FIFA yahagaritse komisiyo y’amatora yangiye Drogba kwiyamamariza kuyobora ishyirahamwe rya ruhago muri Côte d’Ivoire

Yanditswe na Eric Tony Ukurikiyimfura
Kuya 29 Kanama 2020 saa 11:15
Yasuwe :
0 0

Ishyirahamwe ry’Umupira w’Amaguru ku Isi, FIFA, ryahagaritse komisiyo y’amatora mu Ishyirahamwe ry’Umupira w’Amaguru muri Côte d’Ivoire (FIF) nyuma y’amasaha make iyo komisiyo yanze ubusabe bwa Didier Drogba wari mu biyamamariza kuriyobora.

Ku wa Kane nibwo iyi komisiyo y’amatora yatangaje ko ubusabe bwa Didier Drogba bwateshejwe agaciro kuko mu makipe ane y’icyiro cya mbere asabwa, yashyigikiwe n’amakipe abiri gusa.

Uwo munsi nibwo kandi FIFA yandikiye Komisiyo y’Amatora mu Ishyirahamwe ry’Umupira w’Amaguru muri Côte d’Ivoire (FIF) iyisaba kuba ihagaritse ibikorwa byayo kugira ngo habanze hasuzumwe imikorere yayo kugeza ikindi gihe izamenyeshwa.

Umunyamabanga Mukuru wa FIFA, Fatma Samoura, yakomeje abwira Komisiyo y’amatora muri FIF ko “Bamwe bavuga ko iyi komisiyo yabujijwe gukora ibikorwa byayo mu bwisanzure kubera abandi bo hanze babyivangamo.”

BBC yatangaje ko, FIFA yasabye kandi urutonde rwuzuye bw’abagize Komisiyo y’Amatora n’imyanzuro bafatiye mu nama enye bakoze zirimo iyabaye muri Nyakanga ubwo hatorwaga umuyobozi mushya wa komisiyo ndetse n’iyo muri Kanama yitabiriwe na Komite Nyobozi ya FIF.

Ubusabe bwa Didier Drogba bwari bwabanje kwemerwa nubwo bwarimo ikibazo.

Ku wa Kane, komisiyo y’amatora yemeje abakandida babiri gusa; Sory Diabaté kuri ubu usanzwe ari Visi Perezida wa mbere muri FIF, na Yacine Idriss Diallo wigeze kuba visi perezida wa gatatu.

Ubwo yiyamamarizaga kuyobora FIF, Drogba yari ashyigikiwe n’abaturage benshi. Eugène Diomande umuhagarariye, yavuze ko nyuma y’uko ubusabe bwabo buteshejwe agaciro, biteguye kujurira muri FIFA.

Amatora y’umuyobozi w’Ishyirahamwe ry’Umupira w’Amaguru muri Côte d’Ivoire ateganyijwe tariki ya 5 Nzeri uyu mwaka nubwo kugeza ubu ashobora kwimurwa bitewe n’ibikomeje kugaragara mbere yayo.

Didier Drogba wari wiyamamarije kuyobora Ishyirahamwe rya ruhago muri Côte d’Ivoire, ubusabe bwe bwateshejwe agaciro, ariko uwo munsi nibwo FIFA yasabye ko Komisiyo yabikoze iba ihagaritswe
Abanya-Côte d’Ivoire benshi bari bagaragaje ko bashyigikiye Drogba ubwo yatangaga ubusabe bwo kwiyamamaza mu ntangiriro z'uku kwezi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .