Gasogi United yabonye intsinzi ya mbere, Etincelles iyobora urutonde rwa shampiyona (Amafoto)

Yanditswe na Eric Tony Ukurikiyimfura
Kuya 9 Ukwakira 2019 saa 06:07
Yasuwe :
0 0

Igitego cya Ndekwe Bavakure Félix mu minota ya mbere y’igice cya kabiri, cyafashije Gasogi United kubona intsinzi ya mbere mu cyiciro cya mbere itsinze Marines 1-0, ku munsi wa kabiri wa Shampiyona.

Uyu mukino wabereye kuri Stade ya Kigali hagati y’amakipe yombi akinisha abakinnyi biganjemo abakiri bato.

Ishimwe Fiston yahushije uburyo bwiza bwabonetse ku ruhande rwa Marines FC ku munota wa 10, ishoti rikomeye yateye rishyirwa muri koruneri n’umunyezamu Cuzuzo Gaël.

Gasogi United yashoboraga gufungura amazamu ku mupira wahinduwe na Manasseh Mutatu, Tidiane Koné ananirwa kuwukoraho ngo awushyire mu izamu.

Ku mupira wahinduwe na Bizimana Ipti Hadji, Ishimwe Fiston yongeye gutera umupira ukomeye wakuwemo na Cuzuzo mu gihe na Mugenzi Bienvenu yananiwe gutsindira ikipe y’i Rubavu habura iminota ibiri ngo gice cya mbere kirangire.

Gasogi United yatsinze igitego kimwe cyabonetse mu mukino ku munota wa 49, gitsinzwe na Ndekwe Félix ku mupira wahinduwe na Tidiane Koné.

Manasseh Mutatu yahushije uburyo bwiza ku mupira yateye ugaca hejuru y’izamu, mu gihe na Amini Muzerwa yahushije uburyo nk’ubu ku ruhande rwa Marines FC.

Marines FC yihariye umupira mu minota ya nyuma, ihusha uburyo bubiri bukomeye bwashoboraga kuyihesha kwishyura burimo n’umupira watewe hejuru y’izamu na Bahame Arafat.

Gutsinda uyu mukino byatumye Gasogi United igira amanota ane kimwe n’amakipe arimo AS Muhanga, APR FC, Police FC na Rayon Sports.

Mu yindi mikino yabaye kuri uyu wa Gatatu, Etincelles FC yayoboye urutonde rwa Shampiyona n’amanota atandatu nyuma yo gutsinda Heroes FC ibitego 3-0 birimo bibiri bya Mutebi Rashid wujuje ibitego bine.

AS Muhanga yatsindiye Gicumbi FC 1-0 kuri Stade Mumena mu gihe Espoir FC yatsinzwe na Kiyovu Sports igitego 1-0 i Huye.

Musanze FC yakiriye Police FC zinganya ubusa ku busa mu gihe na Sunrise FC yanganyije ubusa ku busa na Mukura Victory Sports i Nyagatare.

Abakinnyi 11 babanjemo ku ruhande rwa Gasogi United
Ababanjemo ku ruhande rwa Marines FC
Ba kapiteni bombi: Kazindu Bahati Guy wa Gasogi na Amini Muzerwa wa Marines bafata ifoto n'abasifuzi
Abasimbura ba Marines FC
Umutoza wa Marines FC, Rwasamanzi Yves
Abasimbura ba Gasogi United
Abatoza ba Gasogi United
Ishimwe Blaise ashoreye umupira ubwo Marines FC yari yihariye umukino
Bizimana Ipti Hadji ahanganiye umupira na Manace Mutatu
Tidiane Kone ahanganiye umupira n'abakinnyi b'inyuma ba Marines FC
Perezida wa Gasogi United, KNC yishimira igitego ikipe ye yabonye mu mukino
Kayitaba Bosco asohoka mu kibuga ubwo yari asimbuwe
Tidiane Kone asohorwa mu kibuga nyuma yo kuvunika
Ndekwe FeliX asatira Samba Cedric wa Marines FC
Nshimiyimana Maurice 'Maso' ni we watoje uyu mukino ku ruhande rwa Gasogi United kuko umutoza mukuru (Bukasa Guy) yagiye mu ikipe y'igihugu ya RDC

Amafoto: Usanase Anitha


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza