00:00:00 IGIHE NETWORK KN KINYARWANDA EN ENGLISH FR FRANCAIS

FC Bayern Munich Academy Rwanda yegukanye Urubuto Community Cup 2025 (Amafoto)

Yanditswe na Iradukunda Olivier
Kuya 6 April 2025 saa 05:45
Yasuwe :

Irushanwa ry’abakiri bato ritegurwa n’abakinnyi bakanyujijeho muri ruhago y’u Rwanda ‘Urubuto Community Cup 2025’, ryegukanywe na FC Bayern Munich Academy Rwanda mu batarengeje imyaka 16, APR FTC iryegukana mu batarengeje 10 na 13.

Ni irushanwa rimaze amezi ane rihuza amarerero atandukanye yigisha abana gukina umupira w’amaguru akorera mu Mujyi wa Kigali. Amakipe yitwaye neza akaba yakiniye kuri Kigali Pelé Stadium, imikino ya nyuma yabaye kuri iki Cyumweru, tariki ya 6 Mata 2025.

Ni umunsi wabimburiwe n’imikino y’abana batarengeje imyaka 10, APR FTC itsinda Intare FTC ibitego 3-1, ihita yegukana igikombe. Hakurikiyeho bakuru babo batarengeje imyaka 13, umukino urangira APR FTC ikuyemo Debes FA kuri penaliti 2-1, nyuma yo kunganya 0-0.

Mu bakobwa batarengeje imyaka 13 bakinnye uyu munsi, na ho APR FTC yitwaye neza kuko yatsinze Don Bosco FA ibitego 3-0 byinjijwe na Ishimwe Darlene watsinze bibiri ndetse na Ushindi Clenia washyizemo kimwe.

Umukino wari utegerejwe na benshi kuri uyu munsi wagombaga guhuza APR FTC na FC Bayern Munich Academy Rwanda mu batarengeje imyaka 16.

Ni umukino wakinwe neza na FC Bayern Munich Academy Rwanda kuko yihariye umukino ndetse ikarusha cyane APR FTC, birangira inatsinze ibitego 3-0. Ibitego byashyizwemo na Izere Nzabahabwa Charles winjije bibiri na Tuyishimire Ezechiel watsinze kimwe.

Perezida w’Ishyirahamwe rya Ruhago mu Rwanda, FERWAFA, Munyantwali Alphonse, yavuze ko aya marushanwa aterwa inkunga na Banki ya Kigali, yateguwe hagamijwe no kwigisha abana n’izindi ndagagaciro zirenze iz’umupira w’amaguru.

Ati “Iki ni kimwe mu bikorwa tuba dukeneye cyane kugira ngo umupira w’amaguru wacu utere imbere. Niba abana bangana gutya bahurira hamwe bagakina, tubasha kubona impano zabo, ariko nanone bakaguka no mu mutwe.”

“Ni amahirwe no kuba haba hari n’umuterankunga ari we Banki ya Kigali, birumvikana ko bazanakurana umuco wo kwizigamira nka zimwe mu ndagagaciro zikwiriye kuranga Umunyarwanda mu iterambere.”

Iri rushanwa ryabaye ku nshuro ya kabiri rikinirwa mu Mujyi wa Kigali gusa, ariko nk’uko byagarutsweho n’Umuyobozi wa Project Team Work iritegura, hagiye kongerwamo andi makipe yo mu ntara.

Ati “Ryagenze neza kuko ryaritabiriwe cyane kandi tubona n’umuterankunga. Intego zacu zagezwego, ariko ntabwo twavuga ko urugendo rurangiye, ahubwo rurakomeje.”

“Turifuza ko irushanwa rikura kandi mu rikurikiraho turateganya kujya mu makipe yo mu Ntara y’Iburasirazuba kuko hariyo menshi yatweretse ko ashaka ko tuyashyiramo.”

Urubuto Community Youth Cup ni irushanwa ritegurwa n’abanyabigwi mu mupira w’amaguru biyemeje guhuza imbaraga bagamije guteza imbere umupira w’amaguru.

Babinyujije mu ihuriro bise Project Team Work, bafatanya n’Ihuriro ry’abakiniye Ikipe y’u Rwanda ’Amavubi’ mu ihuriro ryabo ’FAPA’ riyobowe na Murangwa Eugène.

APR FTC y'abakobwa yitwaye neza
APR FTC yatsinze Intare FTC mu batarengeje imyaka 10
Murangwa Eric Eugène intambwe imaze guterwa na Urubuto Community Youth Cup
Imikino y'abato ni imwe mu ishyigikiwe cyane na FERWAFA
Abakanyujijeho cyane cyane abakiniye Amavubi bitabira ibikorwa byo kuzamura impano
Amarushanwa y'abato yakinwe harimo n'ibyiciro by'abakobwa
Bernhard Hirmer uyobora Bayern Munich Academy Rwanda asanga mu Rwanda hari impano za ruhago
Amakipe ya APR FTC yitwaye neza mu myaka yo hasi
Abayobozi ba APR bari bitabiriye imikino ya nyuma
Umugaba Mukuru w'Ingabo z'u Rwanda, Gen Mubarakh Muganga, yashimiye abakanyujijeho ku ruhare rwabo muri ruhago y'u Rwanda
Umugaba Mukuru w'Ingabo z'u Rwanda, Gen Mubarakh Muganga, asuhuza Romami Andre uri mu batoza b'abato muri APR
Umukino w'abatarengeje imyaka 16 yari itegerejwe na benshi
Abakinnyi ba FC Bayern Munich Academy Rwanda babanje mu kibuga
Mbere y'umukino hafashwe umwanya wo kwibuka Alain Mukuralinda wari Umuvugizi wungirije wa Guverinoma akaba yaranagize uruhare runini mu iterambere rya siporo mu Rwanda
Chairman wa APR FC, Brig. Gen. Déo Rusanganwa ashima urwego amakipe y'abato agezeho
Umugaba Mukuru w'Ingabo z'u Rwanda, Gen Mubarakh Muganga, ari mu bitabiriye imikino
Umuyobozi wa Rwanda Premier League, Hadji Yussuf Mudaheranwa yari ku kibuga areba impano za ruhago z'ejo hazaza
Abakinnyi 11 APR y'Abatarengeje imyaka 16 yabanje mu kibuga
FC Bayern Munich Academy Rwanda yarushije cyane APR
Umutoza wungirije w'Amavubi, Eric Nshimiyimana, ari mu Ihuriro ry'Abakiniye Amavubi bategura iyi mikino
Perezida wa FERWAFA, Munyantwali Alphonse, yemeye ko bazashyigikira iyi mikino kuko ifite icyerekezo cyiza
APR FTC yatsinzwe ibitego 3-0
Abana bakinira Intare FTC bambikwa imidali
FC Bayern Munich Academy Rwanda yashikirijwe igikombe cyayo
Amakipe mato ya APR yagaragaje urwego rwiza
FC Bayern Munich Academy Rwanda yegukanye Igikombe cy’Urubuto Community Cup gikinwe ku nshuro ya kabiri
Umuyobozi wa Project Team Work itegura irushanwa yavuze ko riri gukura neza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .