Gasingwa Michel yahakanye ruswa mu basifuzi bo mu Rwanda, yemeza ko amakosa bakora asanzwe

Yanditswe na IGIHE
Kuya 25 Werurwe 2020 saa 09:30
Yasuwe :
0 0

Gasingwa Michel ukuriye Komisiyo y’abasifuzi b’umupira w’amaguru mu Rwanda, yahakanye ibya ruswa ivugwa mu basifuzi ndetse yemeza ko hari byinshi bikwiriye kwitabwaho kugira ngo imisifurire yo mu Rwanda igendane n’igihe tugezemo birimo kongerera abasifuzi ubushobozi.

Kuva Shampiyona y’icyiciro cya mbere mu Rwanda itangiye mu Ukwakira 2019, hamaze guhagarikwa abasifuzi barindwi ndetse bane muri bo, bahagaritswe muri uku kwezi kwa Werurwe 2020.

Mu kiganiro yagiranye na RBA, Gasingwa Michel ukuriye Komisiyo y’Imisufirire muri FERWAFA, yasobanuye ko impamvu zituma amakosa agaragara cyane muri iyi minsi ari iterambere rya ruhago rigenda rikora ku mpande nyinshi harimo n’itangazamakuru.

Yavuze ko kandi ubumenyi ku mupira w’amaguru bwiyongera, gusa ngo kuri we, amakosa ari gukorwa n’abasifuzi muri iyi minsi arasanzwe.

Ati "Aya makosa arasanzwe. Ntabwo ari ubumenyi buke bw’abasifuzi ahubwo hari n’ubwo umusifuzi aramuka nabi kumwe nk’uko biba ku basifuzi b’abahanga tumenyereye i Burayi. Usibye twe kandi n’umukinnyi hari igihe aramuka nabi icyo kintu akanakimarana iminsi.”

“Gusifura si siyansi nk’ imibare bigenda bizamuka bigendanye n’ubunararibonye bw’ubikora."

Abajijwe impamvu muri iyi minsi hari guhanwa abasifuzi benshi cyane, Gasingwa yavuze ko no mu yindi myaka ari uko byahoze, ahubwo itandukaniro ari uko ubu bisigaye bitangazwa.

Ati "Na mbere abasifuzi barahanwaga, icyahindutse ni uku ubu dusigaye tubitangaza, itangazamakuru rikabimenya bitandukanye na mbere. Ikoranabuhanga iwacu hano ryarakataje ku buryo bihita bigera kuri benshi mu gihe gito, naho ubundi nta byacitse."

Ku bijyanye na ruswa ivugwa ku basifuzi, uyu muyobozi yabihakanye, avuga ko kugeza ubu bagikomeje kubikurikirana ariko nta cyemeza ko bihari.

Ati "Ibyo ntiturabibona ariko dukomeza gukurikirana niba nta byaba biturangwamo."

Yavuze ko umusifuzi yigishwa, agategurwa ndetse agakosorwa (igihe yakosheje) akanahugurwa bigendanye n’amategeko mashya agenda ahinduka.

Ati "Abasifuzi barategurwa bakanazamurwa mu ntera bitewe n’ubumenyi bahabwa. Icyo nsaba ni uko iki kibazo batakigira icya Gasingwa, FERWAFA cyangwa undi wundi. Ndibutsa amakipe ko ariyo FERWAFA ndetse umupira w’amaguru udakwiye gutera imbere ngo usige abasifuzi. Nibabiteho, babagenere ibibakwiriye (ubumenyi n’ubushishozi).”

“Umupira w’amaguru wajemo amafaranga menshi ni nako urwego rugenda ruzamuka. Rero be gusiga inyuma abasifuzi."

Umusifuzi wo mu cyiciro cya mbere mu Rwanda ahabwa ibihumbi 19 Frw ku mukino.

Kuri iki kibazo kandi cy’ubushobozi, Gasingwa avuga ko benshi mu basifuzi mpuzamahanga bafite indi mirimo bakora bikaba imbogamuzi ku mikino ikinwa hagati mu cyumweru, ntibaboneke ku mikino imwe yahuje amakipe akomeye.

Tariki ya 15 Werurwe 2020 nibwo Shampiyona y’u Rwanda yahagaze by’agateganyo igeze ku munsi wa 24 mu gihe u Rwanda n’Isi yose muri rusange byiyemeje guhagarika ibikorwa byose bihuza abantu benshi nk’imwe mu ngamba zo guhangana n’icyorezo cya Coronavirus.

Izindi nkuru wasoma:

Abasifuzi barindwi bamaze guhagarikwa muri Shampiyona y'u Rwanda muri uyu mwaka w'imikino wa 2019/20

Inkuru ya Hakorimana Christian


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .