FC Barcelone vs Bayern Munich: Amakuru avugwa mu makipe yombi mbere y’umukino wa Champions League

Yanditswe na Eric Tony Ukurikiyimfura
Kuya 14 Kanama 2020 saa 09:11
Yasuwe :
0 0

Kuri uyu wa Gatanu guhera saa tatu z’ijoro (21:00), FC Barcelone irahura na Bayern Munich mu mukino wa ¼ cya UEFA Champions League ubera kuri Estádio da Luz y’i Lisbon muri Portugal.

Kuri uyu wa Gatanu guhera saa tatu z’ijoro (21:00), FC Barcelone irahura na Bayern Munich mu mukino wa ¼ cya UEFA Champions League ubera kuri Estádio da Luz y’i Lisbon muri Portugal.

Uyu ni wo mukino ukomeye abenshi bavuga uzabera muri Portugal ahazasorezwa irushanwa ry’uyu mwaka dore ko aya makipe yombi ariyo yonyine yigeze kwegukana iri rushanwa arisigayemo mu gihe buri imwe, imaze kuritwara inshuro eshanu.

FC Barcelone yari yagize intangiriro nziza z’uyu mwaka w’imikino muri Champions League, iyobora itsinda ryarimo Borussia Dortmund na Inter Milan, aho itigeze itsindwa na rimwe gusa yatandukanye n’umutoza Ernesto Valverde muri Mutarama, asimburwa na Quique Setién byarangiye atakaje igikombe cya Shampiyona muri Espagne.

Byitezwe ko FC Barcelone yongera kubakira umukino kuri Lionel Messi w’imyaka 33, wagize uruhare mu bitego 57 mu mwaka ushize w’imikino (ibitego 31 n’imipira 26 yavuyemo ibindi bitego) mu gihe ubwugarizi bwayo bukemangwa nyuma yo kwinjizwa ibitego 38 muri La Liga.

Nyuma yo kunganya na Napoli igitego 1-1 mu mukino ubanza, FC Barcelone yatsinze uwo kwishyura ku bitego 3-1 birimo kimwe cya Messi n’undi mupira yatanze kuri mugenzi we. Bivugwa ko iyi kipe iramutse isezerewe na Bayern Munich, yahita yirukana Quique Setién waba usoje umwaka w’imikino nta gikombe.

Ku ruhande rwa Bayern Munich, yo yatangiye nabi umwaka w’imikino wa 2019/20, ibi byatumye yirukana umutoza Niko Kovac, asimburwa na Hansi Flick wayikuye ku mwanya wa kane, akayihesha igikombe cya Shampiyona y’u Budage yegukanye ku ku nshuro ya munani yikurikiranya.

Mu mikino 32 amaze gutoza Bayern Munich, Hansi Flick yatsinzemo 29 ndetse ikipe ye ntiratakaza umukino kuva mu Ukuboza 2019 ubwo yatsindwaga na Borussia Monchgladbach ibitego 2-1.

Bayern Munich iraza kugendera kuri Robert Lewandowski wagize umwaka mwiza w’imikino, atsinda ibitego 53 mu mikino 44 yakinnye. Amaze gutsinda kandi ibitego 13 mu mikino irindwi, bituma abura bine gusa ngo agere ku gahigo Cristiano Ronaldo yashyizeho mu 2013/14 ubwo yatsindaga 17 mu mwaka umwe wa Champions League.

Ni ku nshuro ya kane amakipe yombi agiye guhurira mu mikino yo gukuranamo muri UEFA Champions League nyuma yo gutomborana mu 2008/09, 2012/13 na 2014/15, aho iyasezereraga indi ariyo yatwaraga igikombe.

FC Barcelone iraba yagaruye Sergio Busquets na Arturo Vidal batakinnye umukino wa Napoli kubera amakarita.

Myugariro Samuel Umtiti ntabwo akina kubera imvune yo mu ivi mu gihe rutahizamu Ousmane Dembélé wari umaze amezi icyenda hanze y’ikibuga ashobora kubanza ku ntebe y’abasimbura.

Bayern Munich yakiriye amakuru meza yo kugaruka kwa Kingsley Coman na Jérôme Boateng bari baravunitse bagasiba umukino wa Chelsea wabaye mu cyumweru gishize.

Boateng ashobora kugaruka mu mutima w’ubwigarizi akinana na David Alaba mu gihe Coman ahanganiye umwanya na Ivan Perisić ku ruhande rw’ibumoso mu busatirizi.

Benjamin Pavard ntakina uyu mukino kubera imvune amaranye iminsi ariko byitezwe ko yazakina imikino itaha mu gihe ikipe ye yasezerera FC Barcelone.

Qique Setién utoza FC Barcelone yavuze ko guhura na Bayern Munich yuzuye bigoye, ariko biteguye gukina.

Ati “Ni ikipe yuzuye, ifite ubushobozi bwo gusatira, kugarira, gukoresha abakinnyi benshi mu busatirizi no gushyira ikipe ku gitutu. Uramutse wirinze igitutu cyabo kandi akaba ari nabyo dushoboye, ushobora kubababaza . Tugomba kugarira, tukanasatira neza.”

Hansi Flick yavuze ko umukino wo kuri uyu wa Gatanu atari Bayern Munich igiye gukina na Messi ahubwo ari amakipe yombi ahanganiye kujya muri ½.

Ati “Ntabwo ari Bayern ikina na Messi. Ni Bayern ikina na Barcelone. Messi ni umukinnyi mwiza kandi twatekereje uburyo umuntu akina na we. Dukwiye kubikora nk’ikipe.”

FC Barcelone na Bayern Munich ni yo makipe amaze kugera muri ¼ cya UEFA Champions League inshuro nyinshi (18) kurusha ayandi mu nshuro 24 na 23 (uko akurikirana) amaze gukinamo iri rushanwa.

Iyi kipe yo muri Espagne ifite agahigo ko kuba ari ku nshuro ya 13 yikurikiranya igera muri ¼ kuva mu mwaka w’imikino wa 2007/08.

Abashobora kubanza mu kibuga muri FC Barcelone: Ter Stegen; Semedo, Piqué, Lenglet, Alba; Roberto, Busquets, De Jong, Griezmann; Suárez, Messi.

Abashobora kubanza mu kibuga muri Bayern Munich: Neuer; Kimmich, Boateng, Alaba, Davies; Thiago, Goretzka; Coman, Müller, Gnabry; Lewandowski.

Lionel Messi na Robert Lewandowski ni bo bahanzwe amaso kuri uyu wa Gatanu ubwo FC Barcelone iraba ikina na Bayern Munich

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .