00:00:00 IGIHE NETWORK KN KINYARWANDA EN ENGLISH FR FRANCAIS

Hahishuwe urutonde rugaragaza ko Lewandowski ari we uzatwara Ballon d’Or ya 2021

Yanditswe na Bukuru JC
Kuya 27 Ukwakira 2021 saa 09:04
Yasuwe :
0 0

Hari Ifoto yagiye ahagaragara, bivugwa ko ari rwo rutonde rwa nyuma rw’uburyo abakinnyi bakurikirana mu bihembo bya Ballon d’Or y’uyu mwaka wa 2021, igaragaza ko Robert Lewandowski ukinira Bayern Munich ari we uri ku mwanya wa mbere.

Iyi foto ikomeje gucicikana mu itangazamakuru no ku mbuga nkoranyambaga zitandukanye, bivugwa ko yavuye muri France Football [ikinyamakuru cyo mu Bufaransa gitanga Ballon d’Or], igaragaza ko ari urutonde rwakozwe ku wa 25 Ukwakira ndetse ruriho uburyo abakinnyi bose bakurikirana.

Gusa, byateje impaka kuri benshi, bibaza niba ari ukuri cyangwa ari impimbano.

Niba iyi foto ari yo, ubwo rutahizamu wa Bayern Munich ni we uzegukana igihembo bwa mbere ubwo kizaba kizatangwa ku wa 29 Ugushyingo 2021.

Kuri urwo rutonde, bigaragara ko yagize amajwi 627 mu bihugu 176 byatoye, akurikiwe na Lionel Messi wakabaye atwara iki gihembo ku nshuro ya karindwi.

Rutahizamu wa Real Madrid, Karim Benzema, ari ku mwanya wa gatatu n’amanota 526 nubwo ari mu bafashije cyane ikipe ye n’u Bufaransa muri uyu mwaka.

Gusa, nubwo ifoto yagiye hanze yaba ari yo cyangwa itari ukuri, Lewandowski yaba akwiye igihembo kuko uyu mukinnyi w’imyaka 33 ari we wahabwaga amahirwe menshi yo kucyegukana mu mwaka ushize, ariko nticyatangwa kubera icyorezo cya COVID-19.

Uyu rutahizamu w’Umunya-Pologne yatsinze ibitego 17 mu mikino 13 amaze gukina muri uyu mwaka w’imikino, aho afite impuzandengo y’igitego muri buri minota 56 yakinnye muri Champions League n’igitego mu minota 72 y’umukino wa Bundesliga.

Messi ntabwo arafatisha neza muri Paris Saint-Germain, ariko yitwaye neza mu mwaka ushize w’imikino akiri muri FC Barcelone, aho yinjije ibitego 38, atanga imipira 14 yavuyemo ibindi bitego kuri bagenzi be mu marushanwa yose.

Mohamed Salah ari ku mwanya wa kane, akurikiwe na Jorginho, N’Golo Kanté ku mwanya wa karindwi, Cristiano Ronaldo ku mwanya wa cyenda mu gihe Kevin De Bryune ari uwa 10.

Uko abakinnyi bakurikirana kuri urwo rutonde:

  1. Robert Lewandowski (Bayern Munich)
  2. Leo Messi (PSG)
  3. Karim Benzema (Real Madrid)
  4. Mohamed Salah (Liverpool)
  5. Jorginho (Chelsea)
  6. Kylian Mbappé (PSG)
  7. N’ Golo Kanté (Chelsea)
  8. Erling Haaland (Dortmund)
  9. Cristiano Ronaldo (ManchesterUnited)
  10. Kevin de Bruyne (Manchester City)
  11. Gianluiggi Donnarumma (PSG)
  12. Luka Modric (Real Madrid)
  13. Giorgio Chiellini (Juventus)
  14. Harry Kane (Tottenham)
  15. Bruno Fernandes (Manchester United)
  16. Ruben Dias (Manchester City)
  17. Romelu Lukaku (Chelsea)
  18. Pedri (Barcelona)
  19. Neymar (PSG)
  20. Riyad Mahrez (Manchester City)
Robert Lewandowski arahabwa amahirwe yo kwegukana Ballon d’Or ya 2021

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .