Gorilla FC yegukanye igikombe cy’Icyiciro cya Kabiri (Amafoto)

Yanditswe na Eric Tony Ukurikiyimfura
Kuya 22 Ugushyingo 2020 saa 08:34
Yasuwe :
0 0

Ibifashijwemo na rutahizamu Sindambiwe Protais, Gorilla FC yegukanye igikombe cy’Icyiro cya Kabiri itsinze Rutsiro FC ibitego 2-1 ku mukino wa nyuma wa playoffs wabaye ku wa Gatandatu kuri Stade Amahoro.

Amakipe yombi yahuriye muri uyu mukino nyuma y’uko atsindiye kuzamuka mu Cyiciro cya Mbere mu mwaka utaha w’imikino wa 2020/21.

Gorilla FC yagerageje kurema uburyo bwinshi bugana ku izamu mu minota ibanza, ariko inanirwa kububyaza umusaruro.

Iyi kipe yari imaze umwaka umwe gusa mu cyiciro cya kabiri, yafunguye amazamu ku munota wa 12 ku gitego cyatsinzwe na Sindambiwe Protais n’umutwe ku mupira wahinduwe mu rubuga rw’amahina na Tuyisenge Pekeake ‘Pekinho’.

Rutsiro FC yibwiraga ko ishobora guhabwa penaliti ku mupira abakinnyi bayo bagaragaje ko wakozwe na myugariro wa Gorilla FC nyuma yo guterwa na Nkubito Amza, ariko umusifuzi avuga ko nta kosa ryabayeho.

Sindambiwe Protais wari wazonze ab’inyuma ba Rutsiro FC, yatsinze igitego cya kabiri ku munota wa 29 ku mupira wari uvuye iburyo, awukozaho ikirenge, uruhukira mu nshundura.

Mu gice cya kabiri, Rutsiro FC yabonye uburyo bwinshi bwashoboraga kuyihesha igitego, ariko umupira watewe na Nshimiyumuremyi Olivier nyuma yo guhindurwa na Kwizera Bahati Emilien, ukubita umutambiko w’izamu.

Umunyezamu Ntaribi Steven wari wakuyemo imipira myinshi yabazwe irimo n’uwatewe na Habagusenga Gaspard, yakoze ikosa ryo kudafata undi mupira ntiyawukomeza, usanga Nshimiyumuremyi Olivier wawuteye mu izamu.

Mu guhatanira umwanya wa gatatu, Etoile del’Est yawegukanye nyuma yo gutsinda Vision FC ibitego 3-0.

Igitego cya Amini Muzerwa ku munota wa 26, icya Habineza Viateur ku munota wa 37 ndetse n’icya Iraguha Hadji mu gice cya kabiri nibyo byahesheje iyi kipe yo mu Burasirazuba gutahana intsinzi nubwo imaze kunanirwa kuzamuka inshuro ebyiri zikurikiranya, itsindirwa muri ½.

Abakinnyi ba Gorilla FC babanje mu kibuga
Ababanjemo ku ruhande rwa Rutsiro FC
Abakapiteni b'amakipe yombi bifotozanya n'abasifuzi
Abayobozi b'amakipe yombi bari baje kureba uko abakinnyi bitwara
Gorilla FC yabonye uburyo butandukanye mu minota ya mbere
Sindambiwe Proraus ashimirwa n'umutoza Ruremesha Emmanuel nyuma yo gufungura amazamu
Sindambiwe Protais yatsinze ibitego byombi byabonetse mu mukino
Perezida wa FERWAFA, Rtd Brig Gen Sekamana Jean Damascène, yarebye uyu mukino wa nyuma
Abakinnyi ba Gorilla FC bateruye umutoza Lomami Marcel
Abasifuzi bayoboye umukino wa nyuma bambitswe imidali
Abakinnyi ba Gorilla FC bambikwa imidali
Kapiteni wa Gorilla FC, Tuyisenge Pekeake 'Pekinho' ateruye igikombe
Etoile de l'Est yabaye iya gatatu
Rutsiro FC yazamutse nk'ikipe yabaye iya kabiri
Abakinnyi ba Gorilla FC bishimira igikombe begukanye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .