamagana City na AS Muhanga

Yanditswe na Hakizimana Jean Paul
Kuya 12 June 2022 saa 10:55
Yasuwe :

Ikipe ya Rwamagana City irashinja Ferwafa gushaka kuyiriganya umwanya wo kuzamuka mu cyiciro cya mbere nyuma yo kuvuga ko iyi kipe yarezwe na AS Muhanga ko yakinishije umukinnyi ufite amakarita atatu ngo ntimenyeshwe ko yarezwe.

Rwamagana City ni imwe mu makipe ane yatsindiye itike ya ½ aho kuwa Gatandatu tariki ya 11 Kamena yari gukina na Interforce, iyi mikino yaje kwimurwa na Ferwafa nyuma yo kuvuga ko AS Muhanga yatsinzwe na Rwamagana City yareze iyi kipe.

Umunyamabanga Mukuru wa Ferwafa, Muhire Henry yabwiye RBA ko AS Muhanga yareze iyi kipe kuri ubu akaba aribyo bari gukurikirana kandi ngo nibasanga aribyo koko Rwamagana City izaterwa mpaga inakurwe mu irushanwa hakomeze AS Muhanga.

Mu ibaruwa kuri uyu wa Gatandatu Rwamagana City yandikiye Ferwafa, yavuze ko itigeze imenyeshwa iki kirego ko ahubwo yakibonye mu itangazamakuru iyisaba kuyimenyesha ikirego uko giteye.

Mu ibaruwa yanditswe na Perezida wa Rwamagana City, Uwimana Nehemie, yavuze ko bashingiye ku byo babona mu binyamakuru ndetse n’ikiganiro uyu munyamabanga yatanze yemeza ko barezwe na AS Muhanga, ariko ntibabimenyeshwe ndetse ngo bamenye n’ibyo baregwa.

Bashingira kandi ku mategeko avuga ko iyo umukino wasojwe ikipe ifite ikibazo irega indi mu gihe kitarenze amasaha 48 ikipe iregwa ikabimenyeshwa ariko bikaba bitarakozwe.

Ati “Mbabajwe no kubandikira tubasaba kuzakurikirana neza iby’icyo kirego kandi tubasaba muri rusange nk’umuryango wa Ferwafa ko igihe ikipe yareze indi hajya hubahirizwa amategeko agenga amarushanwa kandi ikipe irezwe igahabwa umwanya wo kwisobanura nk’uko biteganywa n’amategeko, tukaba tuboneyeho mwatumenyesha icyo kirego.”

Haba hari akagambane kari gukorwa?

Ikipe ya AS Muhanga yabanje gutsinda Rwamagana City 1-0 mu mukino ubanza wabereye i Rwamagana, mu mukino wo kwishyura wabereye i Muhanga Rwamagana City yishyuye AS Muhanga igitego kimwe yari yayibanje iyitsinda n’icya kabiri bituma iyisezerera nyamara bitari byitezwe.

Gusa nyuma y’uko Muhanga itsinzwe ntiyigeze irekera gukora imyitozo ngo kuko ubuyobozi bwayo bwabwiye abakinnyi ko bakomeza gukora imyitozo kandi ko bazakina shampiyona y’icyiciro cya mbere.

Umwe mu bakinnyi ba AS Muhanga waganiriye na IGIHE yavuze ko kuva iyi kipe yabatsinda muri ¼ batigeze bahagarika imyitozo ngo kuko ubuyobozi bwababwiye ko bazazamuka mu cyiciro cya mbere.

Ati “ Ni ugutegereza ntabwo biremezwa ko tuzamuka, ubuyobozi bwatubwiye ko bishoboka, sindabimenya neza ubanza hari amanyanga bakoze gusa turakora imyitozo kugira ngo batazadutungura tugakina tudafite imyitozo.”

Mu ibaruwa abayobozi ba Rwamagana City bandikiye Ferwafa bagaragaje abakinnyi babo baheruka kubona amakarita y’umuhondo banagaragaza ko uwahawe ikariya ya gatatu y’umuhondo atigeze akina basaba kurenganurwa ngo kuko nta mukinnyi bigeze bakinisha yari yujuje amakarita atatu.

Hari abasesengura bavuga ko impamvu Ferwafa yanga ko Rwamagana City izamuka ari uko itizeye amikoro yayo mu cyiciro cya mbere.

Si ubwa mbere Rwamagana City yaba itewe mpaga kuko no mu 2017 yatsindiye itike yo kuzamuka mu cyiciro cya mbere nabwo iterwa mpaga isimbuzwa Miroplast FC ihamijwe ko yakinishije umukinnyi utari kuri lisiti yari yemewe na Ferwafa.

Haravugwa amanyanga mu gushaka ikipe izamuka hagati ya Rwamagana City na AS Muhanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .