FIFA yareze Blatter wayiyoboye kurigisa amafaranga y’inzu ndangamateka

Yanditswe na Bukuru JC
Kuya 22 Ukuboza 2020 saa 08:14
Yasuwe :
0 0

Ishyirahamwe ry’Umupira w’Amaguru ku Isi (FIFA) ryatanze ikirego riregamo uwahoze ari Perezida waryo, Sepp Blatter, rishinja kurigisa amafaranga yari agenewe inzu ndangamateka y’i Zurich mu Busuwisi.

Ikirego kijyanye n’uruhare rwa Blatter n’abandi bahoze ari abayobozi mu mushinga w’inzu ndangamateka ya FIFA ni cyo gishya kivuga ku ikoresha nabi ry’umutungo kirezwe Blatter weguye ku mwanya w’ubuyobozi bwa FIFA mu 2015 ashinjwa ibyaha bijyanye na ruswa.

Uyu mugabo w’imyaka 84, buri gihe yakunze guhakana ibyo aregwa byose, avuga ko nta kibi yakoze.

FIFA yavuze ko ubuyobozi bwa Blatter bwatse miliyoni 500 z’amafaranga akoreshwa mu Busuwisi (asaga miliyari 552 Frw) yo kuvugurura inyubako itari iy’iki kigo mu gihe kandi “yari yarakodeshejwe igihe kirekire kandi itameze neza.”

Bitewe n’amafaranga y’umurengera yasabwe kuri iyi nzu ndangamateka ndetse n’uburyo bw’imicungire ya FIFA mu gihe cya Blatter, hakozwe ubugenzuzi bw’umutungo kugira ngo hagaragazwa uko byagenze.

Umunyamabanga Mukuru wungirije wa FIFA, Alasdair Bell, yakomeje avuga ko “Iri genzura ryagaragaje ibintu byinshi biteye amakenga ndetse n’imicungire mibi, bimwe muri byo bikaba bishobora kuba ari icyaha kandi bigomba gukorwaho iperereza neza n’inzego zibishinzwe.”

"Twageze ku mwanzuro w’uko nta kundi twabigenza uretse gutanga raporo ku bashinjacyaha ba Leta, atari ukubera ko ubuyobozi buriho bwa FIFA ari ubwo kwizerwa.”

Iki kirego cyashyikirijwe umushinjacyaha w’i Zurich ndetse FIFA yatangaje ko izakomeza gukorana n’inzego z’u Busuwisi n’ahandi ku buryo abantu bangije isura y’umupira w’amaguru bazafatwa bakaryozwa ibyo bakoze.

Umushinga w’inzu ndangamateka watangiye mu 2013, imyaka ibiri mbere y’uko Blatter, wabaye Perezida wa FIFA mu myaka 17, atangaza ko yeguye.

Avuga kuri ibi, Umunyamategeko wa Blatter, Lorenz Erni, yavuze ko ibirego bya FIFA “nta shingiro bifite.”

Kuri ubu Blatter ari mu bihano by’imyaka itandatu aho yahagaritswe mu bikorwa byose by’umupira w’amaguru.

Sepp Blatter yarezwe na FIFA ashinjwa gukoresha nabi amafaranga y'inzu ndangamateka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .