Gasogi United yanganyije na Musanze FC mu mukino wabimburiwe n’intambara y’amagambo (Amafoto)

Yanditswe na Eric Tony Ukurikiyimfura
Kuya 21 Ugushyingo 2019 saa 10:28
Yasuwe :
0 0

Gasogi United yanganyije umukino wa gatanu muri Shampiyona ubwo yari yakiriye Musanze FC ku Munsi wa Cyenda wabereye kuri Stade ya Kigali i Nyamirambo kuri uyu wa Kane, amakipe yombi anganya igitego 1-1.

Ni umukino wabimburiwe n’amagambo akomeye hagati ya Perezida wa Gasogi United, KNC n’Umuvugizi wa Musanze FC, Niyonzima Patrick, buri umwe avuga ko ikipe ye ariyo izatahana amanota atatu.

Musanze FC yatangiye neza muri uyu mukino wabimburiye iyindi y’Umunsi wa Cyenda, yafunguye amazamu ku gitego cyatsinzwe na Imurora Japhet ku munota wa 15.

Iyi kipe yo mu Majyaruguru, yabonye ubundi buryo bwo gutsinda igitego cya kabiri ku buryo bwabonywe na Moussa Ally Sova, ariko ateye ishoti Cuzuzo Gaël akiza izamu rye, ashyira umupira muri koruneri.

Gasogi United yashoboraga kwishyura ku munota wa 26, uburyo bwabonywe na Manace Mutatu ntibwagira icyo butanga ubwo umupira wamusigaga ukarenga.

Byasabye gutegereza umunota wa 35, Gasogi ibona igitego cyo kwishyura cyatsinzwe na Tidiane Koné ku mupira wahinduwe na Kazindu Bahati Guy ukagera imbere y’izamu, Muhawenayo Gad akawukubise ibipfunsi usanga uyu Munya-Mali wari uhagaze neza, awushyira mu izamu.

Musanze FC yibwiraga ko ibonye igitego cy’intsinzi ku mupira washyizwe mu izamu na Mugenzi Cédric ahagana ku munota wa 80, ariko umusifuzi wo ku ruhande yemeza ko yari yaraririye.

Kunganya uyu mukino byatumye Gasogi United igira amanota 11 ariko iguma ku mwanya wa munani mu gihe Musanze FC na yo yagize amanota icyenda ikaguma ku mwanya wa 11.

Gahunda y’Umunsi wa Cyenda wa Shampiyona

Ku wa Kane tariki ya 21 Ugushyingo 2019

  • Gasogi United 1-1 Musanze FC

Ku wa Gatanu tariki ya 22 Ugushyingo 2019

  • Sunrise FC vs Heroes FC (Nyagatare Stadium, 15h00)
  • APR FC vs Espoir FC (Stade de Kigali, 15h00)

Ku wa Gatandatu tariki ya 23 Ugushyingo 2019

  • Marines FC vs AS Muhanga (Umuganda Stadium, 15h00)
  • AS Kigali vs Kiyovu Sports (Stade de Kigali, 15h00)

Ku Cyumweru tariki ya 24 Ugushyingo 2019

  • Gicumbi FC vs Rayon Sports FC (Stade de Kigali, 15h00)
  • Bugesera FC vs Mukura VS (Stade Bugesera, 15h00)
  • Etincelles FC vs Police FC (Stade Umuganda, 15h00)
Abakinnyi 11 babanjemo ku ruhande rwa Gasogi United
Abakinnyi ba Musanze FC babanje mu kibuga
Umukino wa Gasogi United na Musanze FC ni wo wabimburiye iyindi y'Umunsi wa Cyenda wa Shampiyona
Umutoza Mukuru wa Gasogi United, Guy Bukasa, yitegereza uko abakinnyi be bitwara mu kibuga
Umutoza wungirije wa Musanze FC, Nduwimana Pablo
Perezida wa Gasogi United, KNC na Perezida wa Rayon Sports Munyakazi Sadate barebye uyu mukino bicaranye
Imurora Japhet yishimira igitego yatsindiye Musanze FC
Umunyezamu wa Gasogi United, Cuzuzo Gaël yari ahagaze neza mu izamu rye
Mugenzi Cédric acenga Dusabe Jean Claude wa Gasogi United
Mbonyingabo Regis atera umupira n'umutwe
Tidiane Koné yishyuriye Gasogi United mbere y'uko amakipe yombi ajya kuruhuka
Uyu Munya-Mali yatsinze igitego cya kabiri muri Gasogi United

Amafoto: Umurerwa Delphin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza