00:00:00 IGIHE NETWORK KN KINYARWANDA EN ENGLISH FR FRANCAIS

FERWAFA yongereye amafaranga ahabwa abasifuzi

Yanditswe na Iradukunda Olivier
Kuya 22 Mutarama 2023 saa 02:06
Yasuwe :

Inama y’Inteko Rusange Idasanzwe y’Ishyirahamwe ry’Umupira w’Amaguru mu Rwanda, FERWAFA, yemeje ko amafaranga ahabwa abasifuzi agomba kongerwa.

Uyu ni umwe mu myanzuro yafatiwe mu Nteko Rusange ya FERWAFA yateraniye muri Lemigo Hotel ku wa Gatandatu, tariki ya 21 Mutarama 2023.

Ingengo y’imari nshya izagenerwa abasifuzi yashyizweho nyuma yo gutangaza iya rusange izakoreshwa na FERWAFA muri uyu mwaka w’imikino.

Mu bikorwa biteganyijwe harimo kongerera ubushobozi amarushanwa Ferwafa itegura, imishahara y’abakozi bayo, ibikorwa by’ubucuruzi n’ibyo kuzahura siporo ndetse n’ibyo kongerera abasifuzi ubushobozi.

Mu 2022, amafaranga yatangwaga ku basifuzi yanganaga na 181.441.999 Frw; abanyamuryango basanze adahagije basaba ko yongerwaho 250.170.218 Frw, ni inyongera ingana na 73%.

Abakunzi b’umupira w’amaguru n’abayobozi b’amakipe bagiye bumvikana kenshi bashyira mu majwi ko ibigenda ku basifuzi biri hasi cyane, ku buryo nta gikozwe bishobora guhungabanya imikorere yabo.

Bamwe mu bakurikirana imisifurire yo mu Rwanda bavuga ko iri ku rwego rwo hasi mu gihe hari abavuga ko kimwe mu byaba bibitera ari uko habamo ruswa bikaba byatuma umusifuzi yica umukino.

Abasifuzi bo mu Rwanda nta mushahara wihariye bagenerwa uretse amafaranga bishyurwa mu gihe basifuye umukino runaka ariko nabwo ashobora kuboneka nyuma y’imikino itanu cyangwa icumi (yarabaye ibirarane by’igihe kirekire).

Umusifuzi iyo ahawe umukino runaka, wo mu ntara iyo ari yo yose, aba agomba kwimenyera buri kimwe noneho amafaranga akazayahabwa nyuma.

Mu 2020, gusifura umukino w’Icyiciro cya Mbere wabereye i Kigali, umusifuzi yahabwa ibihumbi 17.200 Frw ariko iyo yasifurwaga n’abasifuzi mpuzamahanga, we yahabwaga ibihumbi 23.5 Frw, mu gihe gusifura umukino w’abagore wabereye i Kigali, umusifuzi yahabwaga 9.100 Frw.

Iyo byageraga ku mikino yaberaga mu Ntara, i Musanze, umusifuzi yahabwaga ibihumbi 27,6 Frw; i Rusizi ni 62.760 Frw, Rubavu ni 61.700 Frw, Nyagatare ni 34.960 Frw, Huye na Nyamagabe ni 27.740 Frw.

Abakomiseri b’umukino ni bo bafataga menshi kurusha abasanzwe aho nk’urugero rw’uwakoze umukino wabereye i Rusizi yahabwaga 71.760 Frw.

Mu 2021, abasifuzi bavugaga ko nta gaciro bahabwa n’ababayobora, haherewe ku duhimbazamusyi bita intica ntikize bagenerwa mu gihe bagiye gusifura kandi natwo ntibatubonere igihe.

Uwaganiriye na IGIHE, yavuze ko iyo bajyaga gusifura, icyo gihe bari barazamuwe bakagenerwa agahimbazamusyi k’ibihumbi 30 Frw, nyamara na ko bakakabona nabi.

Benshi mu basifuzi bo mu Cyiciro cya Mbere mu Rwanda batunze urutoki Komisiyo ibashinzwe na FERWAFA, aho bagaragazaga ko izi nzego zitabaha agaciro bakwiye, bikaba intandaro y’amakosa ya bamwe mu kibuga.

Nyuma yo kurita mu gutwi ni bwo Ferwafa yongereye amafaranga bagenerwa akubwa hafi kabiri ugereranyije n’uko byari bisanzwe bikorwa mu myaka yatambutse.

Inyongera ya miliyoni zisaga 250 Frw ku mafaranga agenerwa abasifuzi yakuwe mu ya FERWAFA yagenewe 8.140.773.630 Frw nk’ingengo y’imari yayo y’umwaka wa 2023.

Ferwafa yongereye amafaranga ahabwa abasifuzi mu Rwanda
Ibyemezo bimwe abasifuzi bafata usanga bitavugwaho rumwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .