Fulham na Brentford zigiye guhurira mu mukino uhenze mu mateka y’umupira w’amaguru

Yanditswe na Eric Tony Ukurikiyimfura
Kuya 4 Kanama 2020 saa 11:08
Yasuwe :
0 0

Umukino uhuza Brentford na Fulham zihatanira umwanya wo kujya mu Cyiciro cya Mbere mu Bwongereza, Premier League, kuri uyu wa Kabiri, uraba ari umwe mu ihenze mu mateka y’umupira w’amaguru, aho ufite agaciro ka miliyoni miliyoni £160.

Uyu mukino uteganyijwe kuri uyu wa Kabiri saa 20:45, urabera kuri Stade y’u Bwongereza, Wembley, aho ikipe itsinda yegukana akayabo ka miliyoni £160 (hafi miliyari 200.5 Frw) ndetse n’umwanya muri Premier League 2020/21.

Umukino wa Superbowl muri Football ya Amerika ubu ufite agaciro ka miliyoni £4.9, uwa nyuma wa UEFA Champions League ukagira agaciro ka miliyoni £16.7 mu gihe kuri uyu mugoroba mu gihe cy’iminota 90, aya makipe aza kuba ahanganiye amafaranga aruta kure aya Premier League, FA Cup na Champions League uyateranyije.

Brentford ishobora kwinjiza agera kuri miliyoni £160 mu myaka itatu niramuka itsinze Fulham kuri uyu wa Kabiri nk’uko bigaragazwa n’Ikigo cya Deloitte gikora isesengura ry’ubukungu muri siporo.

Ubusanzwe, umukino wa nyuma wa play-offs za Championship (Icyiciro cya Kabiri mu Bwongereza) ni wo uhenze mu mateka y’umupira w’amaguru ku Isi kuko uhesha amakipe kubona amafaranga atangwa muri Premier League n’atangwa na za televiziyo zerekana iki Cyiciro cya Mbere.

Ikigo cya Deloitte kivuga ko Brentford niramuka ibashije kujya mu Cyiciro cya Mbere mu mwaka utaha w’imikino, icyo gihe amafaranga izinjiza yazamuka akagera kuri miliyoni £265 mu gihe cy’imyaka itanu, akaba ari nako byagenda kuri Leeds United yatwaye igikombe cy’Icyiciro cya Kabiri.

Fulham yo ishobora kwinjiza asaga miliyoni £135 mu gihe kiri hejuru y’imyaka itatu niramuka itsinze Brentford, amafaranga yakwinjiza akaba yaragabanutse bitewe n’uko yamanutse mu Cyiciro cya Kabiri mu 2019.

Dan Jones ushinzwe Ubucuruzi muri Deloitte, yavuze ko uyu mukino ushobora kwinjiriza ikipe agera kuri miliyoni £160 arimo miliyoni £85 avuye mu kwerekana imikino hagati y’umwaka w’imikino wa 2021/2022 na 2022/23.

Mu mwaka ushize, Aston Villa yazamutse nyuma yo gutsinda Derby County mu mukino wari ufite agaciro ka miliyoni £170.

Deloitte ivuga ko amafaranga yagabanutse kubera ko uyu mwaka w’imikino wagizweho ingaruka n’icyorezo cya Coronavirus cyibasiye Isi.

Brentford imaze imyaka 73 idakina mu Cyiciro cya Mbere,yageze ku mukino wa nyuma play-offs za Championship inshuro umunani.

Fulham na Brentford zirakina kuri uyu wa Kabiri mu mukino wo guhatanira gukina Premier League mu mwaka utaha w'imikino wa 2020/21

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .