Gasogi United yahize kwihimura kuri Mukura VS

Yanditswe na Eric Tony Ukurikiyimfura
Kuya 14 Gashyantare 2020 saa 11:34
Yasuwe :
0 0

Perezida akaba nyiri Gasogi United, Kakoza Nkuriza Charles (KNC), avuga ko umukino uzabahuza na Mukura Victory Sports kuri uyu wa Gatandatu ari umwanya mwiza wo kwihimira kuri iyi kipe yabatsinze mu mikino ibanza ya Shampiyona.

Mukura Victory Sports yabaye ikipe ya mbere yatsinze Gasogi United muri Shampiyona y’Icyiciro cya mbere, ubwo yayitsindaga ibitego 2-1 mu mukino wabaye mu mpera z’Ukwakira 2019 i Huye.

Icyo gihe, Umuyobozi wa Gasogi United, Kakoza Nkuriza Charles (KNC), yavuze ko batishimiye uko uyu mukino wagenze kuko ikipe ye yatsinzwe bidakwiye ndetse yamagana imisifurire yawuranze.

Kuri uyu wa Gatandatu, amakipe yombi azongera guhura, mu mukino w’umunsi wa 20 wa Shampiyona uzabera kuri Stade ya Kigali i Nyamirambo saa cyenda (15:00).

Gasogi United yatsinze umukino umwe mu mikino ine iheruka mu gihe na Mukura Victor Sports imaze iminsi itari kwitwara neza uretse kuba yarasezereye Bugesera FC mu Gikombe cy’Amahoro.

KNC asanga uyu ari wo mwanya mwiza wo kwihimura kuri Mukura Victory Sports, bakayereka ko nubwo yabatsinze mu mikino ibanza itabarushaga.

Umuyobozi wa Gasogi United avuga ko bafitiye umwenda abafana b’iyi kipe bazwi nk’Urubambyingwe nyuma yo gutaha bababaye ku mukino iheruka gutsindwamo na Police FC ibitego 2-0

Ati “Twebwe nta rwitwazo na rumwe dufite, ntarwo dufite twabwira Urubambyingwe n’Abanyarwanda ngo twatsinzwe na Mukura. Dufitiye ideni rikomeye abafana ba Gasogi United, ibyo ndabivuga nka Perezida. Umufana we ni umwere kuko ibye byose aba yarabikoze. Mwabonye uko ku mukino wa Police FC batashye bababaye? Mukura tugomba kuyitsinda 100%.”

KNC yakomeje avuga ko adatewe impungenge no kuba Mukura Victory Sports iri mu makipe makuru mu Rwanda mu gihe iye itangiye gukina icyiciro cya mbere muri uyu mwaka w’imikino.

Ati “Ntabwo wavuga ngo kanaka amaze imyaka 20, ari ibyo Amaregura cyangwa Amagaju ni zo zakabaye zitwara ibikombe. Ku wa Gatandatu mutwitege, nta mpuhwe dufite.”

Gasogi United izakira uyu mukino iri ku mwanya wa 11 n’amanota 22 mu gihe Mukura Victory Sports iri ku mwanya wa kane n’amanota 31.

Uko amakipe azahura ku munsi wa 20 wa Shampiyona

Ku wa Gatandatu tariki ya 15 Gashyantare 2020

  • Heroes FC vs Police FC (Stade Bugesera, 15:00)
  • Etincelles FC vs Bugesera FC (Stade Umuganda, 15:00)
  • Gicumbi FC vs SC Kiyovu (Stade Mumena, 15:00)
  • Gasogi United vs Mukura VS (Stade Kigali, 15:00)

Ku Cyumweru tariki ya 16 Gashyantare 2020

  • Marines FC vs AS Kigali (Stade Umuganda, 15:00)
  • Musanze FC vs Espoir FC (Stade Ubworoherane, 15:00)
  • Rayon Sports FC vs Sunrise FC (Stade de Kigali, 15:00)
  • AS Muhanga vs APR FC (Muhanga, 15:00)
Gasogi United yakoresheje ikiganiro n'itangazamakuru mbere yo guhura na Mukura VS
Umuyobozi wa Gasogi United, KNC avuga ko bazatsinda Mukura VS kugira ngo bishyure ideni bafitiye abafana
Umutoza Guy Bukasa avuga ko ikipe ye ihagaze neza nubwo iheruka gutsindwa na Police FC
Mutabaruka Angelbert uyobora abafana ba Gasogi United (Urubambyingwe)

Amafoto: Umurerwa Delphin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza