FC Barcelone yirukanye umutoza Sétien nyuma yo kunyagirwa na Bayern Munich

Yanditswe na Eric Tony Ukurikiyimfura
Kuya 17 Kanama 2020 saa 10:51
Yasuwe :
0 0

FC Barcelone yemeje ko yatandukanye n’umutoza Quique Sétien, iminsi itatu nyuma yo kunyagirwa na Bayern Munich ibitego 8-2 muri ¼ cya UEFA Champions League.

Quique Sétien w’imyaka 61, yari yagizwe umutoza wa FC Barcelone tariki ya 13 Mutarama uyu mwaka ndetse yari amaze gutoza imikino 25. Yahawe inshingano zo gutoza iyi kipe yo muri Espagne asimbuye Ernesto Valverde na we wirukanywe.

FC Barcelone yasoje Shampiyona y’Icyiciro cya Mbere muri Espagne iri ku mwanya wa kabiri, irushwa amanota atanu na Real Madrid, yatangaje ko “Umutoza mushya azatangazwa mu minsi iri imbere.”

Kwandagazwa na Bayern Munich muri UEFA Champions League ku wa Gatanu, byari inshuro ya kane mu myaka itanu FC Barcelone isezerewe itarenze muri ¼ cy’iri rushanwa rihuza amakipe yabaye aya mbere iwayo.

Nyuma yo gutsindwa uwo mukino, Sétien yari yavuze ko ari “umwanya wo gusuzuma no gufata ibyemezo bikenewe ku hazaza.”

FC Barcelone yatangaje ko kandi kwirukana umutoza ari “icyemezo cya mbere mu buryo bwaguye bwo kongera kubaka ikipe ya mbere.”

Iyi kipe yatangaje ko amatora y’umuyobozi wayo ateganyijwe umwaka utaha, azigizwa imbere akaba ku wa 15 Werurwe 2021.

Byitezwe ko Umuholandi Ronald Koeman, wakiniye FC Barcelone hagati ya 1989 na 1995, ari we ushobora kugirwa umusimbura wa Quique Sétien.

FC Barcelone yirukanye umutoza Quique Sétien nyuma yo kunyagirwa na Bayern Munich ibitego 8-2 mu mukino wa 1/4 cya Champions League

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .