Umusifuzi Hakizimana Louis yahagaritswe kubera umukino wahuje Rayon Sports na Police FC

Yanditswe na Eric Tony Ukurikiyimfura
Kuya 22 Nzeri 2019 saa 09:41
Yasuwe :
0 0

Umusifuzi mpuzamahanga Hakizimana Louis yahagaritswe igihe kingana n’ibyumweru bine ashinjwa kuba ataritwaye neza mu mukino Rayon Sports yatsinzemo Police FC mu irushanwa ry’Agaciro Cup 2019.

Uyu mukino wabaye tariki ya 15 Nzeri, warangiye Rayon Sports igeze ku mukino wa nyuma ubwo yatsindaga penaliti 4-3.

Umutoza wa Police FC, Haringingo Francis yavuze ko we asanga ikipe ye yari kwitwara neza kuri uyu mukino, ariko abasifuzi bagira uruhare runini mu gutuma iwutakaza.

Ubuyobozi bw’iyi kipe y’abashinzwe umutekano bwahise bwandikira FERWAFA, busaba kurenganurwa ku misifurire bwavuze ko yari ibogamye.

Muri uyu mukino, Haringingo Francis yahawe ikarita itukura ku munota wa 59 nyuma y’uko abwiye abasifuzi ko banze igitego ikipe ye yatsinze ubwo Iradukunda Eric yakuraga umupira mu izamu ndetse na penaliti yashoboraga guhabwa ikipe ye ubwo Nshuti Savio Dominique yagushwaga mu rubuga rw’amahina.

Bamwe mu barebye uyu mukino bibajije kandi ku basifuzi bayobowe na Hakizimana Louis mu gihe cyo gutera penaliti, aho umunyezamu wa Rayon Sports, Kimenyi Yves yakuyemo ebyiri za Police FC, ariko yabanje kuva mu murongo mbere y’uko Mpozembizi Mohamed na Iyabivuze Osée batera umupira.

IGIHE yamenye ko Gasingwa Michel ukuriye Komisiyo y’abasifuzi muri FERWAFA, yagiye gusaba amashusho kuri imwe muri Televiziyo za hano mu Rwanda ngo we na bagenzi be babashe gusesengura ibyo Police FC yaregeye.

Kuri uyu wa Gatandatu ni bwo FERWAFA yashyize hanze itangazo rimenyesha ko Hakizimana yahagaritswe ibyumweru bine mu marushanwa y’imbere mu gihugu.

Hakizimana Louis asanzwe afatwa nk’umusifuzi wa mbere mu Rwanda ndetse yitabajwe mu Gikombe cya Afurika cya 2019 giheruka kubera mu Misiri.

Uyu mugabo amaze kuyobora kandi imikino yo mu marushanwa akomeye hano ku mugabane wa Afurika arimo CAF Champions League, gushaka itike y’igikombe cya Afurika mu batarengeje imyaka 17, 20, 23, icy’abakuru n’Igikombe cy’Isi.

Ibihano yahawe, bizatuma atajya mu bashobora gutoranywamo uyobora umukino wa FERWAFA Super Cup tariki ya 1 Ukwakira ndetse n’iminsi itatu ibanza ya Shampiyona y’u Rwanda izatangira tariki ya 4 Ukwakira 2019.

Umukino wahuje Rayon Sports na Police FC mu Agaciro Cup 2019 wavugishije benshi kubera imisifurire yawuranze
Hakizimana Louis yahagaritswe ibyumweru bine ashinjwa kwitwara nabi mu mukino wahuje Rayon Sports na Police FC

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza