Gutera umupira n’umutwe bigira ingaruka ku bwonko ndetse bishobora gutera indwara ya “Dimentia"

Yanditswe na Eric Tony Ukurikiyimfura, Kabera Haruna
Kuya 14 Nyakanga 2020 saa 12:37
Yasuwe :
0 0

Amabwiriza mashya abuza gukinisha umutwe ku bana bakiri bato yatangiye gutekerezwaho nyuma y’uko hari ubushakashatsi bugaragaje ko abahoze bakina umupira w’amaguru bapfa bazize indwara yo kwangirika k’ubwonko.

Gukinisha umutwe ni kimwe mu bigize imikino itandukanye cyane umupira w’amaguru, ariko bishobora kugira ingaruka ku babikora cyane.

Ni iki kiba ku bwonko iyo uteresheje umupira umutwe?

Ubwoba bukomeje kwiyongera ko gukinisha umutwe mu buryo buhoraho byongera ibyago byo kuba abakinnyi b’umupira w’amaguru bagira uburwayi bwa “dementia” bwo kwibagirwa cyane iyo bageze mu zabukuru ndetse bukanabahitana.

Umupira w’amaguru upima hafi ikilo, ndetse abashakashatsi bapimye ko ushobora gukubita ku mutwe w’umukinnyi uri ku muvuduko w’ibilometero 128 ku isaha.

Iyo umupira ukubise ku mutwe, ubwonko bureremba mu magufa y’imbere, buricugusa bugakora kuri ayo magufa y’umutwe bigatuma hari icyo bwangirikaho ndetse hari igihe bituma umuntu azengera cyangwa akabura ubwenge by’igihe gito.

Ubushakashatsi bwakozwe na Kaminuza ya British Columbia mu 2018, bwagaragaje ko ikigero cy’amaraso mu tunyangingo dutunze ubwonko, cyiyongera iyo umukinnyi amaze guteresha umupira umutwe.

Guteresha umupira umutwe inshuro imwe, nta cyo byangiza kigaragara ariko nyuma y’igihe runaka bitewe n’inshuro byabaye, bishobora guteza ibindi bibazo.

Ni ibihe bimenyetso bigaragaza ko byongera ibyago bya dementia?

Iki kibazo cyatangiye kugarukwaho mu 2002 nyuma y’urupfu rw’uwahoze ari umukinnyi wa West Bromwich Albion n’Ikipe y’u Bwongereza, Jeff Astle, wapfuye afite imyaka 59.

Astle yari yararwaye indwara ifitanye isano na dementia. Irindi suzuma ryakorewe ubwonko bwe mu 2014, ryagaragaje ko yahitanywe na chronic traumatic encephalopathy (CTE), aho akenshi iyi ndwara iterwa no kwangirika ku bwonko bitewe n’ibipfunsi, umuntu akibagirwa cyane, agahangayika ndetse akarangwa no kwibagirwa.

Byemejwe ko kandi ubwonko bwa Astle bwari bwarangiritse mu gihe kirekire bitewe n’uko yatereshaga umutwe imipira iremereye ikoze mu ruhu.

Muri Gashyantare 2017, abashakashatsi bo muri Kaminuza ya Londres (UCL) n’iya Cardiff, bashyize hanze ibizamini by’isuzuma ryakorewe imirambo, by’ubwonko bw’abantu batandatu bahoze ari abakinnyi, bigaragaza ko bane muri bo bari barwaye CTE.

Prof Huw Morris wo muri UCL, icyo gihe yabwiye BBC ati “Twabonye impinduka zitandukanye ku bahoze ari abakinnyi b’iteramakofe, zifite aho zihuriye n’ukwangirika k’ubwonko inshuro zitandukanye kandi byagize uruhare mu gukura k’uburwayi bwa dementia.”

Mu mwaka ushize wa 2019, ubushakashatsi bwa Kaminuza ya Glasgow bwagaragaje ko abahoze bakina umupira w’amaguru bakubye gatatu n’igice abo banganya imyaka, mu kugira ibyago byo kuba bahitanwa na dementia.

Gusa nta kimenyetso simusiga kigaragaza ko gutera umupira n’umutwe bitera dementia. Bishobora gusaba ubushakashatsi bwimbitse.

Kubera iki bigoye kubihuza?

Ibitera uburwayi bwa dementia ni byinshi kandi biragoye kubisobanukirwa, ariko bikunze kujyana n’imyaka, ubuzima umuntu abayemo n’inkomoko ye y’umuryango.

Kwangirika k’ubwonko bishobora kuba kimwe muri ibyo, ariko ubuzima butameze neza burimo kunywa itabi, kunywa inzoga nyinshi no kubyibuha bikabije nabyo bishobora guteza ibyo byago.

Guhuza uburyo ibintu byose bishobora guhura no gukina biragoye.

Abashakashatsi bakomeje kubyigaho

Kaminuza ya Londres (LSHTM), iya Queen Mary n’Ishuri rikuru rya Occupational Medicine, zatangije ubushakashatsi ku bahoze ari abakinnyi b’umupira w’amaguru 300.

Zifite gahunda yo gupima abahoze ari abakinnyi, bari hagati y’imyaka 50 na 85, inshuro nyinshi zitandukanye, zigasesengura ubushobozi bw’umubiri wabo n’ubwenge. Ibi bizahuzwa kandi n’igihe bamaze bakina ndetse n’ubuzima babayemo.

Bizafasha kugereranya hagati ya ba myugariro na ba rutahizamu n’abandi bakinnyi bashobora kuba bakinisha umutwe inshuro nkeya.

Ibizava muri ubu bushakashatsi, bizagereranywa n’ibyavuye mu bwiswe “1946 Birth Cohort” bwakozwe ku baturage basanzwe bavutse muri uwo mwaka.

Prof Neil Pearce wo muri LSHTM, uyoboye ubu bushakashatsi, yavuze ko batazi “Ikigero cy’ingaruka gutera umupira n’umutwe bigira ku bwonko” ku buryo umuntu ashobora kubura ubwenge by’igihe gito cyangwa kuba abikoze kenshi hari icyo byakwangiza.

Ati "Ubu bushakashatsi, ku nshuro ya mbere, buzatanga ibimenyetso bifatika byerekana ingaruka z’igihe kirekire ku mikorere y’ubwonko biturutse mu gukina umupira w’amaguru bya kinyamwuga."

Mu 2017, Ishyirahamwe ry’umupira w’amaguru muri Amerika ryakuyeho gukinisha umutwe ku bana bafite imyaka 10 n’abari munsi yayo mu gihe n’abari hagati y’imyaka 11 na 13, basabwe kujya babikora inshuro enye.

Mu ntangiriro z’uyu mwaka, Ishyirahamwe ry’Umupira w’Amaguru muri Écosse, ryatangaje ko rigiye gusuzuma niba ryakuraho guteresha umupira umutwe ku bana bari munsi y’imyaka 12.

Guteresha umupira n'umutwe bikomeje gukorwaho ubushakashatsi nyuma y'uko hagaragajwe ko byaba byangiza ubwonko ndetse bikaba byateza uburwayi bwa dimentia

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .