Gasogi United yaguze myugariro ukinira ikipe y’Igihugu ya RDC

Yanditswe na Eric Tony Ukurikiyimfura
Kuya 31 Gicurasi 2020 saa 08:58
Yasuwe :
0 0

Ikipe ya Gasogi United yatangaje ko yasinyishije myugariro Beya Beya Hervé ukomoka muri Repubulika Iharanira Demokarasi ya Congo ku masezerano y’imyaka ibiri.

Beya Beya yari mu Ikipe y’Igihugu ya RDC y’Abatarengeje imyaka 23, yasezereye u Rwanda mu 2018.

Yakinnye kandi umukino wa gicuti Amavubi y’u Rwanda yatsinzemo Les Léopards ya RDC ibitego 3-2 muri Nzeri 2019 i Kinshasa.

Ibinyujije kuri Twitter, Gasogi United yagize iti “Ikipe ya Gasogi United yasinyishije Beya Beya Hervé ukinira Ikipe y’Igihugu ya RDC akaba akina mu mutima w’ubwugarizi. Beya Beya Hervé yasinye amasezerano y’imyaka ibiri iri imbere avuye mu Ikipe ya AS Maniema.”

Yabaye umukinnyi wa kabiri mushya Gasogi United isinyishije kuva hasojwe shampiyona y’umwaka w’imikino wa 2019/20 nyuma ya Iradukunda Bertrand wavuye muri Mukura Victory Sports.

Muri Gasogi kandi, Beya Hervé ahasanze umutoza mukuru Guy Bukasa, Guy Bakila umwungirije na Manace Mutatu ukina asatira izamu, anyuze ku mpande, nabo bakomoka muri Repubulika Iharanira Demokarasi ya Congo.

Iyi kipe imaze umwaka umwe mu cyiciro cya mbere muri ruhago y’u Rwanda, aho yabaye iya cyenda, yaherukaga kongerera amasezerano abarimo Kwizera Aimable na Herron Berrian Scarla.

Beya Beya Hervé yasinye imyaka ibiri muri Gasogi United

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .