00:00:00 IGIHE NETWORK KN KINYARWANDA EN ENGLISH FR FRANCAIS

FC Barcelone yegukanye Super Coupe ya Espagne inyagiye Real Madrid

Yanditswe na Iradukunda Olivier
Kuya 16 Mutarama 2023 saa 09:53
Yasuwe :

FC Barcelone yatsinze umukino wa nyuma yahuriyemo n’umukeba Real Madrid ku bitego 3-1, yegukana igikombe kiruta ibindi muri Espagne cyakinirwaga muri Arabie Saoudite mu ijoro ryo ku Cyumweru, tariki ya 15 Mutarama 2023.

Amakipe yombi yatangiye uyu mukino Real Madrid ari yo iheruka kugitwara. Mu nshuro zose cyakinwe kuva mu 1982, FC Barcelona yagitwaye inshuro 13 naho Real igitwara inshuro 12.

Mu minota ya 10 ya mbere y’umukino, FC Barcelone ni yo yabonaga uburyo bwinshi imbere y’izamu ariko igitego kirabura.

Ku munota wa 10 gusa, Robert Lewandowski yahushije uburyo ku mupira yateye n’umutwe ariko uca hejuru y’izamu. Nyuma y’iminota ibiri gusa, Éder Militão yatakaje umupira bituma Lewandowski abona ubundi buryo aho yateye ishoti ku izamu rifata igiti cy’izamu, bawusubijemo Thibaut Courtois awukuramo.

Real Madrid na yo yabonye uburyo bwa mbere muri uyu mukino bwaturutse ku mupira watewe n’umutwe na Karim Benzema, ariko umupira uca gato iruhande rw’izamu. Nyuma y’ubu buryo buri wese yagabanyije umuvuduko atangira kwiga mukeba we.

Mu minota ibanza y’umukino, Real Madrid yananiwe gukoresha impande zayo, cyane cyane urwakinagaho Vinícius Júnior wari waziritswe cyane na Ronald Araújo, wari mwiza muri uyu mukino.

Umunyezamu Marc-André ter Stegen yongeye kugaragaza ko ari mu bazamu beza ku Isi, abuza Karim Benzema kubona igitego, nubwo umusifuza Ricardo De Burgos yahise yemeza ko yaraririye.

Iminota 30 yirenze nta n’umwe urebye mu izamu abafana batangira kwifata mapfubyi bibaza uko biza kurangira kuko umukino wari mwiza buri wese agaragaza ko yakibona.

Kwifata gutyo, byatumye abakinnyi bakanguka maze FC Barcelone ishyiramo igitego cya mbere ku munota wa 34.

Iki gitego cyagiyemo Eduardo Camavinga amaze gutakaza umupira by’amaherere, wifatirwa na kapiteni Sergio Busquets, na we awuhereza Pedro González López Pedri wawuhereje Ousmane Dembele ibumoso, awuha Lewandowski na we awuhindurira Pablo Gavira wahise ashyira mu izamu.

FC Barcelone yahise yigirira icyizere itangira gusatira cyane, nubwo Eder Militao na Antonio Rudiger bahitaga bakiza izamu vuba vuba. Imipira boherezaga imbere yose Barcelone yayigeragaho mbere kuko Andreas Christensen na Jules Kounde bari beza.

Mu mpera z’igice cya mbere kandi, Gavi yagarukaga inyuma gufasha mugenzi we Alejandro Balde washoboraga gucikwa na Federico Valverde, bikabyara ibibazo.

Muri iyi minota kandi FC Barcelona yongeye guhererekanya neza imipira ku makosa yo gutakaza umupira hagati mu kibuga, Sergio Busquets arawufata awuhereza Frenkie De Jong, na we ahita awusunikira Pablo Gavira wahise awuha Robert Lewandowski washyizemo igitego cya kabiri ku munota wa 45.

Igice cya mbere cyaranzwe no kutitwara neza hagati kw’abakinnyi ba Real Madrid, cyasojwe amakipe yombi ajya mu karuhuko k’iminota 15.

Real Madrid yahise itangira igice cya kabiri ikora impinduka, umutoza Carlo Ancelotti yakuyemo Eduardo Camavinga watakazaga imipira cyane, ashyiramo Rodrygo Silva.

Rodrygo akijya mu kibuga, yahise atangira kugora ba myugariro ba FC Barcelone ku buryo Christensen yahise abona ikarita y’umuhondo. Muri iki gice ariko FC Barcelone na yo ntabwo yacitse intege.

Pedri witwaraga neza ndetse akagerageza no kuba yagumana umupira, yatumaga Xavi akinisha ikipe ye umukino yifuza wo kutemera ko Real ibona umupira.

Ku munota wa 55, Courtois yongeye gukiza izamu ku mupira watewe na none na Lewandowski. Benzema na we yagerageje gushaka uko yabona igitego cya mbere ku munota wa 63, ariko Jules Kounde wari wamwize amubuza gutera mu izamu.

Real yahise ikora izindi mpinduka ikura mu kibuga Luka Modric na Toni Kroos bari wananiwe, ishyiramo Dani Ceballos na Marco Asensio ku munota wa 65.

Robert Lewandowski yahererekanyije neza umupira na Pablo Gavira, wahise awuhindurira Pedri nawe atsinda igitego cyiza cya gatatu ku munota wa 69. Amakosa menshi mu bwugarizi bwa Real yakorwaga na Dani Carvajal.

Igitego cya gatatu kandi cya FC Barcelona cyemejwe habanje kwibazwa niba Gavi yaba yaraririye ariko VAR yemeza ko nta byabaye. Nyuma yacyo Ousmane Dembele yatanze umwanya kuri Raphinha.

Igitego cya gatatu cyaciye intege abakinnyi ba Real Madrid batangiye gukina nabi byabaviriyemo no guhabwa amakarita y’umuhondo menshi.

FC Barcelone yari yamaze kwizera intsinzi yakoze indi mpinduka ikuramo Frenkie De Jong, Ronald Araujo na Gavi, bashyiramo Eric Garcia, Franck Kessie na Ansu Fati.

Mu mpera z’umukino Real Madrid yagaragaje ko ntawusangira n’udakoramo,
Dani ceballos atera umupira Ter Stegen awukuramo, ariko Karim Benzema awusongamo, babona impozamarira.

Uyu mukino wahuzaga aya makipe ayoboye ayandi muri Espagne mu gutwara ibikombe, kuva mu 1982 cyatangira gukinwa. Iki gikombe kandi ni bwo bwa mbere umutoza wa FC Barcelone Xavi Hernandez agitwaye.

Aya makipe yombi azongera guhura tariki 19 Werurwe 2023, bakina umukino wa Shampiyona ya Espagne.

Umukino wa FC Barcelone na Real Madrid wabereye muri Arabie Saoudite
Ter Stegen yongeye kwerekana ko ari mu banyezamu bakomeye
Dani Carvajal yagowe n'ubusatirizi bwa FC Barcelone
Real Madrid yananiwe kwikura imbere ya FC Barcelone
Vinícius Júnior ahanganiye umupira na Ousmane Dembélé
Umutoza Xavi Hernandez wa FC Barcelone yegukanye igikombe kiruta ibindi muri Espagne ku nshuro ya mbere
FC Barcelone yegukanye Super Coupe ya Espagne ku Cyumweru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .