00:00:00 IGIHE NETWORK KN KINYARWANDA EN ENGLISH FR FRANCAIS

FERWAFA mu myiteguro yo gusubukura irushanwa ngarukamwaka ryo Kwibuka

Yanditswe na Mihigo Saddam
Kuya 10 April 2022 saa 07:58
Yasuwe :

Ishyirahamwe ry’Umupira w’Amaguru mu Rwanda (FERWAFA) ni rwo rwego rukuru ruhagarariye umupira w’amaguru mu mpuzamashyirahamwe ku rwego rw’Isi n’Umugabane wa Afurika.

Kuba umupira w’amaguru uhuza benshi, byorohera abafite ubukangurambaga kuba babinyuzamo bityo bwa butumwa bugatambuka mu buryo bworoshye.

Kuva ku wa Kane, tariki 7 Mata kugeza ku wa 13 Mata 2022, u Rwanda n’inshuti z’u Rwanda bari mu cyumweru cyo Kwibuka ku nshuro ya 28 Jenoside yakorewe Abatutsi mu 1994, aho abarenga miliyoni bambuwe ubuzima.

Umupira w’amaguru ni imwe muri siporo zabuze abari abakunzi, abayobozi, abafana n’abandi bari bafite aho bahurira n’iyi siporo.

Inzego n’ingaga zitandukanye mu Rwanda zigira gahunda ngarukamwaka yo kwibuka abari abakozi, abayobozi n’abandi bari bafite aho bahurira nabo bazize Jenoside yakorewe Abatutsi mu Rwanda mu 1994.

FERWAFA ni rimwe mu mashyirahamwe akorera mu Rwanda atagira ibikorwa ngarukamwaka byihariye byo kwibuka kuko gahunda iheruka yabaye mu 2017.

Umunyamabanga Mukuru wa FERWAFA, Muhire B. Henry, yavuze ko imbogamizi zabayeho mu myaka ishize ari uko hatagiye habaho gahunda yo kunoza ingengabihe z’amarushanwa ku buryo hanashyirwamo irushanwa ryo kwibuka.

Ati “Muri rusange ntabwo ari uko FERWAFA yirengagiza irushanwa ryo kwibuka ahubwo biterwa n’imipangire iba itaranogejwe mbere kugira ngo mu ngengabihe y’amarushanwa hashyirwemo uwo mwanya. Uyu mwaka bizakorwa mu buryo butari ubwo kugira irushanwa ryihariye ahubwo bikorerwe mu yandi marushanwa dufite yaba shampiyona n’igikombe cy’amahoro.”

“Umwaka utaha w’imikino irushanwa ryo kwibuka duteganya ko rizaba mu buryo buzabanza kuganirwaho n’inzego zose bireba ariko rizaba.”

Muhire B. Henry avuga ko mu gihe shampiyona izaba igarutse bateganya ko hajya hafatwa umunota wo kwibuka ndetse hakanarebwa uburyo hajya hambarwa ikirango cyo kwibuka.

FERWAFA iheruka gahunda yo kwibuka binyuze mu mukino mu 2017 ubwo ikipe y’igihugu y’u Rwanda nkuru yakiraga iya Maroc y’abatarengeje imyaka 23.

Umunyabanga mukuru wa FERWAFA, Muhire B. Henry yavuze ko bari guteganya gusubukura irushanwa ryo kwibuka abazize Jenoside yakorewe Abatutsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .