00:00:00 IGIHE NETWORK KN KINYARWANDA EN ENGLISH FR FRANCAIS

Gutegura, igihombo n’irumbuka ry’ibitego mu byo kwitega mu mikino yo kwishyura ya Shampiyona

Yanditswe na Byiringiro Osée Elvis, Eric Tony Ukurikiyimfura
Kuya 20 Mutarama 2023 saa 10:38
Yasuwe :

Nyuma y’iminsi 29 yari ishize Shampiyona y’Icyiciro cya Mbere mu Rwanda idakinwa, kuri uyu wa 20 Mutarama 2023 irongera gusubukurwa hakinwa Umunsi wayo wa 16, uwa mbere w’igice cyayo cya kabiri kigizwe n’imikino yo kwishyura.

Shampiyona y’u Rwanda mu mupira w’amaguru yaherukaga gukinwa ku wa 23 Ukuboza 2022 aho imikino ibanza yarangiye AS Kigali ari iya mbere n’amanota 30, iyanganya na Kiyovu Sports mu gihe APR FC, Gasogi United na Rayon Sports zinganya amanota 28.

Mu mikino 120 yakinwe mu mezi atanu ashize, hinjiye ibitego 263. Si bike, ariko ibishobora kwinjizwa mu mikino izaba uhereye kuri uyu wa Gatanu, bishobora kurenga ibyo.

Bitandukanye n’uko byari bimeze mu mikino ibanza, amakipe arindwi yakiriraga kuri Stade ya Kigali, yigabanyije kuri Stade ya Muhanga n’iya Bugesera kubera ko iki kibuga cy’i Nyamirambo kiri kuvuguruwa. Nta gushindikanya ko hari icyo bizasobanura mu biboneka ku mikino.

Mbere y’uko iyi mikino ya Shampiyona isubukurwa, IGIHE yakusanyije bimwe mu bishobora kuranga imikino 120 isigaye kugira ngo hamenyekane ikipe izegukana igikombe cy’uyu mwaka w’imikino wa 2022/23 n’amakipe abiri azamanuka muri Gicurasi.

Abatoza bamwe babonye urwitwazo rw’amasaha

Mu gice kibanza cya Shampiyona cyakinwe hagati ya tariki ya 19 Kanama n’iya 23 Ukuboza 2023, nta mikino yatangiraga ku masaha yo kurya ibya ku manywa (12:30).

Iyo byabaga ngombwa ko ikibuga, cyane icya Stade ya Kigali, gihurirwaho n’imikino ibiri ku munsi, uwa mbere watangiraga saa Cyenda, uwa nyuma w’umunsi ugashyirwa saa Kumi n’ebyiri n’Igice.

Gusa, kuri ubu biratandukanye. Nyuma y’uko Stade ya Kigali ikuwe mu bibuga bishobora kwifashishwa muri aya mezi ya mbere ya 2023 kubera ko iri gushyirwamo ikibuga gishya, hari imikino izajya itangira saa Sita n’Igice.

Iyo irimo izajya ibera ku bibuga bya Muhanga ndetse na Bugesera kubera ko byo bidafite amatara yo ku rwego rwifuzwa ku buryo byakwakira imikino mu masaha y’ijoro.

Gukinira kuri aya masaha mu gihe izuba riba rikubitira mu gihorihori ndetse bikaba bisaba abakinnyi guhindura amasaha bafatiraho amafunguro, bishobora kuba urwitwazo ku bakinnyi n’abatoza bamwe batabona umusaruro wifuzwa.

Gorilla FC na Police FC ni zo zifungura igice cyo kwishyura cya Shampiyona

Umunaniro, igihombo n’ibirarane by’imishahara

Nk’uko twabivuze haruguru, imwe mu nkuru ikomeye yaranze imyiteguro y’isubukurwa rya Shampiyona, ni ukwimuka ku makipe arindwi asanzwe yakirira imikino yayo kuri Stade ya Kigali i Nyamirambo iri kuvugurwa.

Rayon Sports, Police FC na Kiyovu Sports zakiriraga i Nyamirambo, ubu zagiye i Muhanga n’aho APR FC, AS Kigali, Gasogi United na Gorilla FC na zo zizakirira imikino yazo kuri Stade ya Bugesera.

Izi ngendo zo kujya mu ntara zitezweho kongera umunaniro ku bakinnyi mu gihe amakipe yabo yaba ahisemo kujya yerekeza ku kibuga ku munsi w’umukino.

Bishobora kandi kongera ingengo y’imari benshi batari barateganyije mu gihe ikipe yahitamo gucumbika hafi y’ikibuga mu gihe yitegura umukino.

Nta gushidikanya kandi ko bishobora gutiza umurindi ikibazo cyo kudahembera igihe ku makipe kubera ko bamwe mu bafana bashobora kubona ko kujya kuyashyigikira mu ntara bigoye.

Nubwo amafaranga yinjira ku mikino aba atari menshi cyane ku buryo yatunga ikipe, ariko usanga abayobozi b’amakipe bayarambirijeho ku buryo igabanuka ry’abafana bajya ku bibuga kubera urugendo rurerure, rishobora guteza igihombo kitari cyitezwe.

Kugira ngo ubyumve neza, umukino wa APR FC na Rayon Sports, uwa Rayon Sports na Kiyovu Sports n’uwa Kiyovu Sports na APR FC, iri mu yinjiriza akayabo aya makipe akunzwe cyane mu Rwanda, yose izabera mu ntara.

Stade ya Kigali ntizifashishwa muri Shampiyona muri aya mezi atatu ya mbere ya 2023
Haringingo Francis uri mu mazi abira, afite akazi katoroshye ko kugarurira icyizere Aba-Rayons

Intambara y’amakipe ashaka igikombe n’ahatanira kutamanuka

Benshi bakunze kwita ku makipe ahatanira igikombe ariko burya no mu ari hasi haba hari akazi gakomeye cyane ko guhatanira kutamanuka mu Cyiciro cya Kabiri, abagezeyo bavuga ko kuvayo biba bigoye cyane.

Muri uyu mwaka, Espoir FC na Marines FC ni zo kipe ziri mu murongo utukura ku buryo zifite amahirwe menshi yo kwisanga mu Cyiciro cya Kabiri.

Mu rwego rwo kwirinda ibi, Marines FC yakubise inzu ibipfunsi ishaka abakinnyi yakongeramo, icyakora APR FC yayitije bane, bishimangira iryo Umunyarwanda yavuze ati “Umuvandimwe aberaho gukura abandi mu byago”.

Iyi kipe izwiho kuzamura abana yagize intangiriro mbi za Shampiyona, ahanini bitewe no gutakaza abakinnyi benshi nk’uko umutoza wayo Rwasamanzi Yves akunze kubivuga.

Mu mikino 15 ibanza, Marines FC yatsinze umukino umwe, inganya ine, itsindwa 10. Yinjije ibitego 13 yinjizwa 27. Cyakora abafana bayo bizeye ko yazava muri ibi bihe kuko abakinnyi bashya bazaba bamenyeranye ndetse n’abandi bane yatijwe bitezweho gutanga umusaruro nk’abavuye mu ikipe ikomeye.

Espoir FC iri ku mwanya wa nyuma n’amanota arindwi, iyi kipe y’i Rusizi irusha izindi zose ibyago byo kumanuka mu Cyiciro cya Kabiri.

Iyi kipe mu mikino 15 yakinnye, yatsinze umwe, inganya ine, itsindwa icumi. Ifite agashya ko kwinjiza ibitego bine byonyine na byo byatsinzwe n’umukinnyi umwe gusa, Irokan Samson, mu gihe yinjijwe ibitego 21.

Uyu musaruro mubi ni wo watumye ihagarika umutoza Bisengimana Justin ndetse yamaze kumusimbuza Niyonkuru Gustave [uyu ntaratangazwa byeruye kuko ikipe ikiri guharura neza ibyo gutandukana na we mu mahoro].

Mu gukomeza gushaka ibisubizo by’ibibazo irimo iyi kipe yirukanye abakinnyi bane bayirumbiye nka myugariro Munezero Fiston, Byumvuhore Tresor ‘Wanyama’, ba rutahizamu Bigirimana Issa ndetse na Drissa Dagnogo. Kuri ubu, ikomeje gusinyisha abandi bashobora kuyikura mu manga.

Ntiwavuga amakipe ari mu byago byo kumanuka mu Cyiciro cya Kabiri ngo urenze ingohe Rwamagana City na yo iri hafi aho kuko irushwa Espoir FC na Marines FC amanota atatu gusa. Kimwe n’izi zindi, na yo ikomeje gushaka uburyo yongeramo abakinnyi bayifasha kubona amanota menshi hakiri kare.

Espoir FC iri mu makipe afite byinshi byo guhindura muri Shampiyona

Imisifurire, gutegura n’irumbuka ry’ibitego

Arakina/arasifura nk’uwariye! Iri jambo cyangwa andi ajya kumera nka ryo uzayumva cyane mu mikino 120 igiye gukinwa guhera kuri uyu wa Gatanu.

Nubwo nta gihamya, Shampiyona y’u Rwanda iri mu zivugwamo gutegura cyangwa ruswa (match-fixing) by’umwihariko iyo bigeze mu mikino yo kwishyura kuko ari yo igena ikipe ishobora gutwara igikombe cyangwa izishobora kumanuka.

Ijambo gutegura ni rigari muri Ruhago Nyarwanda kuko rishobora gusobanura byinshi birimo gutegura neza ikipe yawe cyangwa gutegura uwo mugomba guhangana, byaba na ngombwa ugomba guhangana na mukeba wawe. Ibi kandi ntibinajya kure y’imisifurire na yo ikunda kugarukwaho muri iyi mikino.

Muri iki gice cya Shampiyona, hitezweho ko umubare w’ibitego ushobora kurumbuka ugereranyije n’ibigera kuri 263 byatsinzwe mu mikino 120 ibanza.

Amakarita abakinnyi bazabona na yo ashobora kwiyongera dore ko na yo hari kinini amara mu kugena uburyo imikino ishobora kugenda.

Ibya Rayon Sports birasobanuka mu minsi itanu ya mbere

Murera nk’uko abakunzi bayo bayita, yatangiye neza Shampiyona ndetse igera n’aho yatsinze imikino itandatu ya mbere yikurikiranya.

Ibintu byaje guhinduka kuko mu mikino icyenda yakurikiye yabonyemo amanota icumi gusa. Hiyongeraho no gutsindwa n’abakeba nka APR FC na Kiyovu Sports n’izindi nka Musanze FC, Etincelles FC na Gasogi united.

Izi ntsinzwi zazamuye igitutu gikomeye ndetse umutoza Haringingo Francis atangira kwibazwaho kuko no kwirukanwa byavuzwe.

Muri iyi mikino yo kwishyura, iby’iyi kipe y’abafana benshi byitezwe gusobanuka mu mikino itanu ibanza yo kwishyura kuko izahuramo n’amakipe bahataniye igikombe ndetse n’andi wakwita mato kuri yo gusa yayitsinze.

Rugikubita, Rayon Sports izatangira yakira Musanze FC yayitsinze, ijye kwa Mukura VS, yakire Kiyovu Sports, isure APR FC ubundi yakire Gasogi united.

Bivuze ko kubona amanota kenshi ashoboka kuri iyi mikino, Rayon Sports yaba itanze ubutumwa ko ihari ndetse izatanga akazi. Gusa mu gihe aya makipe yayisubira iby’igikombe byaba bitangiye gusaba ibitangaza bya ruhago.

Imikino yo kwishyura igiye gutangira mu gihe Rayon Sports itarashyira umucyo ku kibazo cya rutahizamu imaranye iminsi. Magingo aya, umucunguzi ni Umunye-Congo Nzinga Luvumbu wasinye amezi atandatu mu mpera z’umwaka ushize.

Haringingo Francis uri mu mazi abira, afite akazi katoroshye ko kugarurira icyizere Aba-Rayons

APR FC igarutse ikibazwaho

Nk’ikipe ifite Igikombe cya Shampiyona giheruka ndetse buri gihe iba ifite ijambo mu marushanwa y’imbere mu Gihugu, nta wavuga ku mupira wo mu Rwanda ngo yibagirwe APR FC.

Iyi Kipe y’Ingabo ntiyasoje neza imikino ibanza nubwo irushwa amanota abiri gusa n’amakipe abiri ayiri imbere.

Mu gihe havugwa byinshi ku bijyanye no gusubira kuri gahunda yo gukinisha abanyamahanga, APR FC ntiyahiriwe n’imikino yo kwitegura igice cyo kwishyura cya Shampiyona.

Bijya gutangira, yatsinzwe na Marines FC ibitego 2-1 mu mukino wabereye i Rubavu, hakurikiraho uwa Bugesera FC ku wa Gatatu, na wo warangiye itsinzwe ibitego 1-0.

Ni uko ari ibitabara? APR FC izasubukura Shampiyona yakira Mukura VS i Bugesera ku Cyumweru.

 Gahunda y’Umunsi wa 16 wa Shampiyona

Ku wa Gatanu, tariki ya 20 Mutarama 2023

  • Gorilla FC vs Police FC (Stade Bugesera, 12:30)
  • Gasogi United vs Kiyovu Sports (Stade Bugesera, 15:30)

Ku wa Gatandatu, tariki ya 21 Mutarama 2023

  • AS Kigali vs Marines FC (Stade Bugesera, 15:00)
  • Espoir FC vs Rwamagana City (Rusizi, 15:00)

Ku Cyumweru, tariki ya 22 Mutarama 2023

  • Rutsiro FC vs Etincelles FC (Stade Umuganda, 15:00)
  • Bugesera FC vs Sunrise FC (Stade Bugesera, 12:30)
  • APR FC vs Mukura VS (Stade Bugesera, 15:30)
  • Rayon Sports vs Musanze FC (Stade Muhanga, 15:00)

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .