Gasogi United ntiri mu makipe 24 azakina Igikombe cy’Amahoro uyu mwaka

Yanditswe na Eric Tony Ukurikiyimfura
Kuya 22 Mutarama 2020 saa 05:21
Yasuwe :
0 0

Amakipe 24 arimo 14 yo mu Cyiciro cya Mbere mu Rwanda ni yo azakina Igikombe cy’Amahoro cy’uyu mwaka kizatangira mu kwezi gutaha.

Gasogi United na Heroes FC zazamutse mu cyiciro cya mbere muri uyu mwaka w’imikino wa 2019/20, ntabwo ziri mu makipe azakina iri rushanwa.

Mu mpera z’umwaka ushize, Ishyirahamwe Nyarwanda ry’Umupira w’Amaguru (FERWAFA) ryandikiye amakipe riyamenyesha ko agomba kwiyandikisha bitarenze tariki ya 27 Ukuboza 2019, abanje kwishyura ibihumbi 100 Frw.

Muri iyi baruwa yanditswe tariki ya 19 Ukuboza, FERWAFA yari yatangaje ko tombola y’amajonjora izaba tariki ya 2 Mutarama 2020, naho imikino igatangira nyuma y’icyumweru kimwe.

Iri shyirahamwe ryongereye igihe cyo kwiyandikisha ndetse tombola ishyirwa ku wa Gatanu w’iki cyumweru, tariki ya 24 Mutarama 2020.

Amakipe y’Icyiciro cya mbere azitabira igikombe cy’Amahoro ni Bugesera FC, Marines FC, Etincelles FC, AS Muhanga. Rayon Sports, Sunrise FC, Gicumbi FC, Espoir FC, Police FC, Musanze FC, AS Kigali, APR FC, SC Kiyovu na Mukura Victory Sports.

Mu Cyiciro cya Kabiri hazitabira Vision FC, Gorilla FC, Etoile de l’Est FC, Intare FC, Interforce FC, Aspor FC, Impeesa FC, Rutsiro FC, Rwamagana City FC na Pepinieres FC.

AS Kigali ni yo ifite igikombe giheruka, yatwaye tariki ya 4 Nyakanga 2019 itsinze Kiyovu Sports ibitego 2-1 ku mukino wa nyuma.

Ikipe y’Umujyi wa Kigali yatsindiye guhagararira u Rwanda muri CAF Confederation Cup, isezererwa na Proline FC yo muri Uganda mu ijonjora rya kabiri.

Gasogi United na Heroes FC ni yo makipe y'Icyiciro cya Mbere atazakina Igikombe cy'Amahoro cy'uyu mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza