Arsenal yagiye gukina uyu mukino idafite Kapiteni wayo, Martin Ødeegard wavukiniye mu Ikipe y’Igihugu ya Norvège, Decran Rice wabonye ikarita itukura ku mukino wa Brighton ndetse Mikel Merino ufite imvune y’urutugu.

Muri uyu mukino, Tottenham Hotspur yari imbere y’abafana bayo, yatangiye neza ndetse mu minota ya mbere yashoboraga kubona igitego ku mupira Heung-Min Son yahaye Dejan Kluseviski, uyu wa nyuma ateye ishoti rikurwamo na David Raya.

Ku munota wa 12, Tottenham yongeye guhusha uburyo bwiza ku mupira watakajwe na ba myugariro ba Arsenal, ufatwa na Dominic Solanke ari mu rubuga rw’amahina gusa atinda kuwutera, awukurwaho na William Saliba.

Uburyo bwa mbere bwa Arsenal bwabonywe na Gabriel Martinelli wazamukanye umupira acenga, yinjiye mu rubuga rw’amahina atera ishoti ryakuwemo na Guglielmo Vicario.

Mu gice cya kabiri, na bwo Tottenham Hotspur yabonye uburyo bwiza ku mupira Van de Ven yateresheje umutwe uvuye kuri Brendan Johnson, ariko David Raya yongera gutabara.

Byasabye gutegereza umunota wa 64, Arsenal ifungura amazamu ku gitego cyatsinzwe na Gabriel Magalhães n’umutwe, kuri koroneri yatewe neza na Bukayo Saka.

Tottenham yagerageje uburyo butandukanye ishaka kwishyura, ariko iminota 90 irangira itabigezeho.

Gutsinda byafashije Arsenal gufata umwanya wa kabiri n’amanota 10, irushwa abiri na Manchester City ya mbere nyuma y’imikino ine imaze gukinwa.

Gabriel yatsinze igitego cyakoze itandukaniro muri uyu mukino

Gabriel Magalhães yishimira igitego cyabonetse ku munota wa 64

Umukino warimo ihangana rikomeye: Umunyezamu Guglielmo Vicario ashyamiranye na Bukayo Saka wa Arsenal

Jorginho akurura James Maddison wa Tottenham Hotspur

Dominic Solanke ahanganiye umupira na Gabriel wa Arsenal

Leandro Trossard wambaye umwambaro ucitse, ubwo yasatiraga Son wa Spurs

Byari ibyishimo ku bakinnyi ba Arsenal ubwo umukino wari urangiye

Ben White yishimira amanota atatu we na bagenzi be bakuye ku kibuga cya Spurs