00:00:00 IGIHE NETWORK KN KINYARWANDA EN ENGLISH FR FRANCAIS

FIFA yatangaje abazavamo umukinnyi mwiza w’umwaka wa 2021 ku Isi

Yanditswe na Eric Tony Ukurikiyimfura
Kuya 23 Ugushyingo 2021 saa 11:36
Yasuwe :
0 0

Ishyirahamwe ry’Umupira w’Amaguru ku Isi (FIFA) ryashyize ahagaragara urutonde rw’abakinnyi 11 bazavamo uwahize abandi ku Isi mu 2021 mu bihembo bizatangirwa i Zurich ku wa 17 Mutarama 2022.

Urutonde FIFA yashyize hanze ku wa Mbere, tariki ya 22 Ugushyingo 2021, rugaragaraho Robert Lewandowski ukinira Bayern Munich n’Ikipe y’Igihugu ya Pologne, akaba ari we wabaye Umukinnyi mwiza w’Umwaka wa 2020.

Hari kandi Lionel Messi wa PSG na Argentine ndetse na Cristiano Ronaldo wa Manchester United na Portugal, bombi basoreje mu myanya itatu ya mbere mu bihembo byatanzwe mu mpera z’umwaka ushize.

Abandi bakinnyi umunani ni Karim Benzema (u Bufaransa na Real Madrid CF), Kevin De Bruyne (u Bubiligi na Manchester City FC), Erling Haaland (Norvège na BV Borussia 09 Dortmund), Jorginho (u Butalitani na Chelsea FC), N’Golo Kanté (u Bufaransa na Chelsea FC), Kylian Mbappé (u Bufaransa na Paris Saint-Germain), Neymar (Brésil na Paris Saint-Germain) na Mohamed Salah (Misiri na Liverpool FC).

Abanyezamu bazavamo uw’Umwaka wa 2021 ni Umunya-Brésil Alisson Becker (Liverpool) watwaye iki gihembo mu 2019, Umutaliyani Gianluigi Donnarumma (AC Milan/PSG), Umunya-Sénégal Édouard Mendy (Chelsea), Umudage Manuel Neuer (Bayern Munich) watwaye icy’umwaka ushize n’Umunya-Danemark Kasper Schmeichel ukinira Leicester City.

Abakinnyi bane ba FC Barcelone y’Abagore bari ku rutonde rwa 13 bazavamo Umukinnyi mwiza w’Umwaka wa 2021 mu bagore ni Aitana Bonmati, Jennifer Hermoso na Alexia Putellas bose bo muri Espagne n’Umunya-Norvége Caroline Graham-Hansen.

Bane bo muri Chelsea ni Magdalena Eriksson wo muri Suéde, Pernille Harder wo muri Danemark, Jo So-yun wo muri Koreya y’Epfo na Samantha Kerr wo muri Australia.

Abandi bari kuri uru rutonde ni Stina Blackstenius wa Suède na BK Häcken, Lucy Bronze na Ellen White b’u Bwongereza na Manchester City, Vivianne Miedema w’u Buholandi na Arsenal WFC ndetse n’Umunya-Canada Christine Sinclair ukinira Portland Thorns FC.

Abatoza bazavamo uw’umwaka wa 2021 mu bagabo barimo Umudage Thomas Tuchel utoza Chelsea yatwaye UEFA Champions League ya 2021, Roberto Mancini watwaranye EURO 2020 n’u Butaliyani, Antonio Conte (Inter Milan na Tottenham), Hansi Flick (Bayern Munich n’u Budage), Pep Guardiola (Manchester City), Lionel Sebastian Scaloni watwaranye Copa América na Argentine na Diego Simeone (Atlético de Madrid). Igihembo giheruka cyari cyatwawe n’Umudage Jürgen Klopp wa Liverpool mu 2019 na 2020.

Umutoza mwiza mu bagore azava hagati ya Lluís Cortés wa FC Barcelona, Peter Gerhardsson utoza Suède, Emma Hayes utoza Chelsea FC Women, Beverly Priestman utoza Canada na Sarina Wiegman watoje u Buholandi n’u Bwongereza muri uyu mwaka.

Biteganyijwe ko igihembo kizatangirwa mu birori bizabera i Zurich ku wa 17 Mutarama 2022 ari nabwo hazatangazwa batatu ba mbere muri buri cyiciro.

Amajwi azabarwa ni ay’abatoza n’abakapiteni b’amakipe yose y’ibihugu, itora ryo kuri internet ry’abafana n’abanyamakuru 200 bo ku Isi kugeza ku wa 10 Ukuboza 2021 saa Sita z’ijoro.

FIFA yatangaje abakinnyi 11 bazavamo uwahize abandi mu mwaka wa 2021 ku Isi
Robert Lewandowski ni we watwaye iki gihembo mu 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .