Mu bakinnyi bakuriye mu Karere ka Gatsibo barimo Manishimwe Djabel wa uherutse muri Al-Quwa Al-Jawiya yo muri Iraq, Ruboneka Jean Bosco wa APR FC, Ishimwe Fiston wa Rayon Sports, Hoziyana Kennedy wa Marine FC, Ndayishimiye Celestin wakiniye Amavubi n’abandi.

Nubwo bimeze bityo ariko, aka karere nta kipe kagira ikomeye nk’uko bimeze kuri Kayonza na Nyagatare bigaturiye kuko byo bifite Muhazi United ndetse na Sunrise FC.

Ibi bigaragaza ko aka karere kagakwiye kuba gafite ikipe ugereranyije n’abana bahakurira kandi bagaragaza ko bifuza kuzavamo ibihangange muri ruhago.

Ishimwe Olivier umenyerewe mu itangazamakuru rya siporo akaba anavuka mu Karere ka Gatsibo yateye intambwe ya mbere ashinga irerero rya ‘Gatsibo Football Center’ rihuriyemo n’abana 70 bazatyarizwa gukina ruhago mu gihe cy’ahazaza ndetse bakaba banakora ikipe ihagararira akarere akomokamo.

Uyu yagaragaje ko igitekerezo cyo kwegeranya aba bana cyaturutse ku kuba abari gukina muri Shampiyoina y’u Rwanda kugeza ubu badafite barumuna babo kandi amahirwe yo kubakorera mu ngata ahari.

Ubusanzwe abana bakuriraga mu Karere ka Gatsibo ariko bakaba badafite aho baturutse bigaragara ahubwo ari nko kwishakamo ibisubizo ndetse n’imbaraga zidafite uzitera ingabo mu bitugu.

Ishimwe yavuze ko ubwo hashyizweho ishuri rizwi kandi rizajya riha amahirwe abana bose bizatuma akarere gasubirana izina ryako mu mupira w’amaguru.

Ati “Abana bari basanzwe bakora ku buryo bwa gakondo, nta mikino babona ariko byibuze tuzajya tumenya aho yavuye mu gihe kizaza. Ubu uzajya ubona ko ari ibintu bijyanye n’igihe.”

Mu gikorwa cyo gufungura ku mugaragaro Gatsibo Football Center, abana bamaze kuyigeramo bakinnye umukino wa gicuti batsinda Gahini Football Academy ibitego 2-1.

Abana 70 bakuwe mu bandi 150 ni abafite hagati y’imyaka 6-16, bakaba bazajya bitoza buri munsi nyuma y’amasomo ndetse no mu minsi y’ibiruhuko.

Abana bahawe umukoro wo gukorera mu ngata bakuru babo bari kubyina bavamo.

Abana 70 bashakiwe abatoza bahoraho bazajya bafatanya n'ababyeyi gukurikirana impano zabo

Ishimwe Olivier avuga ko hatagize intambwe iterwa abana bakina ruhago mu Karere ka Gatsibo babura kirengera

Iranzi Jean Claude ni umwe mu bana 70 bazajya bigishwa umupira w'amaguru

Ikipe y'abakinnyi batorezwa muri Gatsibo Football Center

Gahini Football Academy ni imwe mu afite abana biga umupira w'amaguru mu Karere ka Gatsibo

Ishimwe Olivier aganira n'abana yemeye kujya afasha

Abaturage ba Gatsibo bifuza kongera kugira ikipe ihagarariye Akarere

Abana ba Gatsibo Football Center batsinze Gahini Football Academy

Ikibazo cy'impano ziri kugabanuka mu Karere ka Gatsibo kiri kuvugutirwa umuti

Imyitozo izajya ikorwa buri munsi

Abana bari hagati y'imyaka itandatu na 14 ni bo batoranyijwe