Kuri uyu wa Mbere, tariki ya 24 Gashyantare 2025, ni bwo hakinwe umukino uheruka iy’Umunsi wa 18 wa Shampiyona y’u Rwanda wahuje Gasogi Unitd yakiriye Kiyovu Sports.

Ni umukino wahurije amakipe yombi kuri Kigali Pele Stadium, hari abafana bake cyane, dore ko aya makipe amaze n’igihe adaha ibyishimo abakunzi bayo.

Gasogi United n’ubundi iza hafi ku rutonde rwa Rwanda Premier League, yafunguye amazamu ku gitego cyatsinzwe na Hakizimana Adolphe waherejwe umupira na Hakim Hamiss ku munota wa 20.

Mu ntangiriro z’igice cya kabiri, Kiyovu Sports FC yishyuye iki gitego ku munota wa 50 gishyizwemo na Chérif Bayo, gusa mu mpera z’umukino ku munota wa 82, Udahemuka Jean de Dieu ashyiramo icy’agashinguracumu cya Gasogi United.

Kiyovu Sports yahise itakaza umukino wa gatatu wikurikiranya mu itangira iyo kwishyura ya Rwanda Premier League, iguma ku mwanya wa nyuma ndetse n’umwenda w’ibitego 19.

Ni mu gihe Gasogi United FC yagize amanota 24 ayishyira ku mwanya wa karindwi, mbere yo guhura na Rayon Sports FC.

Urucaca ruzagorwa no kuva mu murongo utukura w’amakipe agomba kujya mu Cyiciro cya Kabiri, ruzakina na Gorilla FC ku Munsi wa 19 wa Shampiyona.

Gasogi United yatsinze Kiyovu Sports ibitego 2-1

Gasogi United yishyuye mu minota ya nyuma

Kiyovu Sports yatsinzwe na Gasogi United irushaho kugana mu manga

Intsinzi ya Gasogi United yongeye gutuma yicuma muri Shampiyona

Uko imikino y'Umunsi wa 18 wa Rwanda Premier League yagenze

Uko amakipe akurikiranye ku rutonde rwa Shampiyona y'u Rwanda imaze gukinwa iminsi 18