Gukinira muri Stade ya Radès byateye ubwoba abakinnyi b’Amavubi muri CAN 2004

Yanditswe na Eric Tony Ukurikiyimfura
Kuya 28 Werurwe 2020 saa 08:44
Yasuwe :
0 0

Uwahoze ari myugariro w’Ikipe y’Igihugu Amavubi, Nshimiyimana Canisius, yavuze ko ubwo Amavubi yakinaga n’Ikipe y’Igihugu ya Tunisia mu Gikombe cya Afurika cya 2004, we na bagenzi be bagize ubwoba bwo gusohoka muri Stade ya Radès ngo bajye kwishyushya.

Nshimiyimana Canisius utagikina umupira w’amaguru, ahubwo akaba ari umutoza w’Ikipe y’Abato ya Mukura Victory Sports, yabigarutseho mu kiganiro yagiranye na IGIHE.

Uyu wakinaga inyuma ku ruhande rw’iburyo, yavuze ko ubwo abakinnyi b’Amavubi biteguraga kujya kwishyushya mbere y’uwo mukino w’amateka bahuyemo na Tunisia, ku nshuro ya mbere u Rwanda rukina Igikombe cya Afurika, babanje kugira ubwoba bitewe n’induru y’abafana bari buzuye Stade ya Radès.

Ati “Kuva kuri stade za hano ukajya ku yakira abantu ibihumbi 60 kuzamura, byaguteragamo akantu k’ubwoba, ariko kubera ko twari tugiye guhagararira igihugu, tugiye guhagararira miliyoni z’Abanyarwanda, turavuga tuti duhagarare kigabo, tubyitwaremo kigabo.”

Uwo mukino wafunguye Igikombe cya Afurika cya 2004, warangiye Tunisia yari imbere y’abafana bayo, itsinze u Rwanda ibitego 2-1.

Nshimiyimana avuga ko abakinnyi bahuye nabo, bakinaga i Burayi, bo bari ku rwego rwisumbuye.

Ati “Sinavuga ko nta kidasanzwe nabonyemo gusa nahakuye ubundi bumenyi ntari nzi no gufunguka mu maso; burya mu mupira byose birashoboka, nshobora kuva kuri uru rwego nkagera ku rundi. Yego wenda twitoreje i Burayi, ariko twahamaze igihe gito, ntabwo byari nk’uko twahuye n’abahakina mu kibuga kandi noneho duhanganye. Urwego rwacu rwari rutandukanye n’urwabo.”

Nshimiyimana Canisius aherutse gusohora igitabo yise ‘’My Gutsy Story, From Nyabisiga Ground to Rades Stadium’’, cyasohotse mu 2017, kigaruka ku rugendo rwe mu mupira w’amaguru, aho avuga ko yashakaga kwereka abakiri bato ko aho bahera hose bakina bishobora kurangira bageze ku rwego ruhambaye.

Ateganya kandi gusohora ikindi gitabo kigaruka ku marozi avugwa mu mupira w’amaguru dore ko yamaze imyaka isaga 12 ari umukinnyi ndetse kuri ubu akaba awubamo nk’umutoza.

Silva Dos Santos wa Tunisia ahanganiye umupira na Bizagwira Léandre, Nshimiyimana Canisius na Sibomana Abdul b'u Rwanda
Nshimiyimana Canisius ahanganiye umupira na Dos Santos
Stade ya Radès yakira abafana bagera ku bihumbi 65
Umutoza w'Ikipe y'Abato muri Mukura Victory Sports, Nshimiyimana Canisius yavuze ko we na bagenzi be babanje gutinya kujya kwishyushya muri Stade ya Radès

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .