Uyu mukino uzakinwa ku masaha ya saa Cyenda, itike ya make yo kuwureba muri Stade izaba ari amafaranga ibihumbi bibiri, mu gihe iya menshi ari iya Miliyoni muri Executive Box, icyumba cy’abanyacyubahiro kijyamo abagera kuri 16.

Kwinjira ahasanzwe haba hasi cyangwa se hejuru abakunzi b’Amavubi bazishyura 2000 Frw, VIP ni ibihumbi 20 Frw naho Business Suite iri ahazwi nka ‘Executive Seat’ ikaba ari ibihumbi 50 Frw ndetse nyine na ‘Executive Box’ igura yashyizwe kuri 1 000 000 Frw.

Executive Box ni icyumba cy’abanyacyubahiro gikunze kuba ari gito kitajyamo abantu benshi kuko bakunze kuba bari hagati ya 14-16, kiba kirimo insakazamashusho, ibyo kurya no kunywa byiyongera ku mwanya mwiza uba ureba mu kibuga neza.

Amavubi akaba yaraye akinnye umukino wa mbere yanganyijemo na Libya igitego 1-1 aho ikipe y’igihugu iri burare igeze mu Rwanda kwitegura uwo bazahuriramo na Nigeria ku wa Kabiri w’icyumweru gitaha.

Nigeria izakina n’u Rwanda yo ikazahura na Benin ku wa Gatandatu mu wundi mukino wo mu itsinda D mbere yo gufata indege iyizana i Kigali guhatana n’Amavubi ari mu bihe byayo byiza.

Stade Amahoro igiye kwakira umukino wa mbere w'ikipe y'igihugu nyuma yo kuvugururwa igashyirwa ku rwego rwa mbere rw'ama-Stade

Amavubi ayobowe na Djihad yaraye anganyije na Libya igitego 1-1.

Ikipe y'igihugu imaze iminsi yitwara neza.